༢༠༡༧ ཟླ་ ༡༠ ཚེས་ ༡༩ རེས་གཟའ་ཕུར་བུ།

༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ཡུ་པི་མངའ་སྡེའི་མེ་རཌ་གྲོང་ཁྱེར་ནང་ Meerut རྟེན་གཞི་བྱས་པའི་གཞུང་གི་སློབ་གྲྭ་ DAV Central Public School  ཞེས་པའི་ནང་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་སློབ་དེབ་དབུ་འབྱེད་མཛད་པ་མ་ཟད། མཛད་སྒོའི་སྐུ་མགྲོན་གཙོ་བོའི་ཚུལ་དུ་དགེ་ལས་སློབ་ཕྲུག་གྲངས་ ༡༥༠༠ བརྒལ་བར་བླང་དོར་བཀའ་སློབ་སྩལ་རྗེས།  ཕྱི་ཚེས་ ༡༧ ཉིན་མགོན་པོ་གང་ཉིད་མཆོག་རྒྱ་གར་བྱང་ཤར་མ་ནི་པུར་མངའ་སྡེའི་རྒྱལ་ས་ཨིམ་ཕཱལ་གྱི་གནམ་ཐང་དུ་༸ཞབས་སོར་འཁོད་སྐབས་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ཨེན་བྷི་རེན་མཆོག་ Chief Minister N. Biren Singh དང་གྲོས་ཚོགས་འོག་མའི་ཚོགས་གཙོ་སྐུ་ཞབས་ཡུམ་ནམ་ཁེམ་ཅནྡ་ Yumnam Khemchand མཆོག་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་འདུག

ཕྱི་ཚེས་ ༡༨ ཉིན་༸གོང་ས་མཆོག་གིས་མ་ནི་པུར་མངའ་སྡེའི་རྒྱལ་ས་ཨིམ་ཕཱལ་ནང་མཛད་འཕྲིན་རྒྱ་ཆེ་བསྐྱངས་རྗེས་ཕྱི་ཚེས་ ༡༩ ཕྱེད་ཡོལ་ཆུ་ཚོད་ ༣ ཐོག་རྡ་སའི་ཉེ་འགྲམ་ག་གྷལ་གནམ་ཐང་དུ་༸ཞབས་སོར་བཀའ་དྲིན་སྐྱོང་སྐབས་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་དང་སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་ལགས་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས།

དེ་རྗེས་བཞུགས་སྒར་དུ་ཆིབས་སྒྱུར་སྐྱོང་སྐབས་ལམ་དུ་བོད་རིགས་གཙོ་བོར་གྱུར་བའི་དད་ལྡན་སེར་སྐྱ་མང་ཚོགས་རྣམས་ཀྱིས་ལག་ཏུ་དཀར་གཙང་མཇལ་དར་སོགས་ཐོགས་ནས་ཕེབས་བསུ་གཟབ་རྒྱས་ཞུས་འདུག།