༢༠༡༧ ཟླ་ ༨ ཚེས་ ༢༡ རེས་གཟའ་ཟླ་བ།
༄༅། །བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་ནང་དང་བླངས་འཕྲོད་བསྟེན་ཞབས་ཞུ་ཚོགས་པ་ཞིག་དབུ་འབྱེད་གནང་བ་མ་ཟད། རྒྱལ་ས་སྦེང་ལོར་ནང་དུ་མངའ་སྡེའི་འཕྲོད་བསྟེན་བློན་ཆེན་སྐུ་ཞབས་ཨར་རཱ་མེཤ་ཀུ་མར་ Shri R. Ramesh Kumar མཆོག་དང་མཇལ་འཕྲད་གནང་འདུག
དེ་ཡང་བཀའ་བློན་མཆོག་ཟླ་འདིའི་ཕྱི་ཚེས་ ༧ ནས་ ༡༠ བར་རྒྱ་གར་ལྷོ་ཕྱོགས་སྦེང་ལོར་དུ་གཞུང་འབྲེལ་ཕྱོགས་ཕེབས་སྐབས་མངའ་སྡེའི་འཕྲོད་བསྟེན་བློན་ཆེན་མཆོག་དང་མཇལ་འཕྲད་ཀྱིས་མངའ་སྡེའི་ནང་བོད་པའི་སྨན་ཁང་ཁག་གིས་བོད་མི་ཙམ་མ་ཟད། ས་གནས་རྒྱ་གར་ཡུལ་མི་ཚོ་ལའང་མཐུན་འགྱུར་ཇི་འདྲ་གནང་བཞིན་པའི་གནས་སྟངས་ངོ་སྤྲོད་ཞུས་པ་དང་སྦྲགས། ད་བར་མངའ་སྡེའི་གཞུང་མང་གཉིས་ནས་བཙན་བྱོལ་བོད་མི་རྣམས་ལ་མཐུན་འགྱུར་རོགས་རམ་རྒྱ་ཆེ་གནང་བར་ཐུགས་རྗེ་ཆེ་ཞུས་པ་དང་འབྲེལ། ད་ཡོད་བོད་མིའི་སྨན་ཁང་ཁག་གི་ནང་མཐུན་རྐྱེན་ཇེ་བཟང་དུ་གཏོང་ཆེད་རོགས་རམ་སྐྱབས་འཇུག་ཞུས་པར་བློན་ཆེན་མཆོག་གིས་ཀྱང་མཐུན་འགྱུར་ཇི་འོས་གནང་རྒྱུའི་ཁས་ལེན་ཡང་གནང་འདུག
གཞན་ཡང་བཀའ་བློན་མཆོག་གིས་སྦེང་ལོར་ཁུལ་གནས་སྡོད་སློབ་ཕྲུག་གཙོ་བོར་གྱུར་བའི་བོད་མི་རྣམས་ལ་བཀའ་ཤག་གི་སྲིད་བྱུས་སྤྱི་དང་ལྷག་པར་བོད་མིའི་འཕྲོད་བསྟེན་དང་འབྲེལ་བའི་སྲིད་བྱུས་སྐོར་ངོ་སྤྲོད་གནང་བ་མ་ཟད། ནད་པར་ལྟ་རྟོགས་གནང་མཁན་གྱི་དང་བླངས་འཕྲོད་བསྟེན་ཞབས་ཞུ་ཚོགས་པ། འཕྲོད་བསྟེན་གླེང་སྟེགས། Health Forum ཞེས་པའི་ཚོགས་མི་རྣམས་ཀྱིས་ད་བར་བོད་མིའི་འཕྲོད་བསྟེན་ཞབས་ཞུའི་ལས་དོན་ལ་ཡི་རངས་བསྔགས་བརྗོད་དང་ཆབས་ཅིག་ལེགས་སྐྱེས་ཕྱག་རྟགས་གནང་འདུག
ཕྱོགས་མཚུངས་བཀའ་བློན་མཆོག་གིས་དང་བླངས་འཕྲོད་བསྟེན་ཞབས་ཞུ་ཚོགས་པ་གསར་པ་ Volunteers for Patient Care ཞེས་པ་དབུ་འབྱེད་གནང་འདུག ཚོགས་པ་དེ་ནི་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ལམ་སྟོན་འོག་སྦེང་ལོར་ལྷོ་སྤྱི་ལས་ཁུངས་ཀྱི་མཐུན་འགྱུར་འོག་བཙུགས་པ་ཞིག་ཡིན་ཞིང་། ཚོགས་པ་དེའི་དམིགས་ཡུལ་གཙོ་བོ་ནི་བོད་པའི་སྤྱི་ཚོགས་ནང་ནད་གཞི་སྔོན་འགོག་སྐོར་གོ་རྟོགས་སྤེལ་རྒྱུ་དང་། ལྷག་པར་རྒྱ་གར་གྱི་གྲོང་ཁྱེར་ཆེ་ཁག་ནང་སྨན་བཅོས་ཆེད་ཕེབས་མཁན་བོད་མི་རྣམས་ལ་འཕྲད་བཞིན་པའི་དཀའ་ངལ་རིགས་སེལ་ཐབས་ཆེད་བཙུགས་པ་ཞིག་ཡིན་འདུག
ཚོགས་པ་དེའི་ཚོགས་མི་རྣམས་སྦེང་ལོར་དུ་སྨན་ཞབས་སོགས་ཀྱི་ཕྱག་ལས་དང་སློབ་སྦྱོང་གནང་མུས་ཡིན་པ་ཤ་སྟག་ཡིན་འདུག་པ་བཅས།།
