༢༠༡༧ ཟླ་ ༡༠ ཚེས་ ༣༠ རེས་གཟའ་ཟླ་བ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཞབས་ཤིན་ཛོ་ཨ་བྷེ་མཆོག་སླར་ཡང་ཉི་ཧོང་གི་སྲིད་བློན་དུ་འོས་འདེམས་བྱུང་བར་འཚམས་འདྲི་མཛད་པའི་ནང་། དེང་སྐབས་འཛམ་གླིང་གི་གནས་སྟངས་ཁ་ཕྱོགས་ཇི་འདྲ་ཞིག་ཏུ་བསྒྱུར་མིན་ངེས་བརྟན་གང་ཡང་མེད་ཁར་ས་ཕྱོགས་མང་པོར་ཟིང་འཁྲུག་ལང་བཞིན་པའི་སྐབས་འདིར་དཀའ་ངལ་རྣམས་འཚེ་བ་དང་བྲལ་ཞིང་གྲོས་མོལ་ལ་བརྟེན་ནས་སེལ་ཐབས་ཆེད་ཞེ་ཐག་པ་ནས་འབད་བརྩོན་བྱེད་དགོས་པ་ཧ་ཅང་གལ་གནད་ཆེན་པོ་ཆགས་ཡོད།
འདི་ལོའི་ནོ་སྦེལ་ཞི་བདེའི་གཟེངས་རྟགས་དེ་རྒྱལ་སྤྱིའི་རྡུལ་ཕྲན་མཚོན་ཆ་ཉེན་སྲུང་ཚོགས་པར་ཕུལ་བ་དེས་རྡུལ་ཕྲན་མཚོན་ཆས་འགྲོ་བ་མི་རིགས་ཡོངས་ལ་ཉེན་ཁ་ཇི་ཙམ་ཡོད་པ་དང་། ཉེན་ཁ་དེ་དག་མེད་པ་བཟོ་རྒྱུའི་ཛ་དྲག་གི་གནས་སྟངས་ཤིག་ལ་སླེབ་ཡོད་པ་དེར་ངོས་འཛིན་གནང་བ་ཞིག་ཡིན།
སྐུ་ཉིད་མཆོག་གིས་ཀྱང་ཧི་རོ་ཤི་མར་རྡུལ་ཕྲན་མཚོན་ཆ་ཆེས་ཐོག་མ་འཕངས་ནས་ལོ་ ༧༠ འཁོར་བའི་དྲན་རྟེན་མཛད་སྒོའི་ཐོག་རྡུལ་ཕྲན་མཚོན་ཆ་མེད་པའི་འཛམ་གླིང་ཞིག་བསྐྲུན་དགོས་པའི་དགོངས་འཆར་བཏོན་གནང་བ་དེ་ཡང་བཞེངས་ཕྱོགས་ཡང་དག་པ་ཞིག་ཡིན་ཞིང་། ངོས་ནས་ཀྱང་དམིགས་ཡུལ་དེའི་ཐོག་ཕྱོགས་ཡོངས་ནས་འབད་བརྩོན་གནང་ཐུབ་རྒྱུའི་རེ་བ་ཞུ་རྒྱུ་ཡིན། ཞེས་འཁོད་ཡོད་པ་མ་ཟད། ༸གོང་ས་མཆོག་གིས་རྒྱ་གར་དང་ཉི་ཧོང་དབར་འབྲེལ་ལམ་ཉེ་རུ་འགྲོ་བཞིན་པ་དེར་བསྔགས་བརྗོད་དང་སྦྲགས་ཐུགས་དགྱེས་ཚོར་མཛད་དོན། འཛམ་གླིང་ནང་མང་གཙོའི་རྒྱལ་ཁབ་ཆེ་ཤོས་དང་། ཨེ་ཤི་ཡའི་ནང་འཛུགས་བསྐྲུན་ཡར་རྒྱས་ཆེ་ཤོས་ཀྱི་མང་གཙོའི་རྒྱལ་ཁབ་གཉིས་དབར་མཛའ་བརྩེའི་འབྲེལ་ལམ་དམིགས་བསལ་ཞིག་ཡོད་དགོས་པ་ནི་ཆོས་ཉིད་ཡིན།ཥཞེས་བཀའ་སློབ་སྩལ་བ་མ་ཟད། མགོན་པོ་གང་ཉིད་མཆོག་ཉི་ཧོང་ཡུལ་དུ་ཐེངས་མང་ཆིབས་སྒྱུར་བསྐྱངས་གནང་མཛད་པ་རྣམས་ཐུགས་དྲན་གསོ་མཛད་དེ་ཡུལ་དེའི་མང་ཚོགས་མཆོག་དམན་ཀུན་ནས་ཧ་ཅང་སེམས་ཐག་ཉེ་བའི་མཛའ་བརྩེའི་ཚོར་བ་བཏོན་པ་ཙམ་མ་ཟད། ༸གོང་ས་མཆོག་གིས་འགྲོ་བ་མིའི་གཞི་རྩའི་བཟང་སྤྱོད་ཀྱི་རིན་ཐང་དང་ཆོས་ལུགས་མཐུན་སྒྲིལ་གོང་མཐོར་གཏོང་གནང་མཛད་པའི་ལམ་སྟོན་དེ་དག་ཐོག་སེམས་ཁུར་ཧ་ཅང་ཆེན་པོ་གནང་བཞིན་ཡོད་སྐོར་བཀའ་སློབ་སྩལ།
མཐར་༸གོང་ས་མཆོག་གིས་སྲིད་བློན་མཆོག་ལ་མང་ཚོགས་ཀྱིས་རེ་བ་བཅོལ་བ་ལྟར་སྲིད་བློན་གྱི་ལས་ཡུན་རིང་ལས་དོན་གང་ཅིར་བྱ་བ་ལམ་ལྷོངས་ཡོང་བའི་ཐུགས་སྨོན་ཡང་མཛད་འདུག་པ་བཅས།།
