༢༠༡༧ ཟླ་ ༩ ཚེས་ ༡༨ རེས་གཟའ་ཟླ་བ།
༄༅། །ཨིན་ཡུལ་རྒྱལ་ས་ལོན་ཌོན་ནས་འདོན་སྤེལ་བྱེད་བཞིན་པའི་རྒྱལ་སྤྱིའི་ཁྱོན་དུ་ཧ་ཅང་གྲགས་ཆེ་བའི་ཨིན་སྐད་གསར་ཤོག་སྡི་སྒར་ཌི་ཡེན་ The Guardian ཞེས་པའི་གསར་ལས་ཁང་གིས། ཕྱི་ལོ་ ༢༠༡༧ ཟླ་ ༨ ཚེས་ ༨ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་རྒྱ་ནག་གཞུང་ནས་བོད་ཀྱི་ཁོར་ཡུག་ཐོག་ལག་བསྟར་བྱེད་བཞིན་པའི་སྲིད་བྱུས་ལ་སྐྱོན་བརྗོད་ཀྱི་ཆེད་རྩོམ་ཞིག་རྩོམ་སྒྲིག་པའི་གླེང་སྟེགས་སུ་སྤེལ་བར། ཨིན་ཡུལ་རྒྱ་ནག་གཞུང་ཚབ་ལས་ཁུངས་ཀྱི་མགྲིན་ཚབ་པ་ཁྲན་རོང་ Zen Rong ཟེར་བས་ཕྱི་ལོ་ ༢༠༡༧ ཟླ་ ༩ ཚེས་ ༣ ཉིན་དཔལ་ལྡན་སྲིད་སྐྱོང་མཆོག་གི་ཆེད་རྩོམ་ལ་དགག་ལན་ཞིག་སྤེལ་འདུག
དེ་ཡང་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གི་ཆེད་རྩོམ་ནང་རྒྱ་ནག་གཞུང་གིས་བོད་དུ་འཛུགས་སྐྲུན་ཡར་རྒྱས་ལས་གཞི་འདྲ་མིན་ལ་སྙེད་ནས་རང་བྱུང་གཏེར་ཁ་གང་བྱུང་སྔོག་འདོན་བྱས་པ་དང་། གྲོང་གསེབ་ཁག་གཅིག་གྲོང་ཁྱེར་དུ་འགྱུར་རྒྱུའི་ལས་གཞི་ཟེར་བའི་སྲིད་བྱུས་འོག་རྒྱ་རིགས་མི་འབོར་ཧ་ཅང་མང་པོ་བོད་ནང་སྤོ་བཤུད་བྱེད་བཞིན་པ། དེ་བཞིན་བོད་ཀྱི་གཙང་པོ་ཆེ་ཁག་ལ་ཆུ་རགས་གང་བྱུང་བརྒྱབ་པ་སོགས་ལ་ཚོད་འཛིན་མ་བྱས་ཚེ་བོད་ཙམ་མ་ཟད། འཛམ་གླིང་སྤྱི་དང་ལྷག་པར་ཨེ་ཤི་ཡའི་ཁྱོན་དུ་ཁོར་ཡུག་དང་འབྲེལ་བའི་དཀའ་ངལ་ཧ་ཅང་འཕྲད་ངེས་ཡིན་སྐོར་ཉེན་བརྡ་བཏང་ཡོད།
སྲིད་སྐྱོང་མཆོག་གིས་ས་བབ་ཀྱི་ཆ་ནས་གོ་ལའི་ཚ་དྲོད་འཕེལ་རྒྱས་ལ་ཤུགས་རྐྱེན་སྤྲོད་མཁན་གཙོ་བོ་ཞིག་མཐོ་སྒང་བོད་ཀྱི་ཁོར་ཡུག་ཆགས་ཡོད་སྟབས། རྒྱ་ནག་གཞུང་གིས་བོད་ནང་རང་བྱུང་ཁོར་ཡུག་ལ་བག་ཚ་བ་མེད་པར་རང་གི་འདོད་དབང་ཁོ་ནའི་རྗེས་སུ་འབྲང་བཞིན་པ་དེ་དག་ལ་མནོ་བསམ་ཞིབ་མོར་བཏང་ནས་འཁྱོག་པོ་ཡོ་བསྲང་བྱེད་དགོས་པའི་རེ་འདུན་བཏོན་འདུག
