༢༠༡༧ ཟླ་ ༡༠ ཚེས་ ༡༦ རེས་གཟའ་ཟླ་བ།

༄༅། །ཕྱི་ལོ་ ༢༠༡༧ ཟླ་ ༡༠ ཚེས་ ༩ ནས་ ༡༢ བར་ཅེག་སྤྱི་མཐུན་རྒྱལ་ཁབ་ཀྱི་རྒྱལ་ས་པྲཱག་ Prague ནང་རྟེན་གཞི་བྱས་པའི་ཝ་སི་ལབ་ཧ་ཝེལ་ Vaclav Havel ཚོགས་ཁང་དུ་ཕྱི་དྲིལ་བོད་ཀྱི་འགྲེམས་སྟོན་ཚན་པའི་གོ་སྒྲིག་འོག་ Forum 2000 ཞེས་པའི་ཚོགས་པ་དང་། ལིན་ཧཌ་ཐེབས་རྩ་ Linhart Foundation དེ་བཞིན་ Tibet Open House དང་རྒྱལ་ཡོངས་འགྲེམས་སྟོན་ཁང་ National Gallery ཝ་སི་ལབ་ཧ་ཝེལ་དཔེ་མཛོད་ཁང་ Vaclav Havel Library བཅས་ཀྱི་མཐུན་འགྱུར་གནང་སྟེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྣམ་དང་། འཛམ་གླིང་ཞི་བདེ། དེ་བཞིན་ཆོས་ལུགས་མཐུན་སྒྲིལ་དང་བོད་དོན་སྐོར་གྱི་པར་རིས་འགྲེམས་སྟོན་ཞིག་གནང་འདུག

དེ་ཡང་འགྲེམས་སྟོན་དབུ་འབྱེད་སྐབས་ཕྱི་དྲིལ་བོད་ཀྱི་འགྲེམས་སྟོན་ཚན་པའི་འགན་འཛིན་བཀྲ་ཤིས་ཕུན་ཚོགས་ལགས་ཀྱིས་བོད་མི་དང་ཅེག་མི་མང་དབར་དམིགས་བསལ་འབྲེལ་བ་ཡོད་སྐོར་དང་།  ཅེག་སྤྱི་མཐུན་རྒྱལ་ཁབ་ཀྱང་དེ་སྔ་གཅིག་བསྡུད་དབང་འཛིན་རིང་ལུགས་འོག་ལོ་ངོ་ ༤༠ ལྷག་ཙམ་རིང་སྡུག་སྦྱོང་མྱངས་ཡོད་པ་ལྟར་བོད་མི་རྣམས་ཀྱང་ཕྱི་ལོ་ ༡༩༥༩ ནས་བཟུང་རྒྱ་ནག་དམར་ཤོག་གཅིག་བསྡུད་དབང་འཛིན་པ་ཚོའི་དམ་བསྒྲགས་ཅན་གྱི་སྲིད་བྱུས་འོག་དཀའ་སྡུག་ཧ་ཅང་མྱངས་དང་མྱོང་བཞིན་ཡོད་སྐོར་དང་།

 ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་དམ་པ་སྐུ་ཞབས་ཝ་སི་ལབ་ཧ་ཝེལ་མཆོག་དང་དམིགས་བསལ་མཛའ་བརྩེའི་འབྲེལ་ལམ་དམ་གཟབ་ཡོད་པ་ཙམ་མ་ཟད།   ཞི་བདེའི་དེད་དཔོན་རྣམ་གཉིས་དབར་མང་གཙོའི་རིང་ལུགས་གོང་མཐོ་དང་།  འཆམ་མཐུན་གྱི་སྤྱི་ཚོགས་སྐྲུན་གནང་མཛད་རྒྱུའི་རླབས་ཆེན་གྱི་མཛད་རྗེས་སོགས་ཐུན་མོང་གི་བཞེངས་ཕྱོགས་གཅིག་གྱུར་ཡིན་པ།  

  སྲིད་འཛིན་དམ་པ་ཁོང་སྐུ་འཚོ་བཞུགས་སྐབས་ཏེ་ཕྱི་ལོ་ ༡༩༩༠ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཡུལ་དེར་གདན་འདྲེན་ཞུས་པ་ལྟར་༸གོང་ས་༸སྐྱབས་མགོན་ཆེན་པོ་མཆོག་༸ཞབས་སོར་བཀའ་དྲིན་བསྐྱངས་ཡོད་པ་དེ་ནི་ཡུལ་དེར་རང་བཙན་ཐོབ་རྗེས་གལ་ཆེའི་མི་སྣ་གདན་འདྲེན་ཞུས་པ་ཆེད་ཐོག་མ་ཆགས་ཡོད་པ་མ་ཟད།   དུས་སྐབས་དེ་ནས་བཟུང་ཡུལ་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཆིབས་སྒྱུར་ཐེངས་  ༡༡ བསྐྱངས་ཡོད་པར་བརྟེན་བོད་མི་རྣམས་ཀྱིས་དུས་རྟགས་ཏུ་སྲིད་འཛིན་དམ་པ་ཁོང་གིས་༸གོང་ས་མཆོག་ཡུལ་དེར་གདན་འདྲེན་ཞུ་གནང་མཛད་པ་དེར་དུས་རྟག་ཏུ་བཀའ་དྲིན་སྙིང་བཅངས་ཞུ་བཞིན་ཡོད་པ་དང་།  སྲིད་འཛིན་དམ་པ་ཁོང་ཕྱི་ལོ་ ༢༠༡༡ ལོར་འདས་གྲོངས་སུ་གྱུར་བ་དེ་ནི་བོད་མི་རྣམས་ལ་གྱོང་གུན་ཧ་ཅང་ཆེན་པོ་ཕོག་པ་ཞིག་ཡིན་སྐོར་གསུངས།  

ཕྱོགས་མཚུངས་འགན་འཛིན་བཀྲ་ཤིས་ཕུན་ཚོགས་ལགས་ཀྱིས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་རྣམས་ལ་མང་གཙོའི་ལམ་བཟང་གསོལ་སྩལ་མཛད་པ་དེ་ནི་དུས་རབས་ ༢༠ ནང་བྱུང་བའི་མང་གཙོའི་འཐབ་རྩོད་གཞན་ལྟར་རྒྱལ་ཁབ་གཞན་ཞིག་གིས་དྲག་པོའི་སྟོབས་ཤུགས་ལ་བརྟེན་པ་ལྟ་བུ་དང་། ཡང་ན་རྒྱལ་ཁབ་རང་གི་མི་མང་གྱེན་ལངས་བྱུང་ནས་འཚེ་བའི་ལས་འགུལ་སྤེལ་མཐར་མང་གཙོ་བྱུང་བའི་གནས་སྟངས་ལྟ་བུ་རྩ་བ་ནས་མིན་པར།   ༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་དགྱེས་ཚོར་ངང་ཐུགས་སྤོབས་པ་བཅས་དང་བོད་མི་རྣམས་ལ་མང་གཙོའི་ལམ་བཟང་གསོལ་སྩལ་མཛད་པ་ཞིག་ཡིན་སྐོར་གསུངས།

ཐེངས་འདིར་འགན་འཛིན་བཀྲ་ཤིས་ཕུན་ཚོགས་ལགས་དང་ལྷན་པྲཱག་ནང་རྟེན་གཞི་བྱས་པའི་བོད་ཁང་ Tibet Open House གི་འགན་འཛིན་དགེ་བཤེས་ཡེ་ཤེས་དགའ་བ་ལགས་ཀྱང་ཡོད་པ་བཅས།།