ཕྱི་ལོ་ ༢༠༡༧ ཟླ་ ༩ ཚེས་ ༨ རེས་གཟའ་པ་སངས།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨིན་ཡུལ་ England དང་། ཇར་མན་ནི། Germany ཨེ་ཊ་ལི། Italy ལ་ཏི་ལྦི་ཡ་ Latvia བཅས་ཡུ་རོབ་རྒྱལ་ཁབ་བཞིའི་ནང་རླབས་ཆེན་གྱི་མཛད་འཕྲིན་བསྐྱང་ཆེད་ཕྱི་ལོ་ ༢༠༡༧ ཟླ་ ༩ ཚེས་ ༨ ཉིན་གྱི་ཉིན་གུང་ཆུ་ཚོད་ ༡༢ ཡོལ་ཙམ་ཐོག་བཞུགས་སྒར་ཕོ་བྲང་ནས་སྐུ་འཁོར་ལྷན་རྒྱས་ཆིབས་འགྲོ་བརྒྱུད་གྷ་གྷལ་གནམ་ཐང་དང་། དེ་ནས་མཁའ་ལམ་བརྒྱུད་ལྡི་ལིར་ཆིབས་སྒྱུར་བསྐྱངས་ཡོད། སྐབས་དེར་ཕེབས་ལམ་དུ་བོད་མི་གཙོ་བོར་གྱུར་བའི་དད་ལྡན་སེར་སྐྱ་མང་ཚོགས་ཀྱིས་ལག་ཏུ་དཀར་གཙང་མཇལ་དར་དང་བདུག་སྤོས་སོགས་ཐོགས་ཏེ་ཕེབས་སྐྱེལ་ཞུས་ཡོད།
དེ་ཡང་མཛད་འཆར་ལྟར་ན། ཕྱི་ཚེས་ ༡༠ ཉིན། འཁྲུག་རྩོད་ནང་ཚུད་པའི་བྱིས་པ་སྲུང་སྐྱོབ་ཚོགས་པ། Children in Crossfire ཞེས་པས་ཇི་ལྟར་སྔོན་ནས་གསོལ་བ་བཏབ་པ་ལྟར་བྱང་ཕྱོགས་ཨ་ཡིར་ལེན་ཌིའི་རྒྱལ་ས་ལོན་ཌོན་ཌེ་རེ་ Londonderry ཞེས་པར་བྱམས་རྩེའི་ཉམས་ལེན་ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་བསྩལ་རྒྱུ་དང་། ཕྱི་ཚེས་ ༡༣ ཉིན་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་འཇར་མན་གྲོང་ཁྱེར་ཕེ་རེངྐ་པོཌ་བོད་ཁང་ནས་ཇི་ལྟར་གསོལ་འདེབས་ཞུས་དོན་ལྟར་ཇའོ་རན་རྡི་ཧལ་ཚོམས་ཆེན་དུ་ཐུན་མོང་གིས་སྤྱོད་པའི་གོ་ལའི་སྤྱོད་བཟང་ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་སྩལ་རྒྱུ་མ་ཟད། ཕྱི་ཚེས་ ༡༤ ཉིན་གྲོང་ཁྱེར་དེ་གའི་ཚོོམས་ཆེན་དེ་རང་དུ་ཉིན་གཅིག་རིང་ནུབ་ཕྱོགས་ཀྱི་ཚན་རིག་དང་ནང་པའི་ལྟ་ཚུལ་ཞེས་པའི་བརྗོད་གཞིའི་ཐོག་བགྲོ་གླེང་ལྷན་ཞུགས་མཛད་རྗེས་ཕྱི་ཚེས་ ༡༥ ཉིན་ཨི་ཊ་ལིའི་ནང་ཆིབས་སྒྱུར་བསྐྱངས་ཏེ་ཕྱི་ཚེས་ ༡༦ ཉིན་གྱི་སྔ་དྲོ་གྲོང་ཁྱེར་སི་སི་ལི་མངའ་སྡེའི་ནང་གི་གནའ་བོའི་ཟློས་གར་འཁྲབ་སྟོན་ཁང་གྲགས་ཅན་ཊཱོར་མི་ནཱ་ཞེས་པ་དེར་ཞི་བདེའི་སྐོར་བཀའ་སློབ་སྩལ་རྒྱུ།
