༢༠༡༧ ཟླ་ ༨ ཚེས་ ༢༥ རེས་གཟའ་པ་སངས།
༄༅། །ཕྱི་ལོ་ ༢༠༡༧ ཟླ་ ༨ ཚེས་ ༡༨ ནས་ ༢༠ བར་ཉིན་གྲངས་གསུམ་རིང་བོད་མིའི་མཉམ་འབྲེལ་ཁག་གི་འཕྲུལ་བཟོ་དང་འཕྲུལ་རྨོད་སྡེ་ཚན་ཡར་རྒྱས་གཏོང་ཕྱོགས་ཀྱི་བགྲོ་གླེང་ཚོགས་འདུའི་མཇུག་སྡོམ་མཛད་སྒོའི་ཐོག་སྐུ་མགྲོན་གཙོ་བོ་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་དང་། མཉམ་འབྲེལ་ཚོགས་གཙོ་སྤྱི་འཐུས་པདྨ་བདེ་ལེགས་ལགས། ནང་སྲིད་དྲུང་ཆེ་འཆི་མེད་རིག་འཛིན་ལགས། ཆོས་འཕེལ་ཐུབ་བསྟན་ལགས། རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ལྔའི་ས་གནས་འགོ་འཛིན་རྣམ་པ། མོན་གྷོ་ས་གནས་འཐུས་ཚོགས་ཀྱི་ཚོགས་གཙོ། དགོན་སྡེ་ཁག་གི་སྐུ་ཚབ། གཞུང་འབྲེལ་མིན་པའི་ཚོགས་པ་ཁག་གི་འགན་འཛིན། སྤྱི་མི་དང་བརྒྱ་དཔོན། བོད་མིའི་མཉམ་འབྲེལ་ཁག་བཅུ་གཉིས་ཀྱི་ཚོགས་གཙོ་དང་། མཉམ་དྲུང་། རྒྱུན་ལས་འཐུས་མི། འབྲེལ་ཡོད་ལས་བྱེད་སོགས་ཁྱོན་མི་གྲངས་ ༦༠ མཉམ་ཞུགས་གནང་ཡོད།
སྐབས་དེར་སྐུ་མགྲོན་གཙོ་བོ་ནང་སྲིད་བཀའ་བློན་མཆོག་གིས་ཐེངས་འདིར་ཟབ་སྦྱོང་སྐོང་ཚོགས་གནང་དགོས་པའི་དམིགས་ཡུལ་དང་འཆར་གཞི་གཙོ་བོ་གང་ཡིན་ཞིབ་ཕྲ་ངོ་སྤྲོད་གནང་བ་དང་ཆབས་ཅིག་བཙན་བྱོལ་བོད་མིའི་གཞིས་ཆགས་ཁག་གསར་འཛུགས་གནང་བ་ནས་བཟུང་ད་བར་མི་ལོ་ ༥༩ སོང་བའི་རིང་གཞིས་ཆགས་ཁག་གི་གནས་སྟངས་རིམ་པས་ཡར་རྒྱས་ཕྱིན་ཡོད་ཀྱང་། བོད་མིའི་མཉམ་འབྲེལ་ཁག་གི་འཕྲུལ་བཟོ་དང་འཕྲུལ་རྨོད་སྡེ་ཚན་སོགས་ཐོག་མའི་དམིགས་ཡུལ་བཞིན་ཡར་རྒྱས་ཐུབ་མེད་སྐོར་དང་། གནད་དོན་དེའི་ཐོག་འཆར་གཞི་ཚད་ལྡན་དུས་དང་མཐུན་པ་བཟོ་དགོས་རྒྱུ་གནད་འགག་ཆགས་ཡོད་སྐོར། དེ་བཞིན་གཞིས་ཆགས་སྲ་བརྟན་ལ་ཕན་པའི་ས་ཞིང་འདེབས་ལས་ཐོག་ལའང་ཤུགས་རྒྱག་དགོས་རྒྱུ་ཧ་ཅང་གལ་ཆེན་པོ་ཡིན་སྐོར་སོགས་ཀྱི་གསུང་བཤད་གནང་ཡོད།
དེ་ཡང་ཟབ་སྦྱོང་ཉིན་དང་པོའི་སྐབས་དེ་སྔ་ཕྱི་ལོ་ ༢༠༡༠ ལོར་སྦེལ་ཀོབ་བོད་མིའི་གཞིས་ཆགས་སུ་བོད་རྒྱལ་ཡོངས་གཞུང་མང་ཚོགས་ཆེན་དང་པོའི་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མཉམ་འབྲེལ་གྱི་འཕྲུལ་བཟོ་དང་འཕྲུལ་རྨོད་སྡེ་ཚན་གྱི་གནས་སྟངས་ཐོག་བཀའ་སློབ་སྩལ་བའི་བརྙན་འཕྲིན་ཡང་བསྟན་འདུག