ཕྱི་ལོ་ ༢༠༡༧ ཟླ་ ༩ ཚེས་ ༣༠ རེས་གཟའ་སྤེན་པ།
༄༅། །ཕྱི་ལོ་ ༢༠༡༧ ཟླ་ ༩ ཚེས་ ༢༣ རེས་གཟའ་སྤེན་པ་ཉིན་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་དུས་བཞི་པའི་ལས་ཉིན་ལྔ་པའི་སྐབས། དཔལ་ལྡན་སྲིད་སྐྱོང་མཆོག་གིས་བཙན་བྱོལ་བོད་མི་རྣམས་ནས་རྒྱ་གར་གྱི་མི་སེར་ཐོབ་ཐང་ལེན་པར་ཕན་གནོད་ཇི་ཡོད་སྐོར་གསལ་བཤད་གནང་དོན། བོད་ཀྱི་ཡུལ་མི་དང་བོད་མི་སྐྱབས་བཅོལ་དབར་དབྱེ་བ་ཕྱེ་དགོས་སྟབས། རྒྱ་གར་དང་། ཨ་རི། ཡུ་རོབ་བཅས་ཀྱི་མི་སེར་བླང་བ་ཡིན་ནའང་བོད་ཀྱི་ཡུལ་མི་རང་འཇགས་གནས་ཀྱི་ཡོད་པར་བརྟེན། བོད་ཀྱི་ཡུལ་མི་ཡིན་པའི་དབང་གིས་དཔྱ་ཁྲལ་ལག་དེབ་ཡོད་པ་དང་འོས་འཕེན་ཆོག་པ། གྲོས་ཚོགས་འཐུས་མི་དང་། བཀའ་བློན། སྲིད་སྐྱོང་བཅས་བཞེངས་ཆོག་གི་ཡོད། གང་ཡིན་ཞེ་ན་ལུང་པ་གཞན་གྱི་མི་སེར་ཞུ་ཆོག་པ་བཅའ་ཁྲིམས་ནང་འཁོད་ཡོད།
ཐུག་ས་དེ་སྐྱབས་བཅོལ་བོད་མི་ཟེར་ནའང་རེད། བོད་མི་སྐྱབས་བཅོལ་བ་ཟེར་ནའང་རེད་དེར་ཐུག་ཡོད། བཅའ་ཁྲིམས་དོན་ཚན་དྲུག་པ་ནང་། ས་གནས་ཀྱི་ཡུལ་ཁྲིམས་འཁྱེར་དགོས་ཞེས་ཧ་ཅང་གསལ་པོ་འཁོད་ཡོད། ས་གནས་གང་དུ་ཡོད་ནའང་ས་གནས་དེའི་ཡུལ་ཁྲིམས་འཁྱེར་དགོས། ལྷག་པར་རྒྱ་གར་ནི་ཧ་ཅང་གི་བཀའ་དྲིན་ཆེན་པོ་ཡིན་སྟབས། རྒྱ་གར་གཞུང་གིས་བཀོད་ཁྱབ་གང་གཏང་བ་ཡིན་ནའང་འཁྱེར་དགོས་རྒྱུ་ང་ཚོ་ཚང་མའི་འགན་རེད། བཅའ་ཁྲིམས་ནང་ཧ་ཅང་གསལ་པོ་ཡོད་པ་མ་ཟད། ང་ཚོ་རྒྱ་གར་ནང་བཞུགས་ཡོད་པར་བརྟེན། རྒྱ་གར་གཞུང་གིས་བཀོད་ཁྱབ་གང་ཕེབས་ཡིན་ནའང་འཁྱེར་དགོས་ཀྱི་ཡོད།
ད་རེས་རྒྱ་གར་གཞུང་གི་འབྲེལ་ཡོད་ལས་ཁུངས་ཞིག་ནས་བཀོད་ཁྱབ་ཕེབས་པ་དེ་གཞུང་འབྲེལ་ཁྲིམས་ཡིག་ཆགས་ཡོད། ཐུག་ས་དེ་གཞིས་ཆགས་ཁག་གི་ས་ཆ་དེ་དག་རྒྱ་གར་གཞུང་གིས་གནང་བའི་ས་ཆ་རེད། ས་ཆའི་བདག་དབང་ཡོངས་རྫོགས་རྒྱ་གར་གཞུང་ལ་མ་གཏོགས་གཞན་སུ་ལའང་མེད། བོད་མིའི་སྒྲིག་འཛུགས་ལའང་མེད། དེར་བརྟེན་རྒྱ་གར་གཞུང་གིས་གནང་བའི་ས་ཆ་དེ་དག་ལ་རྒྱ་གར་གཞུང་གི་ཐོག་མ་ཉིད་ནས་དམིགས་ཡུལ་ཞིག་ཡོད།
