ཕྱི་ལོ་ ༢༠༡༧ ཟླ་ ༩ ཚེས་ ༢༠ རེས་གཟའ་ལྷག་པ།
༄༅། །ཕྱི་ལོ་ ༢༠༡༧ ཟླ་ ༩ ཚེས་ ༡༧ ཉིན་མེ་སི་ན་ Messina གྲོང་ཁྱེར་གྱི་སྤྱི་ཁྱབ་པ་སྐུ་ཞབས་པ་རེ་ནཱ་ཌོ་ཨེ་ཀོ་རིན་ཏི་ Renato Accorinti ལགས་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་མེ་སི་ན་གྲོང་ཁྱེར་གྱི་ཝི་ཏོ་རི་ཡ་འཁྲབ་སྟོན་ཁང་ Theatre Vittorio དུ་ཕེབས་བསའི་སྣེ་ལེན་གཟབ་རྒྱས་ཞུས་རྗེས་གྲོང་ཁྱེར་སྤྱི་ཁྱབ་པ་མཆོག་གིས། ངའི་དམིགས་ཡུལ་ནི་༧གོང་ས་ཏཱ་ལའི་བླ་མ་མཆོག་སི་སི་ལི་གྲོང་ཁྱེར་དུ་གདན་འདྲེན་ཞུས་ཏེ་ང་ཚོར་བཀའ་སློབ་གནང་ཆེད་ཡིན་ཞེས་གསུངས་པར་མེ་སི་ན་མི་མང་གིས་སྤྱི་ནོར་༧གོང་སྐྱབས་མགོན་ཆེན་པོ་མཆོག་ལ་དད་གུས་གཡོ་བ་མེད་པའི་ངང་དགའ་སྤྲོའི་རྣམ་པ་ཤུགས་ཆེ་བསྟན་ཡོད།
དེ་རྗེས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་གྲོང་ཁྱེར་སྤྱི་ཁྱབ་པ་སྐུ་ཞབས་རེ་ནཱ་ཌོ་ཨེ་ཀོ་རིན་ཏི་ལགས་ཀྱིས་ཞི་བདེ་དང་དྲང་བདེན། དེ་བཞིན་འཚེ་བ་མེད་པའི་གཟེངས་རྟགས་འབུལ་ལམ་ཞུས་པར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཞི་བདེའི་གཟེངས་རྟགས་འབུལ་བཞེས་གནང་སྟེ་བཀའ་སློབ་བསྩལ་དོན། འགྲོ་བ་མིའི་རྩོད་རྙོག་རྐྱེན་པས་འཚེ་བ་བརྒྱུད་མི་མང་ས་ཡ་མང་པོའི་ཚེ་སྲོག་ཤོར་བ་མ་ཟད། འཛམ་གླིང་གི་དཔལ་འབྱོར་དང་ཁོར་ཡུག་གི་གནས་སྟངས་ཡང་ཉམས་ཆགས་འགྲོ་བཞིན་ཡོད།
ང་ཚོས་དུས་རབས་ཉེར་གཅིག་འདི་བཞིན་བཟོད་བསྲན་དང་གྲོས་མོལ་གྱི་ལམ་ནས་དཀའ་ངལ་སེེལ་ཐབས་བྱེད་དགོས་པའི་དུས་རབས་ཤིག་ཆགས་རྒྱུར་འབད་བརྩོན་བྱེད་དགོས། དེ་ལྟར་ཡོང་བར་ཤེས་ཡོན་ནི་ཧ་ཅང་གལ་ཆེན་པོ་ཆགས་ཡོད། དེང་དུས་ཤེས་ཡོན་ལམ་ལུགས་ནང་འགྲོ་བ་མིའི་གཤིས་རྒྱུད་དང་འབྲེལ་བའི་བཟང་པོའི་རིན་ཐང་གོང་མཐོར་གཏོང་རྒྱུའི་ཐད་མ་འདང་བའི་ཆ་ཞིག་ཡོད་པར་བརྟེན། དེང་དུས་ཤེས་ཡོན་ལམ་ལུགས་ནང་རིས་མེད་ཀྱི་བཟང་སྤྱོད་གོང་མཐོར་གཏོང་རྒྱུ་དང་འགྲོ་བ་མིའི་ནང་གི་གཤིས་རྒྱུད་དང་འབྲེལ་བའི་བཟང་པོའི་རིན་ཐང་དེ་དག་ང་ཚོའི་སེམས་ཚོར་དང་འབྲེལ་བ་ཡོད་སྟབས་བློའི་རྣམ་གཞག་དང་བྱེད་ལས་སྐོར་གོ་རྟོགས་སྤེལ་ཐུབ་པ་དགོས་རྒྱུ་ཧ་ཅང་གལ་ཆེན་པོ་རེད།ཅེས་དང་། དེ་བཞིན་མང་ཚོགས་ནས་་བྱམས་བརྩེ་ཉམས་ལེན་དང་། འགྲོ་བ་མི་གཅིག་གྱུར་གྱི་འདུ་ཤེས་འཛིན་དགོས་པའི་འབོད་སྐུལ་ཡང་གནང་ཡོད།
སེམས་ཀྱི་ཞི་བདེ་ཡོང་ཁུངས་ངོ་མ་ནི་བྱམས་བརྩེ་དང་སྙིང་རྗེ་ཡིན། བྱམས་བརྩེ་ནི་རང་དང་སེམས་ཐག་ཉེ་པོ་ཡོད་པ་ཁོ་ནར་མིན་པར་འགྲོ་བ་མི་རིགས་སྤྱི་དང་། ལྷག་པར་སོ་སོའི་དགྲ་བོ་ཡིན་ནའང་བྱམས་བརྩེའི་བློ་སྐྱེད་དགོས་པ་ནི་འགྲོ་བ་མིས་བྱེད་ཐུབ་པ་ཞིག་ཡིན་སྐོར་བཀའ་སློབ་སྩལ། །
