༢༠༡༧ ཟླ་ ༩ ཚེས་ ༥ རེས་གཟའ་མིག་དམར།
༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༧ ཟླ་ ༩ ཚེས་ ༢ ཉིན་སུད་སི་དང་ལིག་ཏེན་སིཊེན་བོད་རིགས་མི་མང་སྒྲིག་འཛུགས་ཀྱིས་སུད་སི་གྲོང་ཁྱེར་ཛུ་རིག་ནང་བཙན་བྱོལ་བོད་མིའི་མང་གཙོ་དབུ་བརྙེས་ཏེ་ལོ་ངོ་ ༥༧ འཁོར་བའི་དུས་ཆེན་མཛད་སྒོ་སྲུང་བརྩི་གཟབ་རྒྱས་ཞུས་གནང་ཡོད་འདུག
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༡ ཐོག་སྐུ་མགྲོན་གཙོ་བོ་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་དབུས་རི་ཀོན་ཆོས་འཁོར་དགོན་གྱི་མཁན་རིན་པོ་ཆེ་མཆོག་དང་། ཡུ་རོབ་ཕྱོགས་བཞུགས་སྤྱི་འཐུས་ཟམ་མདོ་བྱམས་པ་ཚེ་རིང་ལགས། སྤྱི་འཐུས་ཐུབ་བསྟན་དབང་ཆེན་ལགས། སུད་སི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས། ས་གནས་མི་མང་ཚོགས་གཙོ་བསྟན་འཛིན་སྙིང་པོ་ལགས་ཀྱིས་གཙོས་ས་གནས་མི་མང་བཅས་ལྷན་འཛོམས་ཀྱིས་ཐོག་མར་སྐུ་མགྲོན་རྣམ་པས་༸རྒྱལ་བའི་སྐུ་དཔར་མཐོང་གྲོལ་རིན་པོ་ཆེ་དུང་རྒྱ་སྤོས་སྣེས་སྔོན་བསུས་རྗེས།
༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་འགེགས་མཚན་མ་མཐའ་དག་མྱུར་དུ་ཞི་ནས་༸སྐུ་ཚེ་བསྐལ་བརྒྱའི་བར་དུ་བརྟན་པ་དང་། ཐུགས་ཀྱི་བཞེད་དགོངས་མཐའ་དག་འབད་མེད་ལྷུན་གྱི་འགྲུབ་པའི་རྟེན་འབྲེལ་ཆེད་དཔལ་ལྡན་ཚོགས་གཙོ་མཆོག་གིས་དབུས་སྐུ་མགྲོན་རྣམ་པ་དང་། ས་གནས་མི་མང་ཚོགས་གཙོ་བཅས་ནས་མཎྜལ་རྟེན་གསུམ་འདེགས་འབུལ་ཞུས་རྗེས་བོད་ཀྱི་རྒྱལ་གླུ་དང་མང་གཙོའི་གསར་གཞས་བཏང་བ་དང་ལྷན། བོད་རྒྱལ་ཁབ་དང་མི་རིགས་ཀྱི་རྩ་དོན་ཆེད་རང་གི་གཅེས་པའི་ལུས་སྲོག་བློས་བཏང་གནང་མཁན་རྒྱལ་གཅེས་ཕོ་མོ་རྣམས་ལ་རྗེས་དྲན་གུས་འདུད་ཞུས།
དེ་ནས་མཛད་སྒོའི་སྐུ་མགྲོན་རྣམ་པས་གསུང་བཤད་གནང་གྲུབ་མཚམས་སྐུ་མགྲོན་གཙོ་བོ་མཆོག་གིས་ཐོག་མར་བོད་མི་མང་སྤྱི་འཐུས་ལྷན་ཁང་གི་གསུང་བཤད་སྒྲོགས་སྦྱང་གནང་བ་དང་འབྲེལ་གསུང་བཤད་གནང་དོན། དེ་རིང་ང་ཚོ་བཟང་པོའི་ཞོར་ལ་ཇ་ཆང་། ཞེས་པ་ལྟར་ང་ཚོ་འདི་འདྲའི་ལྷན་འཛོམས་བྱུང་བའི་དུས་ཚོད་འདི་ནི་གཙོ་ཆེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་པ་འཕྲིན་ལས་དང་། ཁོང་གི་ཐུགས་རྗེའི་བཀའ་དྲིན་དང་འབྲེལ་བ་ཡོད་པ་ཞིག་དང་། དེའི་ཐོག་ནས་ང་ཚོ་དེ་རིང་འདིར་ལྷན་འཛོམས་བྱུང་བ་ཞིག་ཡིན།
ང་ཚོ་ནང་པ་སངས་རྒྱས་པའི་ཆོས་ཀྱི་ཐོག་ནས་ཞུས་པ་ཡིན་ན། ལས་རྒྱུ་འབྲས་ཐོག་ནས་བོད་མི་རིགས་དེ་ལས་དང་བསོད་ནམས་ཐོག་ནས་འབྲེལ་བ་ཆགས་ཀྱི་ཡོད་པ་ཞིག་ཡིན་སྟབས། ཐོག་མར་སུད་སི་བོད་རིགས་མང་ཚོགས་དང་། འབྲེལ་ཡོད་འགན་ཁུར་མཁན་ཚང་མར་དེ་རིང་ང་ཚོ་འདིར་དམིགས་བསལ་གྱི་ལྷན་འཛོམས་གནང་ཐུབ་པ་ཞིག་དང་། ལྷག་པར་མང་གཙོའི་དུས་ཆེན་གཞུང་མང་གཉིས་ཀྱི་ཐོག་ནས་ལོ་རྒྱུས་ཀྱི་རང་བཞིན་ལྡན་པའི་ཐོག་ནས་སྲུང་བརྩི་བྱེད་ཐུབ་པ་དེར་ངས་བོད་མི་མང་སྤྱི་འཐུས་ལྷན་ཚོགས་དང་། ང་རང་སྒེར་གྱི་ངོས་ནས་དམིགས་བསལ་ཐུགས་རྗེ་ཆེ་ཞུ་འདོད་བྱུང་། ཞེས་སོགས་ཀྱི་གསུང་བཤད་གནང་གྲུབ་མཚམས་ས་གནས་མང་ཚོགས་ཀྱི་དྲི་བར་ལན་འདེབས་གནང་ཡོད་འདུག་པ་བཅས།།