དེ་ཡང་རྩོམ་ཡིག་དེའི་ནང་། རྒྱ་ནག་གཞུང་གི་ཁོར་ཡུག་དང་འཛུགས་བསྐྲུན་གྱི་སྲིད་བྱུས་སྐྱོན་ཅན་དེ་དག་ལག་བསྟར་བྱས་པའི་རྐྱེན་གྱིས་རང་བྱུང་གཏེར་དངོས་ཀྱི་ཧ་ཅང་ཕྱུག་པའི་འཇིག་སླ་བའི་མཐོ་སྒང་བོད་དེ་རྒྱ་ནག་གི་གཏེར་ཁ་བསྔོག་འདོན་བྱེད་ཡུལ་གཙོ་བོ་ཞིག་དང་ཆུ་རགས་ཀྱི་ལས་གཞི་སྤེལ་ཡུལ་གཙོ་བོ་ཞིག་ཆགས་ཡོད།
བྱེད་བབ་དེ་དག་ལ་ཚོད་འཛིན་མ་བྱས་པར་མུ་མཐུད་ནས་ཕྱིན་པ་ཡིན་ན་ཨེ་ཤི་ཡའི་གཙང་པོའི་ས་ཁྲར་འགྱུར་བ་འགྲོ་རྒྱུ་དང་། གོ་ལ་སྤྱིའི་ཁོར་ཡུག་ལ་ཤུགས་རྐྱེན་ངན་པ་སྤྲད་ངེས་ཡིན་ཞིང་། ཤུགས་རྐྱེན་དེའི་འོག་ཨེ་ཤི་ཡ་ས་ཁུལ་གྱི་གནམ་གཤིས་ལ་འགྱུར་ལྡོག་ཆེན་པོ་ཡོང་རྒྱུ་ཙམ་མ་ཟད། མཐོ་སྒང་བོད་ཀྱི་ས་ཁུལ་དུ་ཚ་དྲོད་རྒྱས་བཞིན་པ་དེས་གོ་ལ་སྤྱིའི་གནམ་གཤིས་ལའང་ཤུགས་རྐྱེན་སྤྲད་རྒྱུ་ཡིན་ངེས་པ་དང་།
ཕྱི་ལོ་ ༢༠༡༦ ལོར་བོད་མངའ་རིས་ས་ཁུལ་ཨ་རུའི་ནང་གངས་རུད་ཤུགས་ཆེ་བརྒྱབ་པ་མ་ཟད། ཨ་མདོའི་ས་ཁུལ་ཁག་གཅིག་ནང་འདམ་ཉིལ་ནས་འདམ་རུད་ཀྱི་གོད་ཆག་བྱུང་བ། དེ་བཞིན་ཁམས་ཀྱི་ས་ཁུལ་དུའང་ཆུ་རུད་གོད་ཆག་སོགས་བྱུང་བ་དེ་དག་གཙོ་བོ་གོ་ལའི་གནམ་གཤིས་འགྱུར་ལྡོག་ཧ་ཅང་འགྲོ་བཞིན་པ་དེའི་ཤུགས་རྐྱེན་འོག་བྱུང་བ་ཞིག་ཡིན། དེར་བརྟེན་ལོ་དེ་ནི་མཐོ་སྒང་བོད་ཀྱི་རང་བྱུང་ཁོར་ཡུག་ལ་གོད་ཆག་ཚབས་ཆེ་ཕོག་པའི་ལོ་ཞིག་ཆགས་ཡོད།
ད་ལྟའི་བོད་མཐོ་སྒང་གི་ཁོར་ཡུག་གནས་སྟངས་ལ་ཉམས་ཞིབ་བྱེད་སྐབས་རང་བྱུང་གོད་ཆག་མུ་མཐུད་ཡོང་འགྱུར་མངོན་དུ་ཕྱོགས་ཡོད། དེར་བརྟེན་རྒྱ་ནག་གཞུང་གིས་བོད་མཐོ་སྒང་གི་རང་བྱུང་ཁོར་ཡུག་ལ་འཕྲད་བཞིན་པའི་དཀའ་ངལ་དེ་དག་གཞི་ལ་བཞག་སྟེ་གྲོང་ཁྱེར་འཛུགས་སྐྲུན་ལས་གཞི་ཟེར་བ་སྤེལ་སྐབས་ངེས་པར་དུ་ཉེན་ཁ་དེ་དག་ལས་གཡོལ་ཐབས་བྱེད་དགོས་པ་དང་།
