ཕྱི་ལོ་ ༢༠༡༧ ཟླ་ ༩ ཚེས་ ༡༩ རེས་གཟའ་མིག་དམར།
༄༅། །འདི་གར་སྦར་སིལ་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༧ ཟླ་ ༩ ཚེས་ ༡༢ ནས་ ༡༥ བར་ཉིན་གྲངས་གསུམ་རིང་ལུག་སུམ་སྦག་Luxembourg རྒྱལ་ཡོངས་ཡུལ་སྐོར་སྤྲོ་འཆམ་ལས་ཁང་གིས་ཡུལ་དེའི་རིག་གཞུང་ཕྱུག་པོ་དང་དེང་དུས་ཀྱི་ཡར་རྒྱས་སོགས་ཀྱི་དྲིལ་བསྒྲགས་ཆེད་ལས་རིམ་ཞིག་གོ་སྒྲིག་གིས་མགྲོན་འབོད་ཞུས་པ་ལྟར། སྦེལ་ཇམ་དང་ཨིན་ཡུལ། ཕ་རན་སི། འཇར་མ་ནི་བཅས་ནས་རྒྱལ་སྤྱིའི་ཚོགས་པ་དང་སྒྲིག་འཛུགས་འདྲ་མིན་ནས་མི་སྣ་ ༡༢ གདན་ཞུ་གནང་ཁོངས་སུ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱང་ཆེད་ཕེབས་གནང་ཡོད།
གཟིགས་སྐོར་སྐབས་ཡུལ་དེའི་ལོ་རྒྱུས་རང་བཞིན་ལྡན་པའི་ས་གནས་ཁག་དང་དེང་དུས་ཀྱི་མཐུན་རྐྱེན་རྒྱ་ཆེ་རྒྱན་པའི་སྒྲིག་འཛུགས་ཁག་ལ་འཚམས་གཟིགས་གདན་འདྲེན་ཞུས་པ་དང་མ་འོངས་པར་རྒྱལ་ཁབ་ཏུ་མཐུན་འབྲེལ་མཛད་རིམ་ཁག་སྤེལ་ཆེད་མདུན་ལམ་ལྟ་བུར་ངོ་སྤྲོད་འབོད་སྐུལ་ཞུས།འཚམས་གཟིགས་གནང་ཞོར་ལ་བོད་དོན་རྒྱབ་སྐྱོར་ཚོགས་པའི་སྐུ་ཞབས་པེ་ཨར་བུ་མཱན་དང་ཕ་ལོ་རནས་བུ་རི་ཀྲི་རྣམ་གཉིས་མཇལ་འཕྲད་གནང་སྐབས་སྐུ་ཚབ་དོན་གཅོད་ཀྱིས་འདི་ལོའི་ཕྱི་ཟླ་ ༡༡ ནང་ཡུལ་དེའི་ནང་ཁོར་ཡུག་སྐོར་ཚོགས་འདུ་ཞིག་འཚོགས་རྒྱུ་ཡིན་པར་གདན་ཞུ་དང་། དེ་དུས་བོད་ཀྱི་ཁོར་ཡུག་གི་གནས་སྟངས་སྐོར་གཏམ་བཤད་གནང་རྒྱུ་ཡིན་པ་མ་ཟད། བོད་དོན་གོ་རྟོགས་སྤེལ་རྒྱུའི་ལས་འགུལ་སོགས་གོ་སྒྲིག་ཞུ་རྒྱུ་ཡིན་འདུག
དེང་འདིའི་མཇལ་འཕྲད་བཀའ་མོལ་ཞུས་པ་དེས་བོད་དོན་ཐོག་སྔར་ལྷག་རྒྱབ་སྐྱོར་དང་དེ་སྔ་དོན་གཅོད་བཀྲ་ཤིས་ཕུན་ཚོགས་ལགས་རྒྱལ་ཁབ་ཏུ་ཐེངས་གཉིས་ཕེབས་མྱོང་སྟབས་འབྲེལ་བ་བསྐྱར་མཐུད་དམ་གཟབ་ཡོང་རྒྱུར་ཕན་རླབས་བྱུང་ཡོད།།
