ངོས་རང་ཆུང་དུས་བོད་དུ་ཡོད་སྐབས་བོད་གཞུང་གི་ལམ་སྲོལ་རྙིང་པ་དེར་ཞན་ཆ་མང་པོ་ཡོད་པ་མཐོང་བྱུང་།  དབང་ཆ་ཤུགས་ཆེ་བ་མི་རེ་ཟུང་གི་ལག་ཏུ་ཡོད་པ་དེ་འདྲ་རེད།  གསར་འགྱུར་ལ་མཚོན་ན་ཀ་བློན་སྦུག་ནས་བོད་ཀྱི་མེ་ལོང་། ཞེས་པའི་གསར་ཤོག་གཅིག་མཚམས་རེ་བོད་ནང་འབྱོར་བ་མ་གཏོགས་བོད་ནང་གསར་ཤོག་གཅིག་ཀྱང་མེད།   ངོས་ལ་མཚོན་ན་གནས་ཚུལ་མང་ཆེ་བ་ནོར་གླིང་ཕོ་བྲང་ནང་གི་གད་པ་ཚོ་ནས་ཤེས་ཀྱི་འདུག

ཕྱི་ལོ་ ༡༩༥༠།༥༡ སྐབས་ནས་ངོས་ཀྱིས་བོད་ཀྱི་ཆོས་སྲིད་གཉིས་ཀྱི་འགན་འཁྱེར་བ་ཡིན།  སྐབས་དེར་ངོས་ཀྱིས་བསྐྱར་བཅོས་ལས་ཁུངས་གསར་འཛུགས་བྱས་པ་ཡིན།  འོན་ཀྱང་རྒྱ་ནག་གཞུང་གིས་རང་མོས་ལྟར་བསྐྱར་བཅོས་ལས་གཞིར་འགོག་རྐྱེན་བཟོས་སྟབས་ལམ་ལྷོངས་ལྡན་པ་ཞིག་བྱུང་ཐུབ་མེད།  དེ་ནས་ཕྱི་ལོ་ ༡༩༥༤ ལོར་ངོས་རང་པེ་ཅིང་དུ་ཕྱིན་པ་ཡིན།  ཕྱི་ལོ་ ༡༩༥༦ ལོར་རྒྱ་གར་དུ་འབྱོར་བ་རེད།  སྤྱིར་ཕྱི་ལོ་ ༡༩༥༤ ལོར་པཎྜི་ཏ་ནེ་རུ་མཆོག་དང་ཐོག་མར་མཇལ་འཕྲད་བྱུང་ཡང་ཕྱིས་སུ་ཕྱི་ལོ་ ༡༩༥༦ ལོར་ཁོང་དང་འདྲོག་འདྲིས་ཞུ་རྒྱུའི་དུས་ཚོད་བཟང་བ་བྱུང་།  དེ་ནས་ཕྱི་ལོ་ ༡༩༥༩ ལོར་ང་ཚོས་འཛམ་གླིང་མཉམ་འབྲེལ་རྒྱལ་ཚོགས་སུ་བོད་དོན་ཞུ་གཏུག་གི་ལས་འགུལ་སྤེལ་བ་རེད།  སྤྱིར་པཎྜི་ཏ་ནེ་རུ་མཆོག་གིས་ཞུ་གཏུག་མ་བྱེད་ན་ལེགས་ཚུལ་ལམ་སྟོན་གནང་ཡོད་ཀྱང་ང་ཚོས་ཞུ་གཏུག་བྱས་ཡོད། དེར་བརྟེན་ཕྱིས་སུ་ཁོང་དང་མཇལ་འཕྲད་སྐབས་གང་གསུང་ཡོང་བསམ་པའི་འཚེར་སྣང་ཕྲན་བུ་བྱུང་ཡང་སྟབས་ལེགས་པ་ཞིག་ལ་ཁོང་གིས་དེའི་སྐོར་གང་ཡང་གསུང་མ་བྱུང་།  དེ་ནི་བསམ་བློའི་རང་དབང་གི་མཉམ་མྱོང་ཐོག་མ་བྱུང་།