ཐེངས་འདིའི་ཚོགས་འདུའི་ཐོག་ཆེད་ལས་མི་སྣ་མགྲོན་འབོད་ཐོག་ཚོགས་བཅར་བ་ཕན་ཚུན་མཉམ་འབྲེལ་གྱི་འཕྲུལ་བཟོ་དང་འཕྲུལ་རྨོད་སྡེ་ཚན་དེ་དག་སྤྱི་ཚོགས་ཀྱི་དགོས་མཁོར་གཞིགས་པའི་གསར་གཏོད་ཀྱི་རྣམ་པའི་ཐོག་ནས་ཡར་རྒྱས་གཏོང་རྒྱུའི་ཐབས་ལམ་སྐོར་གོ་བསྡུར་ལྷུག་པོ་གནང་ཡོད་པ་མ་ཟད། ནང་སྲིད་ལས་ཁུངས་ནས་ཀྱང་འཕྲུལ་རྨོད་སྡེ་ཚན་དེ་ཚོའི་ནང་རིམ་བཞིན་ཉམས་ཞིབ་གནང་འཆར་ཡོད་འདུག
གཞན་ཡང་ཕྱི་ཚེས་ ༢༡ ཉིན་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་ནང་སྲིད་བཀའ་བློན་མཆོག་དབུ་བཞུགས་ཐོག་ནང་སྲིད་དྲུང་ཆེ་དང་། ཆོས་འཕེལ་ཐུབ་བསྟན་ལགས། དེ་བཞིན་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ལྔའི་ས་གནས་འགོ་འཛིན་རྣམ་པ་བཞུགས་མོལ་ཚོགས་འདུ་ཞིག་ཚོགས་ཡོད། སྐབས་དེར་ཐོག་མར་ཆོས་འཕེལ་ཐུབ་བསྟན་ལགས་ཀྱིས་འཚམས་འདྲིའི་གསུང་བཤད་གནང་རྗེས་ཕྱི་ཟླ་ ༧ ཚེས་ ༡༤ ཉིན་ས་གནས་འགོ་འཛིན་ལྷན་ཚོགས་སྐབས་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ ཞེས་པའི་དོན་ཚན་ཁག་གཅིག་དང་བཀའ་ཤག་གི་གཞི་ཆགས་ས་ཁང་སྒྲིག་གཞི་ལམ་སྟོན་དབར་གསལ་པོ་བཟོ་དགོས་པའི་གནས་སྟངས་ངོ་སྤྲོད་དང་། བཀའ་བློན་མཆོག་ནས་གཞིས་ཆགས་ཁག་གི་འཕྲུལ་བཟོ་དང་འཕྲུལ་རྨོད་སྡེ་ཚན་དེ་དག་ཉམས་རྒུད་ཕྱིན་ཡོད་སྐོར་༸གོང་ས་༸སྐྱབས་མགོན་ཆེན་པོ་མཆོག་ནས་དེ་སྔ་བཀའ་སློབ་ཕེབས་དོན་ལྟར་ད་ཆ་འཕྲུལ་བཟོ་དང་འཕྲུལ་རྨོད་སྡེ་ཚན་ཡར་རྒྱས་གཏོང་ཆེད་སྔར་ལྷག་འབད་བརྩོན་བྱ་རྒྱུའི་དུས་ལ་བབ་ཡོད་སྐོར་དང་། སྐབས་དང་དུས་ལ་ཆེད་ལས་མི་སྣ་མགྲོན་འབོད་ཞུས་ནས་ད་དུང་ཡར་རྒྱས་གཏོང་དགོས་པའི་ཐབས་ལམ་ཐོག་གོ་བསྡུར་སྦྱང་བཤད་གནང་གལ་ཆེ་སྐོར་སོགས་གསུངས།
དེ་བཞིན་ཆོས་འཕེལ་ཐུབ་བསྟན་ལགས་ནས་ས་གནས་འགོ་འཛིན་རྣམས་ཀྱིས་འབྲེལ་ཡོད་རྫོང་དཔོན་ལས་ཁུངས་སུ་ས་ཐོ་ལག་འཛིན་ RTC ཐོབ་ཆེད་མཚན་གཞུང་གང་མགྱོགས་འབུལ་དགོས་པ་དང་། ལས་དོན་མཇུག་སྐྱོང་ལྷོད་གཡེངས་མེད་པའི་ཐོག་གནང་དགོས་སྐོར་གསུང་རྗེས་ཐུགས་རྗེ་ཆེ་ཞུའི་གསུང་བཤད་གནང་། ཉིན་རྒྱབ་བཀའ་བློན་མཆོག་དང་། ནང་སྲིད་དྲུང་ཆེ། ཆོས་འཕེལ་ཐུབ་བསྟན་ལགས། ནང་སྲིད་ལས་ཁུངས་ཀྱི་དྲུང་གཞོན་དོན་གྲུབ་ཚེ་རིང་ལགས། དེ་བཞིན་ལྷོ་ཕྱོགས་བོད་མིའི་གཞིས་ཆགས་ཁག་ལྔའི་ས་གནས་འགོ་འཛིན་རྣམ་པ་ས་ཞིང་ཁག་ལ་གཟིགས་སྐོར་ཕེབས་ཡོད་པ་བཅས།།
