༢༠༡༧ ཟླ་ ༨ ཚེས་ ༤ རེས་གཟའ་ཟླ་བ།
༄༅། །ཨ་རིའི་གྲོང་ཁྱེར་ལོ་སི་ཨེན་ཇི་ལེ་སིར་ Los Angeles རྟེན་གཞི་བྱས་པའི་ལོ་ཡ་ལ་མེ་རི་མོནྜ་མཐོ་སློབ་ Loyola Marymount University ཀྱི་དགེ་ལས་སློབ་ཕྲུག་རྣམས་ལ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བཙན་བྱོལ་བོད་མིའི་མང་གཙོའི་འཕེལ་རིམ་སྐོར་གསུང་བཤད་གནང་འདུག
དེ་ཡང་ཕྱི་ལོ་ ༢༠༡༧ ཟླ་ ༩ ཚེས་ ༡ ཉིན་དཔལ་ལྡན་སྲིད་སྐྱོང་མཆོག་གིས་མཐོ་སློབ་ཀྱི་དགེ་ལས་སློབ་ཕྲུག་དང་། མཁས་དབང་བཅས་ཁྱོན་མི་གྲངས་བརྒྱ་ཕྲག་བརྒལ་བར་བོད་ཀྱི་ཆོས་དང་ཆབ་སྲིད་སྐོར་གསུང་བཤད་གནང་སྐབས། ༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་བཙན་བྱོལ་བ་རྣམས་ལ་ཕྱི་ལོ་ ༡༩༦༠ ལོར་མང་གཙོའི་ལམ་བཟང་གསོལ་སྩལ་མཛད་པ་དེ་ནི་བོད་མི་ཙམ་མ་ཟད། འཛམ་གླིང་སྤྱི་ལ་ཞབས་འདེགས་བསྒྲུབས་པ་ཞིག་ཆགས་ཡོད་སྐོར་དང་། བོད་ནང་དུ་རྒྱ་ནག་གཞུང་གིས་དམ་བསྒྲགས་ཅན་གྱི་སྲིད་བྱུས་ལག་བསྟར་བྱས་དང་བྱེད་མུས་ལ་བརྟེན་བོད་ཀྱི་ཆོས་དང་རིག་གཞུང་། སྐད་ཡིག ཁོར་ཡུག་གཙོ་བོར་གྱུར་བའི་གཞི་རྩའི་བོད་མིའི་འགྲོ་བ་མིའི་ཐོབ་ཐང་སོགས་ལ་བརྩི་མེད་རྡོག་རོལ་གཏོང་བཞིན་པའི་གནས་སྟངས་འོག བོད་མི་རྣམས་ད་ཆ་འུ་ཐུག་ཐབས་ཟད་ཀྱི་གནས་སུ་གྱར་ནས་ཕྱི་ལོ་ ༢༠༠༩ ལོ་ནས་བཟུང་བོད་ནང་དུ་ད་བར་བོད་མི་ ༡༤༩ ཡིས་རང་ལུས་མེར་སྲེག་བཏང་ཡོད་པ། བོད་མི་བཙན་བྱོལ་བར་མཚོན་ན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོན་འོག་གཉིས་སྨན་དབུ་མའི་ལམ་གྱི་སྲིད་བྱུས་ཐོག་ནས་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་གི་གནས་བབ་ཐོབ་ཐབས་བྱེད་བཞིན་ཡོད་སྐོར། དེ་བཞིན་བོད་མིའི་སྒྲིག་འཛུགས་ངོས་ནས་རང་སྲེག་ལས་འགུལ་ལས་གཞན་པའི་ཐབས་ལམ་གཞན་ཐོག་འབད་བརྩོན་གནང་ཆེད་འབོད་སྐུལ་རབ་དང་རིམ་པ་ཞུས་དང་ཞུ་མུས་ཡིན་སྐོར་སོགས་དང་།
ལྷག་པར་དཔལ་ལྡན་སྲིད་སྐྱོང་མཆོག་གིས་བོད་ཀྱི་ཐུན་མིན་ཆོས་དང་རིག་གཞུང་རྩ་མེད་དུ་གཏོང་བཞིན་པའི་སྐོར་གསུང་དོན། རྒྱ་ནག་གཞུང་གིས་ད་བར་བོད་ཀྱི་དགོན་སྡེ་བརྒྱ་ཆ་ ༩༨ རྩ་མེད་བཏང་ཡོད་པ་མ་ཟད། དགེ་བཙུན་བརྒྱ་ཆ་ ༩༩. ༥ བཙན་དབང་འོག་སྐྱ་སར་ཕབ་ཡོད། དེར་བརྟེན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཙན་བྱོལ་དུ་༸ཞབས་སོར་འཁོད་མཚམས་རིམ་བཞིན་བོད་བརྒྱུད་ནང་བསྟན་གྱི་བསྟན་པའི་མེ་རོ་གསོ་གནང་མཛད་འབྲས་སུ་ད་ཆ་བོད་མི་བཙན་བྱོལ་བའི་སྤྱི་ཚོགས་ཆུང་ཆུང་འདིའི་ནང་སངས་རྒྱས་ཀྱི་བསྟན་པ་དར་ཞིང་རྒྱས་པའི་གནས་སྟངས་ཆགས་ཡོད།
དེ་བཞིན་ཁོར་ཡུག་ཐོག་ནས་བརྗོད་ན་བོད་དེ་འཛམ་གླིང་གི་སྣེ་མོ་གསུམ་པར་གྲགས་ཤིང་ཡོད། བོད་ཀྱི་གཙང་པོ་སོགས་ལ་ཁྱིམ་མཚེས་རྒྱལ་ཁབ་ཀྱི་མོ་འབོར་ཐེར་འབུམ་ ༡.༤ རྟེན་ནས་འཚོ་བཞིན་ཡོད་པ་དང་། དེང་སྐབས་གོ་ལའི་གནམ་གཤིས་འགྱུར་ལྡོག་སྤྱི་དང་ལྷག་པར་རྒྱ་ནག་གཞུང་གིས་ཡར་རྒྱས་ལ་སྙད་ནས་གཏེར་ཁ་ཚོད་མེད་སྔོག་འདོན་བྱས་དང་བྱེད་མུས་ཡིན་པ་དང་། བོད་ཀྱི་གཙང་པོའི་ཐོག་ཆུ་རགས་བརྒྱབ་པ་སོགས་ལ་བརྟེན་ནས་ད་ཆ་མི་འབོར་ཐེར་འབུམ་མང་པོའི་འཚོ་གནས་ལ་དངོས་སུ་དོ་ཕོག་ཧ་ཅང་གཏོང་བཞིན་ཡོད་པ་མ་ཟད། ཨ་རིའི་བར་སྣང་འཕྲུལ་འཁོར་བརྟག་ཞིབ་ཁང་ NASA གིས་སྙན་ཐོའི་ནང་ཕྱི་ལོ་ ༢༡༠༠ ལོར་བོད་ནང་གི་འཁྱགས་རོམ་ཡོངས་རྫོགས་གཞུར་རྒྱུ་ཡིན་སྐོར་གསལ། ཞེས་སོགས་ཀྱི་གསུང་བཤད་གནང་རྗེས་དྲི་བ་ཁག་ལ་ལན་འདེབས་གནང་ཡོད་པ་བཅས།།