ངོས་རང་མང་གཙོའི་རིང་ལུགས་ལ་ཡིད་རང་བསྔགས་བརྗོད་ཞུ་མཁན་ཞིག་ཡིན་སྟབས་ལམ་ལུགས་དེ་ངེས་པར་དུ་ལག་བསྟར་ཡོང་རྒྱུར་ཆོད་སེམས་བརྟན་པོ་ཡོད།  དེར་བརྟེན་བོད་མི་བཙན་བྱོལ་བ་རྣམས་ཀྱིས་བཙན་བྱོལ་བའི་སྤྱི་ཚོགས་ཆུང་ཆུང་ཞིག་ལས་མེད་ཀྱང་མང་གཙོའི་འཕེལ་རིམ་ཐོག་ནས་བརྗོད་ན་ང་ཚོའི་ཁྱིམ་མཚེས་རྒྱ་ནག་སྟོབས་ཆེན་རྒྱལ་ཁབ་ལས་ང་ཚོ་ཡར་ཐོན་ཆེ་བ་བྱུང་ཡོད།  དེར་བརྟེན་རྒྱ་ནག་ནང་དུའང་མཐར་ང་ཚོ་ལྟར་མང་གཙོའི་ལམ་ལུགས་ལག་བསྟར་བྱ་ཐུབ་རྒྱུ་ཡིན་པའི་རེ་བ་བྱེད་བཞིན་ཡོད།  རྒྱ་གར་ལྟ་བུར་མཚོན་ན་འཛམ་གླིང་ནང་མི་འབོར་མང་ཤོས་ཡོད་པའི་མང་གཙོའི་རྒྱལ་ཁབ་གཅིག་ཆགས་ཡོད།   དེར་བརྟེན་རྒྱ་གར་གྱི་ཁྱིམ་མཚེས་རྒྱལ་ཁབ་གཞན་དང་བསྡུར་བ་ཡིན་ན་རྒྱ་གར་ནང་ཞི་བདེ་བརྟན་ལྷིང་ཆེ་བ་ཡོད།   དེ་བཞིན་རྒྱ་གར་གནའ་རབས་ཀྱི་འཚེ་མེད་ཞི་བ་དང་ཆོས་ལུགས་མཐུན་སྒྲིལ་བྱ་རྒྱུའི་ལམ་སྲོལ་དེ་རྒྱུན་སྐྱོང་བྱེད་པའི་ཉེར་ལེན་ལ་བརྟེན་ནས་ཡུལ་འདིར་ཆོས་ལུགས་འདྲ་མིན་མང་པོ་འཆམ་མཐུན་ངང་ལོ་ངོ་བརྒྱ་ཕྲག་རིང་མཉམ་སྡོད་བྱེད་ཐུབ་བཞིན་ཡོད།

རྒྱལ་ཁབ་ཀྱི་འགན་དབང་དེ་མི་མང་ཚོར་ཡོད་སྟབས་གསར་འགྱུར་ཚན་པ་ཁག་ལ་དངོས་ཡོད་གནས་ཚུལ་རྣམས་མང་ཚོགས་ལ་གོ་རྟོགས་སྤེལ་རྒྱུའི་ལས་འགན་ཡོད།   གནས་ཚུལ་དེ་དག་དྲང་བདེན་དང་འཁྱོག་བཤད་མེད་དགོས་རྒྱུ་ཧ་ཅང་གལ་ཆེན་པོ་རེད།   འོན་ཀྱང་གསར་འགྱུར་ལ་དོ་སྣང་བསླེབས་ཆེད་གསར་འགོད་པ་ཚོས་འུད་ཤོབ་བཤད་ནས་བལྟ་ཀློག་བྱེད་མཁན་གང་མང་ཡོང་ཐབས་བྱེད་བཞིན་ཡོད།  མང་ཚོགས་རྣམས་ལ་དུས་རྟག་ཏུ་གནས་ཚུལ་བཀྲ་མི་ཤིས་པ་ཀྱང་ཀྱང་བཤད་པ་ཡིན་ན་མིའི་བསམ་བློའི་ནང་བཟང་ཕྱོགས་ཀྱི་རེ་བ་རྒྱག་ས་མེད་པ་ཆགས་ཉེན་ཡོད།  