ཕྱི་ལོ་ ༢༠༡༧ ཟླ་ ༩ ཚེས་ ༢༡ རེས་གཟའ་ཕུར་བུ།
༄༅། །འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཞི་བདེ་དང་། འགྲོ་བ་མི་རིགས་གཅིག་གྱུར་གྱི་འདུ་ཤེས་གོང་མཐོར་གཏོང་གནང་མཛད་རྒྱུའི་རླབས་ཆེན་གྱི་མཛད་རྗེས་ལ་ཆེ་བསྟོད་ཀྱི་གཟེངས་རྟགས་གྲངས་ལས་འདས་པ་ཕུལ་ཡོད་པ་དེ་ལྟར་ནའང་།
ཕྱི་ཟླ་ ༩ ཕྱི་ཚེས་ ༡༩ ཉིན་སླར་ཡང་མགོན་པོ་གང་ཉིད་མཆོག་ལ་ཨི་ཊ་ལིའི་མངའ་སྡེ་སི་སི་ལི་ནང་གི་ sola delle Femmine དང་ Ventimiglia di Sicilia ཞེས་པའི་གྲོང་སྡེ་ཁག་གཉིས་ཀྱི་གྲོང་སྡེའི་སྤྱི་ཁྱབ་པ་རྣམ་གཉིས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཆེ་བསྟོད་མི་སེར་གྱི་མཚན་གནས་གཟེངས་རྟགས་འབུལ་ལམ་ཞུས་པར་མགོན་པོ་གང་ཉིད་མཆོག་གིས་དགྱེས་བཞེས་མཛད།
གཟེངས་རྟགས་དེ་ནི་འདི་ཉིད་རྒྱལ་ཁབ་དང་ཡང་ན་རྒྱལ་ས་ཞིག་གིས་གཟེངས་རྟགས་འབུལ་འོས་པའི་ཕྱི་རྒྱལ་མི་རིགས་ཤིག་ལ་ཆེ་བསྟོད་ཞུ་སླད་གཟེངས་རྟགས་འབུལ་ལམ་ཞུ་སྲོལ་ཡོད་འདུག་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འཛམ་གླིང་ཡུལ་གྲུ་འདྲ་མིན་ནས་ཆེ་བསྟོད་མི་སེར་གྱི་མཚན་གནས་གཟེངས་རྟགས་འབུལ་ལམ་ཞུས་ཡོད།
གཞན་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཕྱི་ལོ་ ༢༠༠༦ ཟླ་ ༩ ནང་ཁེ་ན་ཌའི་ཆེད་བསྟོད་མི་སེར་གྱི་གཟེངས་རྟགས་འབུལ་ལམ་ཞུས་ཡོད་པ་དང་། ཕྱི་ལོ་ ༢༠༠༩ ཟླ་ ༩ ཟླ་ ༢ ནང་ཨེ་ཌ་ལིའི་རྒྱལ་ས་རོམ་དང་ལྦེ་ན་སིའི་ཆེད་བསྟོད་མི་སེར་གྱི་གཟེངས་རྟགས་འབུལ་ལམ་ཞུས་ཡོད། དེའི་རྗེས་ལོའི་ཕྱི་ཟླ་ ༦ ནང་ཕ་རན་སིའི་རྒྱལ་ས་པེ་རི་སི་དང་ཕྱི་ཟླ་ ༧ ནང་པོ་ལན་ཌིའི་རྒྱལ་ས་ལྦར་སོའི་ཆེད་བསྟོད་གཟེངས་རྟགས་འབུལ་ལམ་ཞུས་ཡོད།
ཕྱི་ལོ་ ༢༠༡༠ ཟླ་ ༧ ཚེས་ ༡༨ ཉིན་ཧན་གྷརིའི་རྒྱལ་ས་བྷུ་ཏ་པེ་སི་ཌི་ཡི་ཆེད་བསྟོད་གཟེངས་རྟགས་འབུལ་ལམ་ཞུས་ཡོད། ཕྱི་ལོ་ ༢༠༡༢ ཟླ་ ༥ ཚེས་ ༢༤ ཉིན་སྦེལ་ཇམ་གྱི་རྒྱལ་ས་ཧུ་ཡིས་ཀྱང་གཟེངས་རྟགས་འབུལ་ལམ་ཞུས་ཡོད། །
