ཕྱི་ལོ་ ༢༠༡༧ ཟླ་ ༨ ཚེས་ ༤ རེས་གཟའ་པ་སངས།
༄༅། །བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་ཕྱི་ལོ་ ༢༠༡༧ ཟླ་ ༨ ཚེས་ ༥ ནས་ ༡༤ བར་ལ་དྭགས་ཀྱི་རྒྱལ་ས་སླེ་དང་བྱང་ཐང་འབྲོག་སྡེ་ས་ཁག་བརྒྱད་བཅས་སུ་གཞུང་འབྲེལ་ཕྱོགས་ཕེབས་གནང་གཏན་འཁེལ་ཡོད།
དེ་ཡང་ཕྱི་ཚེས་ ༥ ཉིན་བཀའ་བློན་མཆོག་རྡ་ས་ནས་ཇཱ་མུར་ཕེབས་ཐོན་གྱིས་ཕྱི་ཚེས་ ༦ ཉིན་ཇཱ་མུ་ནས་མཁའ་ལམ་བརྒྱུད་སླེ་རུ་ཕེབས་འབྱོར་དང་། ཕྱི་ཚེས་ ༧ ཉིན་ལ་དྭགས་རི་ལྗོངས་ཡར་རྒྱས་ལྷན་ཚོགས་ཀྱི་དེད་དཔོན་སྐུ་ཞབས་བསོད་ནམས་ཟླ་བ་བློན་པོ་མཆོག་དང་། སླེའི་རྫོང་དཔོན་སོགས་གནད་ཡོད་མི་སྣ་ཁག་གཅིག་དང་མཇལ་འཕྲད་གནང་རྒྱུ། ཕྱི་ཚེས་ ༨ ནས་ ༡༢ བར་ཆུ་ཤུལ་དང་། དཔལ་མགོན་མཚོ། ཉོ་མ། དུང་ཁྲི། རྒོད་ཡུལ། ཧན་སླེ། མ་ཁྱུ། སུམ་མདོ། ཆུ་མུར། ས་སྨད་བཅས་ལ་བྱང་འབྲོག་སྡེ་ས་ཁག་རྣམས་ཀྱི་གནས་སྟངས་རྟོག་ཞིབ་དང་གཟིགས་སྐོར་གནང་རྒྱུ། ཕྱི་ཚེས་ ༡༣ ཉིན་མི་མང་ཚོགས་ཆེན་གནང་རྒྱུ། ཕྱི་ཚེས་ ༡༤ ཉིན་སླེ་ནས་ཇཱ་མུར་མཁའ་ལམ་བརྒྱུད་ཕེབས་ཐོན་གྱིས་ཇཱ་མུ་ནས་རྡ་སར་ཕེབས་འབྱོར་གནང་རྒྱུ་ཡིན་འདུག ནང་སྲིད་བཀའ་བློན་མཆོག་དང་ལྷན་ནང་སྲིད་དྲུང་ཆེ་འཆི་མེད་རིག་འཛིན་ལགས་ལྷན་བཅར་ཞུ་རྒྱུ་ཡིན་འདུག་པ་བཅས།།
