༢༠༡༧ ཟླ་ ༨ ཚེས་ ༢༣ རེས་གཟའ་ལྷག་པ།
༄༅། །བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་ཕྱི་ལོ་ ༢༠༡༧ ཟླ་ ༨ ཚེས་ ༡༨ ནས་ ༢༧ བར་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ནང་གཞུང་འབྲེལ་ཕྱོགས་ཕེབས་ལས་གཞི་གཞིར་བཟུང་ཕྱི་ཚེས་ ༡༩ ཉིན་སྦེང་ལོར་ནས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་འབྱོར་འཕྲལ་ས་གནས་འགོ་འཛིན་ལས་ཁུངས་གསར་པ་དབུ་འབྱེད་གནང་ཡོད་འདུག
དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཆོད་ ༡་༣༠ ཐོག་མཛད་སྒོའི་ཐོག་མར་དགོན་སྡེ་ཁག་ནས་ཕེབས་པའི་དགེ་འདུན་པ་ཁག་གཅིག་གིས་ཤིས་བརྗོད་གསུང་འདོན་གནང་གྲུབ་མཚམས་སྐུ་མགྲོན་གཙོ་བོ་ནང་སྲིད་བཀའ་བློན་མཆོག་གིས་དར་མཚོན་སྣ་ལྔ་གཅོད་འབྲེག་དང་པང་རྡོ་ཞལ་ཕྱེ་གནང་སྟེ་ས་གནས་འགོ་འཛིན་ལས་ཁུངས་གསར་པ་དབུ་འབྱེད་གནང་ཡོད། དེ་རྗེས་བཀའ་བློན་མཆོག་ལས་ཁུངས་ནང་ཕེབས་ཏེ་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་པ་དང་མར་མེ་ཞལ་ཕྱེ་གནང་།
སྤྱིར་ལས་ཁུངས་གསར་པ་ནང་གི་བཀོད་པར་མཚོན་ན། ས་གནས་འགོ་འཛིན་ཆེད་དུ་ཁྲུས་ཁང་གསང་སྤྱོད་དང་ལྡན་པའི་ཁང་མིག་གཅིག་དང་། ལས་དྲུང་ཆེད་ཁང་མིག་གཅིག ལས་བྱེད་སྤྱི་ཡོངས་ཆེད་ཁང་མིག་ཆེན་པོ་གཅིག ཚོགས་ཁང་གཅིག དོས་ཁང་གཉིས། ཐབ་ཚང་། སྤྱི་ཡོངས་གསང་སྤྱོད་གཅིག ས་གནས་རང་བདེན་ཚོགས་ཚུང་ཆེད་ཁང་མིག་གཉིས་བཅས་ཡོད་འདུག ལས་ཁུངས་གསར་རྒྱག་གི་ལས་གཞི་འདི་ནི་བོད་མིའི་སྒྲིག་འཛུགས་ནང་སྲིད་ལས་ཁུངས་བརྒྱུད་རྒྱ་གར་དབུས་གཞུང་ནང་སྲིད་ལྷན་ཁང་ནས་མཐུན་འགྱུར་རོགས་རམ་གནང་བ་ཡིན་འདུག
གཞན་ཡང་དབུ་འབྱེད་མཛད་སྒོར་སྤྱི་འཐུས་པདྨ་བདེ་ལེགས་ལགས་དང་། ནང་སྲིད་དྲུང་ཆེ་འཆི་མེད་རིག་འཛིན་ལགས། ལྷོ་སྤྱི་ཆོས་འཕེལ་ཐུབ་བསྟན་ལགས། ལྷོ་ཕྱོགས་བོད་མིའི་གཞིས་ཆགས་ཁག་ལྔའི་ས་གནས་འགོ་འཛིན་རྣམ་པ། ས་གནས་འཐུས་ཚོགས་ཀྱི་ཚོགས་མི། དགོན་སྡེ་ཁག་གི་སྐུ་ཚབ། སྤྱི་མི་དང་བརྒྱ་དཔོན་སོགས་མཉམ་ཞུགས་གནང་འདུག