ལྷག་པར་ཧ་ཅང་འཇིག་སླ་བའི་བོད་ཀྱི་ཁོར་ཡུག་གནས་སྟངས་ཐོག་རྒྱ་ནག་གཞུང་གིས་དམིག་བསལ་སེམས་ཁུར་བསླང་ནས་བོད་ཀྱི་གྲོང་གསེབ་ས་ཁུལ་ཁག་གཅིག་གྲོང་ཁྱེར་ཅན་དུ་འགྱུར་རྒྱུ་ཟེར་བའི་ལས་གཞི་མྱུར་པོའི་ཐོག་སྤེལ་བཞིན་པ་དེ་དག་ལ་ཚོད་འཛིན་ངེས་པར་དུ་བྱེད་དགོས་པ་མ་ཟད། བོད་ནང་དུ་རྒྱ་རིགས་མི་འབོར་ཕོན་ཆེ་སྤོ་བཤུད་བྱ་རྒྱུ་མཚམས་འཇོག་བྱེད་དགོས།
ཕྱོགས་མཚུངས་བོད་ཀྱི་གནས་རི་རྩ་ཆེ་ཁག་ལ་བག་ཚ་སྤུ་ཙམ་མེད་པར་གཏེར་ཁ་ཚོད་མེད་སྔོག་འདོན་བྱེད་བཞིན་པ་དེ་དག་འཕྲལ་མར་མཚམས་འཇོག་དང་སྦྲགས། བོད་ཀྱི་གཙང་པོ་ཁག་ལ་ཆུ་རགས་རྒྱག་རྒྱུའི་ལས་གཞི་དེ་དག་ཀྱང་འཕྲལ་དུ་མཚམས་འཇོག་བྱེད་དགོས་པ་འཁོད།
སྲིད་སྐྱོང་མཆོག་གི་རྩོམ་ཡིག་ནང་། རྒྱལ་སྤྱིའི་སྤྱི་ཚོགས་ཀྱིས་བོད་ཀྱི་ཁོར་ཡུག་སྲུང་སྐྱོབ་བྱ་རྒྱུ་འདི་བོད་ཙམ་མ་ཟད། རྒྱལ་སྤྱིའི་གནད་དོན་ཞིག་ལ་གཟིགས་ནས་ལངས་ཕྱོགས་བརྟན་པོ་ཞིག་འཛིན་ཏེ་རྒྱ་ནག་གཞུང་ལ་གནོན་ཤུགས་སྤྲད་པ་བརྒྱུད་བོད་ནང་ལག་བསྟར་བྱེད་བཞིན་པའི་རྒྱ་ནག་གཞུང་གི་ཁོར་ཡུག་སྲིད་བྱུས་ནོར་འཛོལ་ཅན་དེ་དག་འཕྲལ་མར་མཚམས་འཇོག་ཡོང་ཐབས་སླད་ལས་འགུལ་ཤུགས་ཆེ་ཙམ་སྤེལ་དགོས་པའི་འབོད་སྐུལ་ཡང་ཞུས་འདུག
ཡང་རྩོམ་ཡིག་དེའི་ནང་། བོད་དུ་རྒྱ་ནག་གཞུང་གིས་ཁོར་ཡུག་སྲིད་བྱུས་ནོར་འཛོལ་ཅན་དེ་དག་ལག་བསྟར་བྱས་པའི་ཚོང་ཁེ་ངོ་མ་ཐོབ་མཁན་ནི་རྒྱ་རིགས་ལས་བྱེད་པ་ཚོ་དང་རྒྱ་ནག་གི་ཚོང་ལས་ཆེ་ཁག་སོགས་ཡིན། ཞེས་གསལ།
དཔལ་ལྡན་སྲིད་སྐྱོང་མཆོག་གི་རྩོམ་ཡིག་དེར་ཨིན་ཡུལ་ནང་གི་རྒྱ་ནག་གཞུང་ཚབ་ཁང་གི་མགྲིན་ཚབ་པ་ཁྲན་རོང་ཟེར་བ་ཁོ་པས་དགག་ལན་རྩོམ་ཡིག་གཅིག་སྤེལ་བ་དེའི་ནང་དུ་། སྲིད་སྐྱོང་བློ་བཟང་སེངྒེའི་རྩོམ་ཡིག་དེས་གཞན་མགོ་སྒོར་སླུ་བྲིད་བྱེད་བཞིན་ཡོད་པ་དང་། བོད་ནང་འཛུགས་སྐྲུན་ལས་གཞི་དེ་དག་གཙོ་བོ་ས་གནས་བོད་རིགས་ཚོར་ཁེ་ཕན་ཐོབ་བཞིན་ཡོད་པ།
