༢༠༡༧ ཟླ་ ༡༠ ཚེས་ ༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༧ ཟླ་ ༡༠ ཚེས་ ༢ ཉིན་རྒྱ་གར་གྱི་མེས་པོ་དམ་པ་བདག་ཉིད་ཆེན་པོ་གྷན་དི་མཆོག་གི་སྐུའི་འཁྲུངས་སྐར་དུས་ཆེན་དང་སྟབས་བསྟུན། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་། དབུས་བོད་ཀྱི་གཞོན་ནུ་ལྷན་ཚོགས། བོད་རྒྱལ་ཡོངས་རྩེད་རིགས་ཚོགས་ཆུང་བཅས་ཀྱི་གོ་སྒྲིག་དང་ཏཱ་ལའི་བླ་མའི་ཐེབས་རྩའི་མཐུན་འགྱུར་འོག གློ་ནད་ཊི་བྷི་སྔོན་འགོག་ཆེད་རྡ་ས་གངས་སྐྱིད་སིལ་སྤོལ་རྩེད་ཐང་དུ་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དབུས་བདེ་སྲུང་དང་འཕྲོད་བསྟེན་བཀའ་བློན་མཆོག བོད་མི་མང་སྤྱི་འཐུས་ཁག་གཅིག་བཅས་དབུ་བཞུགས་ཐོག་སྦེལ་སྐོབ་བདེ་སྐྱིད་སླར་གསོ་དང་ལུགས་ཟུང་བསམ་གྲུབ་གླིང་རུ་ཁག་གཉིས་དབར་སིལ་སྤོལ་གྱི་མཐའ་མའི་རྩེད་འགྲན་སྐབས་ལུགས་ཟུང་བསམ་གྲུབ་གླིང་རུ་ཁག་གིས་སྤོ་ལོ་ ༤༧ བླུགས་པ་དང་། བདེ་སྐྱིད་སླར་གསོའི་རུ་ཁག་གིས་སྤོ་ལོ་ ༣༥ བླུགས་ནས་མཐའ་མའི་རྒྱལ་ཁ་ལུགས་ཟུང་བསམ་གྲུབ་གླིང་གཞིས་ཆགས་ལ་རྒྱལ་ཁ་ཐོབ་ཡོད།
དེ་ཡང་སྐབས་དེར་དཔལ་ལྡན་སྲིད་སྐྱོང་མཆོག་གིས་འཛམ་གླིང་མཉམ་འབྲེལ་རྒྱལ་ཚོགས་ཀྱིས་ཕྱི་ལོ་ ༢༠༣༠ ནང་ཚུད་ལ་གློ་ནད་ཊི་བྷི་ན་ཚ་རྩ་མེད་བཟོ་རྒྱུའི་འཆར་གཞི་ཡོད་པ་མ་ཟད། རྒྱ་གར་རྒྱལ་ཡོངས་ལ་མཚོན་ན་ཕྱི་ལོ་ ༢༠༢༥ ནང་ཚུད་དང་། ཧི་མཱ་ཅལ་དང་བོད་མིའི་སྒྲིག་འཛུགས་ལ་མཚོན་ན་ཕྱི་ལོ་ ༢༠༢༡ དང་ ༢༠༢༢ ནང་ཚུད་ལ་གློ་ནད་ཊི་བྷི་རྩ་མེད་བཟོ་རྒྱུའི་འཆར་གཞི་སྤེལ་བཞིན་ཡོད་པར་བརྟེན། འབྱུང་འགྱུར་ལོ་ངོ་གསུམ་བཞིའི་ནང་དུ་ང་ཚོ་ཚང་མས་ཕྱར་གྲུ་མཉམ་འདེགས་ཐོག་ནས་གློ་ནད་ཊི་བྷི་སྔོན་འགོག་ཆེད་གོ་རྟོགས་ལས་འགུལ་རྒྱ་ཆེ་སྤེལ་ཏེ་སྤྱི་ཚོགས་ནང་གློ་ནད་ཊི་བྷི་རྩ་མེད་བཟོ་ཐབས་བྱེད་དགོས་སྐོར་སོགས་ཀྱི་གསུང་བཤད་གནང་ཡོད། །