བོད་མིའི་སྒྲིག་འཛུགས་ནས་གང་ཞུས་ཡོད་རེད། ཅེ་ན། བོད་ནས་སྐྱབས་བཅོལ་དུ་སླེབས་པའི་བོད་མིའི་ཆེད་ས་ཆ་དགོས་ཀྱི་འདུག་མཐུན་རྐྱེན་གནང་རོགས་ཞེས་ཞུས་ཡོད་པར་བརྟེན། ཐེངས་འདིའི་བཀོད་ཁྱབ་ནང་ས་ཆ་དང་འབྲེལ་བའི་ཐོག་ནས་བོད་མིའི་གཞིས་ཆགས་ཁང་ནང་དང་སྐྱབས་བཅོལ་བའི་ཐོབ་ཐང་དེ་དག་ལེན་ཆོག་གི་མེད་ཟེར་དུས་རྒྱ་གར་གཞུང་གིས་བཀོད་ཁྱབ་གཞིར་བཟུང་སྐྱབས་བཅོལ་བོད་མིར་གནང་བའི་ས་ཆ་དེ་དག་ལ་དམིགས་ཡུལ་གཞིར་བཟུང་ཐོབ་ཐང་མེད་པ་ཆགས་ཀྱི་རེད།
དྲི་བ་གཉིས་པ་ནི། བོད་མི་ཞིག་གིས་རྒྱ་གར་མི་སེར་བླངས་རྗེས་གང་དུས་འགྲོ་དགོས་པ་དང་གང་དུ་སྡོད་དགོས་ཟེར་གྱི་ཡོད་རེད། ཕྱོགས་གཅིག་ནས་གང་ཟག་སོ་སོའི་དགོངས་པ་བཞེས་དགོས་ཀྱི་རེད། དང་པོ་རང་ནས་རྒྱ་གར་མི་སེར་བྱེད་པའི་སྐབས་མི་སེར་བྱེད་དགོས་དོན་གང་ཡིན་པ། འཚོ་བ་གང་འདྲ་བྱེད་ནས་བསྐྱལ་གྱི་ཡིན་པ་དེ་དག་ཚང་མ་དང་པོ་རང་ནས་དགོངས་པ་བཞེས་དགོས། ད་རེས་ཞུས་པ་ཙམ་མིན་པར་དེ་སྔ་ནས་བཀའ་ཤག་གིས་གསལ་པོ་གང་ཞུས་ཡོད་བརྗོད་ན། ད་ཆ་རྒྱ་གར་མི་སེར་ཞུ་མཁན་ཉུང་ཤས་ཡིན་སྟབས། གནས་དོན་གླེང་སློང་ཡོང་གི་མེད། མ་འོངས་པར་མང་དུ་ཕྱིན་ན། བཀའ་ཤག་ནས་ཀྱང་དེའི་ཐོག་དགོངས་པ་བཞེས་དགོས་པ་ཆགས་ཀྱི་རེད། ཅེས་ཞུས་ཡོད།
དེར་བརྟེན་ད་རེས་བཀའ་ཤག་ནས་རྒྱ་གར་གཞུང་གིས་བཀོད་ཁྱབ་དེ་འདྲ་ཞིག་བཏང་ཡོད་པ་དེ་མི་མང་ནས་ངེས་པར་དུ་མཁྱེན་རྟོགས་ཡོད་པ་བཟོ་དགོས་རེད་ཅེས་བརྗོད་དགོས་དོན་ནི། བཅའ་ཁྲིམས་དོན་ཚན་དྲུག་པའི་དགོངས་དོན་ང་ཚོའི་ཡུལ་ཁྲིམས་འཁྱེར་བའི་ཐོག་ནས་ས་ཆ་དང་མཐུན་རྐྱེན་རྒྱ་གར་གཞུང་ནས་གནང་བ་ཡིན་སྟབས། རྒྱ་གར་གཞུང་ནས་བཀོད་ཁྱབ་གནང་བ་དེར་ལག་བསྟར་བྱེད་དགོས་ཟེར་རྒྱུ་དེ་རེད། ཁ་གསལ་པོ་ཡོང་བའི་ཕྱིར་ཞུ་ན་འདི་དང