ཕྱི་ལོ་ ༢༠༡༧ ཟླ་ ༩ ཚེས་ ༢༠ རེས་གཟའ་ལྷག་པ།
༄༅། །ཉེ་ལམ་མེཀ་སི་ཀོ་ནང་ས་ཡོམ་གྱི་གོད་ཆག་འོག་མི་གྲངས་ ༢༠༠ ཙམ་འདས་གྲོངས་སུ་གྱུར་བ་མ་ཟད། མི་མང་པོ་ཞིག་ལ་རྨས་སྐྱོན་ཚབས་ཆེ་ཕོག་པ་དང་། སྡོད་ཁང་སོགས་རྩ་གཏོར་ཕྱིན་པའི་བློ་ཕམ་གྱི་གནས་ཚུལ་བྱུང་བར་ཕྱི་ལོ་ ༢༠༡༧ ཟླ་ ༩ ཚེས་ ༡༩ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་གདུང་སེམས་མཉམ་སྐྱེ་མཚོན་སླད་སེམས་གསོའི་འཕྲིན་ཡིག་ཞིག་ཕུལ་བའི་ནང་འཁོད་དོན། ངས་མེཀ་སི་ཀོར་རང་འབྱུང་ས་ཡོམ་གྱི་གོད་ཆག་ཕོག་པར་གདུང་སེམས་མཉམ་སྐྱེ་ཞུ་རྒྱུ་དང་། ཕྲན་རང་ཉེ་འཆར་མེཀ་སི་ཀོ་རྒྱལ་ཁབ་ཏུ་བཅར་ཏེ་དེ་གའི་མི་མང་དང་ལྷན་མཇལ་འཕྲད་བྱེད་རྒྱུའི་གོ་སྐབས་ཐོབ་བྱུང། ཐེངས་འདིའི་ས་ཡོམ་གྱི་གོད་ཆག་འོག་དཀའ་ངལ་མྱོང་བཞིན་པའི་མི་མང་ཡོངས་ལ་ངས་མྱ་ངན་གུས་འདུད་དང་ལྷན་སེམས་གསོ་ཞུ་རྒྱུ་མ་ཟད། དཀའ་ངལ་ལས་མྱུར་དུ་གྲོལ་ཐུབ་པའི་རེ་བ་ཞུ་བཞིན་ཡོད། ཅེས་དང་།
གཞན་ཡང་དཔལ་ལྡན་སྲིད་སྐྱོང་མཆོག་གིས་མེཀ་སི་ཀོ་མི་མང་གི་ལྷག་བསམ་དང་དཀའ་ངལ་གདོང་ལེན་བྱེད་ཐུབ་པའི་ནུས་པ། ལྷག་པར་མེཀ་སི་ཀོ་གཞུང་མང་གཉིས་ནས་མཉམ་རུབ་ཐོག་འབྱུང་བའི་གོད་ཆག་འོག་དཀའ་སྡུག་ཚད་མེད་མྱོང་བཞིན་པའི་དཀའ་ངལ་ལས་སྐྱོབ་ཐུབ་ཐབས་བྱེད་བཞིན་པར་ཡི་རངས་བསྔགས་བརྗོད་གནང་ཡོད།
ཉེ་ལམ་ཕྱི་ཟླ་ ༩ མགོ་སྟོད་དུ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་མེཀ་སི་ཀོ་རྒྱལ་ཁབ་ཏུ་འཚམས་གཟིགས་ཕེབས་པ་དང་འབྲེལ་བྱང་ཨ་རིའི་ས་ཁུལ་ཚོགས་འདུར་བཅར་ཡོད་པ་དང་། མེཀ་སི་ཀོ་ཁུལ་དུ་ཡོད་པའི་གཙུག་ལག་སློབ་གཉེར་མང་དག་ཞིག་ནང་བོད་དོན་ཐོག་གསུང་བཤད་གནང་ཡོད། སྐབས་དེར་སྲིད་སྐྱོང་མ་ཆོག་གིས་ཁུལ་དེའི་གསར་འགོད་པ་རྣམས་དང་ལྷན་བཅར་འདྲི་ཡང་གནང་ཡོད།།
