༢༠༡༧ ཟླ་ ༩ ཚེས་ ༤ རེས་གཟའ་ཟླ་བ།

༄༅། །ཕྱི་ལོ་ ༢༠༡༧ ཟླ་ ༩ ཚེས་ ༢ ཉིན་འཛམ་གླིང་ཞི་བདེའི་དེད་དཔོན་ཆེན་པོ། ཁམས་གསུམ་ཆོས་ཀྱི་རྒྱལ་པོ་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་གིས་བོད་འབངས་ཡོངས་ལ་མང་གཙོའི་ལམ་བཟང་གསོལ་སྩལ་བཀའ་དྲིན་བསྐྱངས་ཏེ་ལོ་ངོ་ ༥༧ འཁོར་བའི་གཞུང་འབྲེལ་དུས་ཆེན་མཛད་སྒོ་ལྡི་ལི་བོད་སྒར་བསམ་ཡས་གླིང་དུ་སྲུང་བརྩི་གཟབ་རྒྱས་ཞུས་འདུག

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་ལྡི་ལི་བོད་སྒར་བསམ་ཡས་གླིང་དང་། ལ་དྭགས་བྷུཏ་བྷི་ཧར། དེ་བཞིན་ལྡི་ལི་ཁུལ་དུ་ཡོད་པའི་གཞུང་དང་གཞུང་འབྲེལ་མིན་པའི་ལས་ཁུངས་ཁག་དང་། ཚོགས་སྡེ་ཁག་གི་ལས་བྱེད། སློབ་ཕྲུག སེར་སྐྱ་མི་མང་སོགས་བསམ་ཡས་གླིང་བོད་ཁྱིམ་ཉིན་སློབ་མདུན་ཐང་དུ་འདུ་འཛོམས་ཀྱིས་བསངས་གསོལ་བཏང་བ་དང་ཆབས་ཅིག་ལྷ་རྒྱལ་འཐེན། དེ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ་སློབ་གྲྭའི་ཚོགས་ཁང་ནས་སྤོས་སྣེ་སྔུན་བསུས་ཏེ་གདན་ཞུས་ཀྱིས་བཞུགས་ཁྲིར་འཁོད་བསྟུན།

སྐུ་མགྲོན་གཙོ་བོ་ལྡི་ལི་སྐུ་ཚབ་དོན་གཅོད་བཀའ་ཟུར་འབྲོང་ཆུང་དངོས་གྲུབ་རྡོ་རྗེ་མཆོག་གིས་གཙོས་སྐུ་མགྲོན་རྣམ་པས་རིམ་བཞིན་སྐུ་པར་མཐོང་གྲོལ་རིན་པོ་ཆེར་རྟེན་འབྱུང་མཇལ་དར་སྒྲོན་འབུལ་དང་ཆབས་ཅིག་སློབ་ཕྲུག་རྣམས་ནས་འཕགས་བོད་གཉིས་ཀྱི་རྒྱལ་གླུ་དང་མང་གཙོའི་གླུ་དབྱངས་བཏང་གྲུབ་མཚམས་སྐུ་མགྲོན་གཙོ་བོ་ལྡི་ལི་སྐུ་ཚབ་དོན་གཅོད་མཆོག་གིས་མང་གཙོའི་དུས་ཆེན་ཐོག་བཀའ་ཤག་གི་ཡོངས་ཁྱབ་གསུང་འཕྲིན་སྒྲོགས་སྦྱང་དང་ལྷན་བོད་སྒར་བསམ་ཡས་གླིང་དུ་ཡུལ་ཁྲིམས་དང་འགལ་བའི་ཨར་ལས་གསར་རྒྱག་དང་། སྦག་ཁང་དང་ཆང་ཁང་། དེ་བཞིན་མི་ཚོང་རྒྱག་མཁན་རྣམས་ནས་བོད་མི་སྤྱི་ཡོངས་ལ་མིང་ཤས་ངན་པ་བཟོ་བཞིན་པར་བརྟེན་དེ་དག་མཚམས་འཇོག་དགོས་སྐོར་སོགས་ཀྱི་གསུང་བཤད་གནང་གྲུབ་མཚམས་ Chandni Chowk ཁུལ་གྱི་གྲོས་ཚོགས་འཐུས་མི་ཟུར་པ་སྐུ་ཞབས་པར་ལཱ་དི་སིངྒ་ས་ཧཱ་ནེ་ Parlad Singh Sawhney མཆོག་དང་གྲོས་ཚོགས་འཐུས་མི་སྐུ་ཞབས་སུ་མཱན་གུབ་ཏ་  Suman Gupta མཆོག SHO, Timarpur བཅས་ནས་དུས་ཆེན་དང་འབྲེལ་བའི་གསུང་བཤད་གནང་། 

དེ་ནས་ས་གནས་བོད་ཁྱིམ་ཉིན་སློབ་ཀྱི་སློབ་ཕྲུག་དང་ལ་དྭགས་བྷུཏ་བྷི་ཧར་མི་མང་ནས་གཞས་སྣ་ཁག་འཁྲབ་སྟོན་ཞུས། དེ་རྗེས་བསམ་ཡས་གླིང་གི་བརྒྱ་དཔོན་དཀར་རྟེན་ཚེ་རིང་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ་ཡོད་པ་བཅས།།