་འབྲེལ་བའི་ཐོག་ནས་མགོ་རྙོག་པོ་ཡོད་དམ་ཞེ་ན་ཡོད་རེད། རྒྱ་གར་མི་སེར་ཡིན་པའི་ཧི་མ་ལ་ཡའི་རི་རྒྱུད་ཀྱི་མི་ཁ་ཤས་དགོན་སྡེ་ཁག་དང་སློབ་གྲྭ་ཁག་ནང་ཡོད་པ་དེ་དག་གང་འདྲ་རེད་ཅེ་ན། ཁོང་རྣམ་པ་ཤེས་ཡོན་བསྟི་གནས་ཁང་ནང་ཡོད། ཁོང་རྣམ་པ་རྒྱ་གར་མི་སེར་ཡིན་ཞེས་ཕེབས་པ་མ་གཏོགས་སྐྱབས་བཅོལ་བ་ཡིན་ཟེར་ནས་ཕེབས་མེད། བོད་པའི་སློབ་གྲྭ་ཁག་ཏུ་ཡིན་ནའང་ཧི་མ་ལ་ཡའི་རི་རྒྱུད་ནས་ཡིན་པ་དེ་དག་རྒྱ་གར་མི་སེར་རང་གི་ཐོག་ནས་འཛུལ་གྱི་ཡོད་རེད། དེ་ལ་དཔགས་པའི་མཐུན་རྐྱེན་ཡོད།
དེ་སྔ་ཞུས་ཟིན་པ་ལྟར། གལ་ཏེ་རྒྱ་གར་མི་སེར་ཞུ་མཁན་མང་དུ་ཕྱིན་ན། བཀའ་ཤག་ནས་རང་བཞིན་གྱི་དེའི་སྟེང་དགོངས་པ་བཞེས་དགོས་ནས་ཕྱག་ལས་ལག་བསྟར་གང་གནང་དགོས་མིན་ཁ་གསལ་དུ་འགྲོ་དགོས་པ་ཆགས་ཀྱི་ཡོད། ད་ལྟ་གནས་ཚུལ་གློ་བུར་དུ་ལངས་དགོས་པའི་རྐྱེན་ནི། བཀའ་ཤག་གི་ལངས་ཕྱོགས་ཧ་ཅང་གསལ་པོ་རེད། རྒྱ་གར་མི་སེར་ཞུ་དང་མ་ཞུ་བཅའ་ཁྲིམས་ཀྱི་ཐོབ་ཐང་རེད། ཕྱི་ལོ་ ༡༩༥༠ ནས་ ༡༩༨༧ བར་རྒྱ་གར་ནང་སྐྱེས་པ་རྣམས་རྒྱ་གར་མི་སེར་བྱེད་ཆོག་གི་རེད་ཅེས་པ་གཅིག་པུ་མ་རེད། རྒྱ་གར་མི་སེར་རེད། ཅེས་ཁྲིམས་ནང་བཀོད་ཡོད་པ་དེ་ལ་ང་ཚོས་བྱེད་ཆོག་གི་མ་རེད། ཅེས་བཀའ་ཤག་ནས་བརྗོད་ཐུབ་མི་ཐུབ་པ་མ་ཟད། དེ་ལྟར་བརྗོད་ན་ཁྲིམས་འགལ་རེད། ཁྲིམས་ཐོག་ནས་ཐོབ་ཐང་ཡོད་ཅེས་པ་དེ་ལ་ཆོག་གི་མ་རེད་ཅེས་ཇི་ལྟར་བརྗོད་དགོས། འོན་ཀྱང་བྱེད་དགོས་རེད་ཅེས་ཞུ་ཐུབ་ཀྱི་མ་རེད། གང་ཡིན་བརྗོད་ན། འདི་སྐྱབས་བཅོལ་བའི་སྒྲིག་འཛུགས་ཤིག་རེད། སྐྱབས་བཅོལ་སྒྲིག་འཛུགས་ཤིག་གིས་མི་སེར་བྱེད་བརྗོད་ཐུབ་ཐབས་མེད། འོན་ཀྱང་བཅའ་ཁྲིམས་ནང་མི་སེར་བྱེད་ཆོག་པའི་ཐོབ་ཐང་ཡོད། ང་ཚོ་བཙན་བྱོལ་སྒྲིག་འཛུགས་འདིའི་ཆབ་སྲིད་ངོ་བོ་ཐོག་ནས་དགོས་མཁོ་ཞིག་ཡོད། ཁྱབ་བསྒྲགས་ཧ་ཅང་མང་པོ་བྱས་པར་བརྟེན་སྦིར་སྒྲ་གྲགས་ནས་རྐྱེན་ལངས་པ་རེད།