དེ་བཞིན་ཕྱི་ཚེས་ ༡༧ ཉིན་བྱམས་བརྩེའི་ཀུན་སློང་གཞི་རྩར་འཛིན་པའི་ལུས་ངག་གི་སྤྱོད་ཚུལ་བསྟེན་ཕྱོགས་དང་། རྟེན་ཅིང་འབྲེལ་བར་འབྱུང་བའི་རྣམ་གཞག་སྐོར་མང་ཚོགས་བཀའ་སློབ་དང་། ཕྱི་ཚེས་ ༡༨ ཉིན་གྱི་སྔ་དྲོ་ཨི་ཊ་ལིའི་སི་སེ་ལའེ་མངའ་སྡེའི་རྒྱལ་ས་ Palermo ཞེས་པར་ཤེས་ཡོན་ལ་སྤྲོ་སྣང་ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་ཡིན་འདུག
གཞན་ཡང་ཕྱི་ཚེས་ ༡༩ ཉིན་རྒྱབ་ཨི་ཊ་ལིའི་སྒྱུ་རྩལ་རིག་གནས་ཕུལ་བྱུང་དར་ས་ཡུ་རོབ་ཙམ་མ་ཟད། འཛམ་གླིང་ཁྱོན་དུ་ཧ་ཅང་གྲགས་ཆེ་བ་གྲོང་ཁྱེར་ཕོ་ལོ་རེན་སི་ ཞེས་པས་གོ་སྒྲིག་ཞུས་དོན་ལྟར་ཤེས་ཡོན་སློབ་གསོ་བརྒྱུད་ཞི་བདེ་གོང་སྤེལ་ཞེས་པའི་བརྗོད་གཞིའི་ཐོག་བཀའ་སློབ་སྩལ་གནང་མཛད་རྒྱུ་དང་། གྲོང་ཁྱེར་དེ་ནི་ཨི་ཊ་ལིའི་ཊ་སི་ཀ་ནི་ Tuscany མངའ་སྡེའི་རྒྱལ་ས་ཡིན་འདུག
དེ་བཞིན་ཕྱི་ཚེས་ ༢༠ དང་ ༢༡ བཅས་ཉིན་གྲངས་གཉིས་རིང་ཨི་ཊ་ལིའི་ཊ་སི་ཀ་ནི་མངའ་སྡེའི་ཕེ་སཱ གྲོང་ཁྱེར་དུ་པི་ས་གཙུག་ལག་སློབ་གཉེར་ཁང་དང་བླ་མ་ཙོང་ཁ་པའི་ཆོས་ཚོགས་གཉིས་ཀྱིས་གསོལ་འདེབས་གོ་སྒྲིག་ཞུས་དོན་ལྟར་པི་ས་ཚོགས་ཁང་དུ་ནང་པའི་ཚན་རིག་དང་དེང་རབས་ཚན་རིག་ལས་ནང་པའི་ལྟ་གྲུབ་དང་ཚན་རིག དབང་རྩའི་ཚན་རིག ཚད་རྡུལ་དངོས་ཁམས་རིག་པ། ནུབ་ཕྱོགས་ལྟ་གྲུབ་བཅས་ཀྱི་ཚོགས་འདུར་དབུ་བཞུགས་མཛད་རྒྱུ་ཡིན་འདུག
དེ་བཞིན་ཕྱི་ཚེས་ ༢༣ དང་ ༢༤ བཅས་ཉིན་གྲངས་གཉིས་རིང་ལ་ཏི་ཝི་ཡའི་རྒྱལ་ས་རི་གྷ་ནང་དུ་སི་ཁོན་ཊོ་ཚོགས་ཁང་དུ་སློབ་དཔོན་ཀ་མ་ལ་ཤི་ལས་མཛད་པའི་སྒོམ་རིམ་བར་པ་དང་། རྗེ་ཙོང་ཁ་པ་ཆེན་པོས་མཛད་པའི་ལམ་རིམ་བསྡུས་དོན་གྱི་བཀའ་ཆོས་སྩལ་རྒྱུ་མ་ཟད།ཕྱི་ཚེས་ ༢༥ ས་གནས་དེ་རང་དུ་རྒྱལ་མཚམས་མེད་པའི་མཐུན་སྒྲིལ་ཞེས་པའི་བརྗོད་གཞིའི་ཐོག་བཀའ་སློབ་སྩལ་རྗེས་ཕྱི་ཚེས་ ༢༧ ཉིན་རྒྱ་གར་གྱི་རྒྱལ་ས་ལྡི་ལིར་ཆིབས་ཞལ་བསྒྱུར་རྒྱུ་ཡིན་འདུག་པ་བཅས།།
