![His Holiness the Dalai Lama speaking to groups from Mumbai and the University of California San Diego at his residence in Dharmasla, HP, India on September 6, 2017. Photo by Tenzin Choejor/OHHDL His Holiness the Dalai Lama speaking to groups from Mumbai and the University of California San Diego at his residence in Dharmasla, HP, India on September 6, 2017. Photo by Tenzin Choejor/OHHDL](https://www.dalailama.com/assets/news-articles/3017-09-06-Dharamsala-N01_SA90948.jpg)
![](https://154.35.136.131/wp-content/uploads/2017/09/3017-09-06-Dharamsala-N02_A7R0602.jpg)
སྐབས་དེར་སློབ་ཕྲུག་གཅིག་གིས་ཁོར་ཡུག་སྲུང་སྐྱོབ་སྐོར་གྱི་དྲི་བར་བཀའ་ལན་སྩོལ་སྐབས། གོ་ལའི་གནམ་གཤིས་འགྱུར་ལྡོག་མྱུར་པོའི་ཐོག་འགྲོ་བཞིན་པ་དེ་དག་འགོག་ཐབས་བྱ་རྒྱུས་མཚོན་ཁོར་ཡུག་སྲུང་སྐྱོབ་དགོས་གལ་ཆེན་པོ་ཡིན་པ་མཁྱེན་བཞིན་ཡོད་ཀྱང་མགོན་པོ་གང་ཉིད་ཁོར་ཡུག་ཐོག་མཁས་པ་མིན་སྟབས། འདི་བྱེད་འདི་མིན་ཞུ་ཚོད་དཀའ་ཡང་། གང་ཉིད་མཆོག་གི་ཉིན་རེའི་འཚོ་བའི་ནང་༸སྐུ་ཁྲུས་གསོལ་སྐབས་དེང་དུས་རྒྱས་སྤྲོས་ཀྱི་འཚོ་བའི་སྤྱི་ཚོགས་འགྲོ་ལུགས་ལྟར་ཆུ་གཞོང་ནང་ནམ་ཡང་མ་བཞུགས་པར་ཆུ་བསྲི་ཚགས་གང་ཐུབ་མཛད་བཞིན་ཡོད་པ་དང་། ཕྱོགས་མཚུངས་གཟིམ་ཆུང་ནས་ཕྱིར་ནམ་ཕེབས་སྐབས་གློག་བསད་པ་སོགས་གང་ཐུབ་ཁོར་ཡུག་ཐོག་དགོངས་བཞེས་མཛད་བཞིན་པ་མ་ཟད། དེ་སྔ་རྒྱ་གར་ཁོར་ཡུག་སྲུང་སྐྱོབ་པ་སྐུ་ཞབས་སུནྡར་ལལ་བྷ་ཧུ་གུ་ན་ Sunderlal Bahuguna མཆོག་ལ་༸གོང་ས་མཆོག་གིས་ཁས་ལེན་མཛད་པ་ལྟར་ཧི་མ་ལ་ཡི་རི་རྒྱུད་དུ་ཤིང་སྣ་གང་མང་འདེབས་འཛུགས་བྱ་རྒྱུ་ཙམ་མ་ཟད། ཤིང་སྣ་ཡོད་པ་རྣམས་སྲུང་སྐྱོབ་བྱ་རྒྱུས་མཚོན་ཁོར་ཡུག་སྲུང་སྐྱོབ་ཐོག་ཐུགས་བརྩོན་མཛད་བཞིན་ཡོད་སྐོར་བཀའ་ལན་མཛད།
ཕྱོགས་མཚུངས་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་བཀའ་སློབ་སྩོལ་སྐབས། དེང་དུས་ཤེས་ཡོན་ལམ་ལུགས་ནང་ཆོས་ལུགས་ལ་མ་བརྟེན་པའི་བཟང་སྤྱོད་སློབ་ཚན་ནང་འཇོག་ཐབས་བྱེད་བཞིན་པ་མ་ཟད། ལྷག་པར་ཉེ་ལམ་ཊ་ཊ་སྤྱི་ཚོགས་ཚན་རིག་བསྟི་གནས་ཁང་ Tata Institute of Social Sciences དང་ཨ་རི་ཨེ་མོ་རི་གཙུག་ལག་སློབ་ཁང་ Emory University གཉིས་ནས་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་བསླབ་གཞི་སློབ་ཚན་དུ་བཞག་ཡོད་སྐོར་བཀའ་ལན་སྩལ།
