༢༠༡༧ ཟླ་ ༡༠ ཚེས་ ༦ རེས་གཟའ་པ་སངས།
༄༅། །འདི་ལོའི་ནོ་སྦེལ་ཞི་བདེའི་གཟེངས་རྟགས་དེ་རྒྱལ་སྤྱིའི་རྡུལ་ཕྲན་མཚོན་ཆ་ཉེན་སྲུང་ཚོགས་པར་ ICAN ཐོབ་པར་བརྟེན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཚོགས་པའི་འཛིན་སྐྱོང་འགན་འཛིན་ལྕམ་སྐུ་བྷེ་ཏེ་རི་སི་ཕིན་ Beatrice Fihn མཆོག་ལ་འཚམས་འདྲི་མཛད་འདུག
ཚོགས་པ་དེས་འཛམ་གླིང་ཁྱོན་དུ་རྡུལ་ཕྲན་མཚོན་ཆ་རྩ་མེད་བཟོ་ཆེད་ད་བར་མུ་མཐུད་ལས་འགུལ་ཤུགས་ཆེ་སྤེལ་ཡོད་པ་དང་། དེ་ཡང་༸གོང་ས་མཆོག་གིས་འཚམས་འདྲི་མཛད་པའི་ནང་འཁོད་དོན།
དེང་སྐབས་འཛམ་གླིང་གི་གནས་སྟངས་ཇི་འདྲ་ཞིག་ཏུ་གྱུར་མིན་ཐད་ངེས་བརྟན་གང་ཡང་མེད་པ་མ་ཟད། ས་ཕྱོགས་གང་སར་ལྷིང་འཇགས་མེད་པའི་གནས་སྟངས་འདིའི་འོག་རྒྱལ་སྤྱིའི་རྡུལ་ཕྲན་མཚོན་ཆ་ཉེན་སྲུང་ཚོགས་པའི་ལས་འགན་ནི་ཆེད་ཛ་དྲག་པོ་ཞིག་ཏུ་གྱུར་ཡོད། དེར་བརྟེན་ཐེངས་འདིར་ནོ་སྦེལ་གཟེངས་རྟགས་ཚོགས་ཆུང་གིས་ཁྱེད་ཚོའི་འབད་བརྩོན་ལ་ངོས་འཛིན་གནང་བ་འདི་ནི་ཧ་ཅང་འོས་ཤིང་འཚམས་པ་ཞིག་ཡིན།
ངོས་ཀྱིས་རྡུལ་ཕྲན་མཚོན་ཆ་བྲལ་བའི་འཛམ་གླིང་ཞིག་བསྐྲུན་ཐུབ་ཆེད་འབད་བརྩོན་རྒྱུན་སྐྱོང་ཐུབ་པའི་སྨོན་འདུན་ཞུ་རྒྱུ་ཡིན། ཞེས་འཁོད།
སྤྱིར་༸གོང་ས་མཆོག་གིས་ཕྱི་ལོ་ ༢༠༠༨ ལོར་རྒྱལ་སྤྱིའི་རྡུལ་ཕྲན་མཚོན་ཆ་ཉེན་སྲུང་ཚོགས་པའི་ལས་དོན་ལ་རྒྱབ་སྐྱོར་མཛད་དེ་བཀའ་སློབ་སྩལ་དོན། ངོས་ཀྱི་རྡུལ་ཕྲན་མཚོན་ཆ་མེད་པའི་འཛམ་གླིང་ཞིག་བློར་འཆར་ཐུབ་བཞིན་འདུག ཅེས་བཀའ་སློབ་སྩལ་མྱོང་ཡོད།།
གསུང་འཕྲིན་ངོ་མ་ཨིན་ཡིག་ནས་ཕྱི་དྲིལ་བོད་ཡིག་ཚན་པས་ཕབ་སྒྱུར་ཞུས་པས་ཨིན་ཡིག་ལ་རྩ་འཛིན་ཞུ།།