མི་འབོར་ཆ་ནས་ཀྱང་བོད་རིགས་མང་བ་ཡོད་པ། དེར་བརྟེན་རྒྱ་ནག་གཞུང་གི་འཛུགས་སྐྲུན་ལས་གཞིའི་འོག་བོད་རིགས་མང་ཚོགས་ཀྱི་དཔལ་འབྱོར་ཡར་རྒྱས་ཐོག་ནས་བོད་མི་རྣམས་ཀྱིས་རང་གི་ཐུན་མིན་ཆོས་དང་རིག་གཞུང་སྲུང་སྐྱོབ་བྱེད་ཐུབ་པའི་ཁོར་ཡུག་ཧ་ཅང་བཟང་པོ་ཞིག་སྐྲུན་ཐུབ་ཡོད་སྐོར་འཁོད་དོན། ཉེ་ལམ་བོད་རང་སྐྱོང་ལྗོངས་ཀྱིས། ཡར་རྒྱས་དང་སྲུང་སྐྱོབ་དོ་མཉམ་པའི་སྲིད་བྱུས་ལག་བསྟར་བྱ་རྒྱུ། ཞེས་པའི་ལམ་སྟོན་འོག་བོད་ནང་ཡར་རྒྱས་ཀྱི་ལས་གཞི་སྤེལ་མུར་སྲུང་སྐྱོབ་ཀྱི་སྲིད་བྱུས་ལག་བསྟར་བྱེད་བཞིན་ཡོད།
ཕྱི་ལོ་ ༢༠༡༦ ལོ་མཇུག་ཙམ་བར་བོད་ནང་ས་གནས་ ༤༧ རང་བྱུང་སྲུང་སྐྱོབ་ཀྱི་ས་ཁུལ་དུ་གཏན་འབེབས་བྱས་པ་མ་ཟད། ས་གནས་དེ་དག་བརྒྱ་ཆར་བགོ་ཚེ་བོད་རང་སྐྱོང་ལྗོངས་ཁྱོན་ཡོངས་ཀྱི་ས་ཆའི་བརྒྱ་ཆ་ ༣༥ ལོན་པ་དང་། དེའི་ཁར་བོད་རང་སྐྱོང་ལྗོངས་ཀྱི་ས་ཁུལ་གཞན་ ༢༢ རང་བྱུང་སྲུང་སྐྱོབ་ཀྱིས་ས་ཁུལ་དུ་གཏན་འབེབས་བྱས་འབྲས་སུ་ཕྱི་ལོ་ ༢༠༡༦ ཁོར་ཡུག་སྐོར་ལོ་འཁོར་སྙན་ཐོའི་ནང་ས་གནས་དེ་དག་གི་སྣོད་བཅུད་རྟེན་འབྲེལ་ལ་དོ་ཕོག་རྩ་བ་ནས་མེད་པར་གནས་སྟངས་ཧ་ཅང་ཡག་པོ་ཡོད། ཅེས་དགག་ལན་དེའི་ནང་གསལ།
དེ་བཞིན་རྒྱ་ནག་གཞུང་གིས་ཕྱི་ལོ་ ༢༠༠༨ ནས་ཕྱི་ལོ་ ༢༠༣༠ རིང་བོད་མཐོ་སྒང་གི་ཁོར་ཡུག་སྲུག་སྲུབ་སྐྱོབ་ལས་གཞིར་དམིགས་ནས་རྒྱ་སྒོར་ཐེར་འབུམ་ ༡༠ ཙམ་འགྲོ་གྲོན་གཏང་འཆར་ཡོད་པ་དང་། དེ་བཞིན་མཚོ་སྔོན་དང་བོད་མཐོ་སྒང་ས་ཁུལ་དུ་གོ་ལའི་གནམ་གཤིས་ཀྱི་ཤུགས་རྐྱེན་གང་ཐུབ་ཆུང་དུ་གཏང་རྒྱུ་དང་། རྒྱུན་གནས་ཐུབ་པའི་ཡར་འཛུགས་སྐྲུན་ཡར་རྒྱས་ལས་གཞི་སྤེལ་རྒྱུ་ཡིན། ཞེས་ཁྲན་རོང་གི་རྩོམ་ཡིག་ནང་གསལ།།