དེར་བརྟེན་གསར་འགོད་པ་ཚོས་སྐབས་རེ་གནས་ཚུལ་བཟང་པོ་ཡོད་པ་དཔེར་ན།  ཚན་རིག་པ་ཚོས་བརྟག་དཔྱད་ཀྱི་ལམ་ནས་མིའི་ལྷན་སྐྱེས་རང་བཞིན་འབྱམས་བརྩེ་ལྡན་པ་ཡིན་པའི་ར་སྤྲོད་བྱུང་ཡོད་སྐོར་སོགས་གནས་ཚུལ་གདོན་ཐུབ་རྒྱུ་ལྟ་བུ་རེད།  མི་ལ་བཟང་ཕྱོགས་ཀྱི་རེ་བ་སྦྱིན་རྒྱུ་ཧ་ཅང་གལ་ཆེན་པོ་རེད།  ང་ཚོ་སྤྱི་ཚོགས་ལ་བརྟེན་ནས་འཚོ་དགོས་པའི་སེམས་ཅན་ཡིན་སྟབས་ཆུང་དུས་བྱམས་བརྩེའི་མཉམ་མྱོང་དང་བྱམས་བརྩེའི་འཚོ་བས་བསྐྱངས་པ་ཡིན་པར་བརྟེན་རང་བཞིན་གྱི་བྱམས་པ་དང་བརྩེ་བར་རིན་ཐང་སྤྲོད་བཞིན་ཡོད།    བྱམས་བརྩེ་གོང་འཕེལ་བཏང་བ་བརྒྱུད་ང་ཚོས་མིའི་སྤྱི་ཚོགས་བྱམས་བརྩེ་ལྡན་པ་ཞིག་བཟོ་ཐབས་བྱ་དགོས།

དེ་ནས་ཕྱོགས་གཞན་ཞིག་ནི་དེང་དུས་ཤེས་ཡོན་ལམ་ལུགས་འདིས་མིའི་ནང་གི་རིན་ཐང་གོང་མཐོར་གཏོང་རྒྱུར་ནུས་པ་འདེང་མིན་ཐོག་དཔྱད་དགོས། དེང་སྐབས་ང་ཚོར་འཕྲད་བཞིན་པའི་དཀའ་ངལ་མང་དག་ཅིག་མིས་བཟོས་པ་ཡིན་ཞིང་།  ལྷག་པར་དཀའ་ངལ་དེ་དག་བཟོ་མཁན་ཡང་དེང་དུས་ཀྱི་ཤེས་ཡོན་ཡོད་མཁན་ཚོ་ཡིན།    དེར་བརྟེན་དེང་དུས་ཤེས་ཡོན་ལམ་ལུགས་ནང་ཞན་ཆ་ཡོད་པ་གསལ་པོ་རེད།  ང་ཚོས་བསྐྱར་དུ་ཉམས་ཞིབ་བྱ་དགོས།  དེང་དུས་ཤེས་ཡོན་ལམ་ལུགས་ནང་གཙོ་བོ་ཕྱི་དངོས་པོ་དཔལ་འབྱོར་ཡར་རྒྱས་ཇི་ལྟར་བཏང་དགོས་པའི་ཐོག་ཤུགས་བརྒྱབ་བཞིན་ཡོད་པ་མ་གཏོགས་ནང་བཤིས་རྒྱུས་གཤིས་རྒྱུད་དང་འབྲེལ་བའི་བཟང་པོའི་རིན་ཐང་གོང་མཐོར་བཏང་རྒྱུད་ཐད་སྐད་ཆ་བཤད་ཀྱི་མེད།    ཅེས་སོགས་ཀྱི་བཀའ་སློབ་སྩལ་རྗེས་དྲི་བ་རྣམས་ལ་བཀའ་ལན་སྩལ།