ཕྱི་ལོ་ ༢༠༡༧ ཟླ་ ༨ ཚེས་ ༡༨ རེས་གཟའ་པ་སངས།
༄༅། །བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་ཕྱི་ལོ་ ༢༠༡༧ ཟླ་ ༨ ཚེས་ ༡༨ ནས་ ༢༧ བར་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དང་། སྦེལ་ཀོབ། ཧུན་སུར་རབ་རྒྱས་གླིང་བཅས་སུ་གཞུང་འབྲེལ་ཕྱོགས་ཕེབས་གནང་གཏན་འཁེལ་ཡོད།
དེ་ཡང་ཕྱི་ཚེས་ ༡༨ ཉིན་བཀའ་བློན་མཆོག་རྡ་ས་ནས་ཅན་སྡི་སྒར་བརྒྱུད་སྦེར་ལོར་ཕེབས་ཐོན་གྱིས་ཕྱི་ཚེས་ ༢༠ ཉིན་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་མཉམ་འབྲེལ་ཁག་གི་འཕྲུལ་བཟོ་དང་འཕྲུལ་རྨོས་སྡེ་ཚན་ཁག་མ་འོངས་ཡར་རྒྱས་གཏོང་རྒྱུའི་ཐབས་ལམ་ཐོག་ཚོགས་འདུའི་མཇུག་བསྡོམས་མཛད་སྒོར་བཅར་རྒྱུ་དང་། ཕྱི་ཚེས་ ༢༡ ཉིན་ལྷོ་གཞིས་ཁག་ལྔའི་བོད་མིའི་ས་གནས་འགོ་འཛིན་ལྷན་བཞུགས་མོལ་ཚོགས་འདུ་དང་། ཉིན་རྒྱབ་ས་གནས་སུ་ལས་གཞི་འགྲོ་བཞིན་པ་ཁག་ལ་རྟོག་ཞིབ་གནང་རྒྱུ། ཕྱི་ཚེས་ ༢༢ ཉིན་སྤྱི་མཐུན་མཉམ་འབྲེལ་ནས་མགྲོན་འབོད་བཞིན་སྐབས་ ༡༧ མཉམ་འབྲེལ་ཁག་གི་འགན་འཛིན་ལྷན་ཚོགས་ཀྱི་དབུ་འབྱེད་མཛད་སྒོར་བཅར་རྒྱུ། ཕྱི་ཚེས་ ༢༣ ཉིན་སྦེལ་ཀོབ་བོད་མིའི་གཞིས་ཆགས་སུ་ལས་བྱེད་བགྲེས་ཤག་ ༥ གསར་རྒྱག་གི་ལས་གཞིར་རྟོག་ཞིབ་དང་། གསར་འབྱོར་སྡོད་ཁང་གསར་རྒྱག་ལས་གཞི་དང་ཞིང་འབྲོག་ ORTC སོ་ནམ་ལས་གཞི་ཁག་ལ་རྟོག་ཞིབ་གནང་རྒྱུ། ཕྱི་ཚེས་ ༢༤ ཉིན་ཧོན་སུར་རབ་རྒྱས་གླིང་བོད་མིའི་གཞིས་ཆགས་སུ་ས་ཁང་སྟོང་པ་ལྷག་ཡོད་པ་དེ་དག་ལ་རྟོག་ཞིབ་དང་ས་ཀང་ཚོགས་ཆུང་ལྷན་ཚོགས་འདུ་ཚོགས་རྒྱུ་སོགས་ཀྱི་ལས་རིམ་ཁག་ལེགས་པར་གྲུབ་རྗེས་ཕྱི་ཚེས་ ༢༧ ཉིན་རྡ་སར་ཕེབས་འབྱོར་གནང་རྒྱུ་ཡིན་འདུག་པ་བཅས།།