གཞན་ཡང་སྐབས་དེར་སློབ་ཕྲུག་གཅིག་གིས་བྱམས་བརྩེའི་གོ་དོན་སྐོར་གྱི་དྲི་བར་༸གོང་ས་མཆོག་གིས། ང་ཚོ་ཚང་མའི་རྒྱུད་ལ་གཞན་གྱི་བདེ་སྡུག་ལ་སེམས་ཁུར་གྱི་ཚོར་བ་ལྷན་སྐྱེས་སུ་ཡོད། འོན་ཀྱང་ང་ཚོས་ཚོར་བ་དེ་རང་གི་ནང་མི་སྤུན་མཆེད་དང་གྲོགས་པོ་གྲོགས་མོ་ཙམ་ལ་མ་གཏོགས་ཁྱབ་མ་ཐུབ་ཀྱང་། རྒྱུ་མཚན་དང་། ཆོས་རབ་ཏུ་རྣམ་འབྱེད་ཀྱི་ཤེས་རབ་ཐོག་ནས་ང་ཚོས་ཚོར་བ་དེ་རིམ་བཞིན་རྒྱ་སྐྱེད་དེ་སེམས་ཅན་གཞན་ཙམ་མ་ཟད། མཐར་རང་གི་དགྲ་བོ་ཚུན་ལའང་སྙོབ་ཐུབ་རྒྱུ་ཡོད་པ་དང་། དེ་འདྲ་བྱུང་ཐུབ་ཚེ་དེ་ལྟ་བུའི་བྱམས་བརྩེའི་ཚོར་བ་དེ་ཡང་དག་པའི་བྱམས་བརྩེ་ཡིན་སྐོར་བཀའ་ལན་སྩལ།
གཞན་ཡང་༸གོང་ས་མཆོག་གིས་འགྲོ་བ་མིའི་ཐོབ་ཐང་གི་གནད་དོན་ནི་མིའི་རང་དབང་གི་གནད་དོན་ཙམ་མ་ཟད། དུད་འགྲོ་ལས་ཁྱད་པར་དུ་འཕགས་པའི་མིའི་རྣམ་དཔྱོད་ཀྱི་རྩལ་གོང་མཐོར་གཏོང་རྒྱུའི་ཁོར་ཡུག་ཞིག་ལའང་གོ་དགོས་པ་དང་། རྒྱ་ནག་ལ་མཚོན་ན་རྒྱ་ནག་མི་འབོར་ཐེར་འབུམ་གཅིག་ལྷག་ཙམ་ཡོད་པ་རྣམས་ལ་དངོས་ཡོད་གནས་ཚུལ་ཤེས་རྒྱུའི་ཐོབ་ཐང་ཡོད་པ་ཙམ་མ་ཟད། དངོས་ཡོད་གནས་ཚུལ་ཤེས་པ་ཡིན་ན་བཟང་ངན་བླང་དོར་འབྱེད་རྒྱུའི་རྣམ་དཔྱོད་ཀྱི་བློ་གྲོས་ལྡན་ཡོད་སྟབས། རྒྱ་ནག་གཞུང་གིས་དམ་བསྒྲགས་ཅན་གྱི་སྲིད་བྱུས་དེ་ནི་བཟང་དཔྱོད་དང་འགལ་བའི་བྱ་སྤྱོད་ཅིག་ཡིན་ཞིང་། རྒྱ་ནག་ནང་དུ་དེ་སྔ་ཞེ་སྡང་གིས་རྒྱུད་རླམ་ནས་རིག་གནས་གསར་བརྗེ་ཟེར་བ་ལག་བསྟར་བྱས་ཡོད་ཀྱང་། ད་ཆ་བྱམས་བརྩེར་གཞི་བཅོལ་བའི་རིག་གནས་གསར་བརྗེ་ཞིག་ངེས་པར་དུ་ཡོང་དགོས་པའི་དུས་ལ་བབ་ཡོད་སྐོར་བཀའ་སློབ་སྩལ།
སླར་ཡང་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་དྲི་བ་ཞུས་པར་༸གོང་ས་མཆོག་གིས་གནའ་དུས་ཡིན་ན་མི་མང་པོ་ཞིག་ལ་བཟང་དཔྱོད་ཀྱི་བསླབ་བྱ་དེ་དག་ཆོས་ལ་བརྟེན་ནས་ཐོབ་བཞིན་ཡོད་ཀྱང་། ད་ཆ་ཆོས་དད་ཀྱི་བསམ་བློ་སྔ་མོ་ལས་ཉམས་རྒུད་ཕྱིན་ཡོད་སྟབས་ཆོས་དད་ལ་མ་བརྟེན་པར་ཚན་རིག་གི་བརྟག་དཔྱད་བྱས་པའི་གྲུབ་དོན་དང་། ཉམས་མྱོང་། དེ་བཞིན་མིའི་རྣམ་དཔྱོད་ལ་གཞི་བཞག་པའི་ཐོག་ནས་ཆོས་ལུགས་ལ་མ་བརྟེན་པའི་བཟང་དཔྱོད་གོང་མཐོར་གཏོང་རྒྱུ་ཧ་ཅང་གལ་ཆེན་པོ་ཆགས་ཡོད་སྐོར་བཀའ་ལན་སྩལ།
དེ་ཡང་ཐེངས་འདིར་མཐོ་སློབ་ཀྱི་དགེ་རྒན་དང་སློབ་ཕྲུག་སོགས་བཞུགས་སྒར་དུ་ཕེབས་དགོས་པའི་རྒྱུ་མཚན་ནི་ལོ་ལྟར་མཐོ་སློབ་ནང་ཤེས་ཡོན་བརྗེ་ལེན་གྱི་ལས་འཆར་ཞིག་ཡོད་པ་དེའི་འོག་ནས་ཕེབས་པ་ཞིག་ཡིན་འདུག །