༢༠༡༧ ཟླ་ ༨ ཚེས་ ༢༨ རེས་གཟའ་ཟླ་བ།
༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཟླ་འདིའི་ཚེས་ ༢༢ ནས་ཕྱི་ཟླ་ ༩ ཚེས་ ༡༡ བར་གཞུང་འབྲེལ་ཕྱོགས་ཕེབས་གནང་བ་ལྟར། ཕྱི་ཚེས་ ༢༦ ཉིན་སི་ཡེ་ཊལ་བསྟི་གནས་ཁང་དུ་བོད་ཀྱི་དུས་སྟོན་ཐེངས་ ༢༢ དབུ་འབྱེད་གནང་ཡོད། བོད་ཀྱི་དུས་སྟོན་ནི་ཝ་ཤིང་ཊོན་བོད་མིའི་མཐུན་ཚོགས་ནས་ལོ་ལྟར་བོད་ཀྱི་ཐུན་མོང་མ་ཡིན་པའི་རིག་གཞུང་སྲུང་སྐྱོབ་ཆེད་བོད་ཀྱི་གླུ་གཞས་འཁྲབ་སྟོན་དང་། སྲོལ་རྒྱུན་ལག་ཤེས་སྒྱུ་རྩལ་རིགས། དེ་བཞིན་ཞལ་ལག་དང་རྩེད་མོ་རིགས་འདྲ་མིན་གོ་སྒྲིག་ཞུས་པའི་ཐོག་ནས་རྒྱས་སྤྲོ་གནང་ཡོད་འདུག
དབུ་འབྱེད་མཛད་སྒོར་མངའ་སྡེའི་སྤྱི་ཁྱབ་འགན་འཛིན་སྐུ་ཞབས་ས་ཡ་རཱས་ཧ་བིབ་ Cyrus Habib ལགས། གྲོང་སྡེའི་སྤྱི་ཁྱབ་པ་སྐུ་ཞབས་ཨེཌ་མུར་རེ་ Ed Murray ལགས། ཨ་རིའི་རྒྱལ་ཡོངས་གྲོས་ཚོགས་འོག་མའི་འཐུས་མི་ལྕམ་པྲ་མི་ལཱ་ Pramila Jayapal ལགས་ཀྱིས་གཙོས་བོད་དང་བོད་ཀྱི་རིག་གཞུང་ཐད་དོ་སྣང་ཡོད་མཁན་ཕྱི་རྒྱལ་ཡུལ་མི་མང་པོ་ཞིག་ཀྱང་མཉམ་ཞུགས་གནང་ཡོད།
མཛད་སྒོའི་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་མཆོག་གིས་རྒྱ་ནག་གཞུང་ནས་བོད་ནང་ལག་བསྟར་བྱེད་བཞིན་པའི་སྲིད་བྱུས་འོག་མ་འོངས་བོད་ཀྱི་གནས་སྟངས་ཛ་དྲག་ཏུ་འགྲོ་བཞིན་པ་སྤྱི་དང་། ལྷག་པར་བོད་མིའི་ངོ་བོ་དང་། ཆོས་དང་རིག་གཞུང་རྩ་མེད་དུ་འགྲོ་བའི་ཉེན་ཚབས་སྐོར་དང་། དེ་བཞིན་བོད་ཀྱི་རྩ་དོན་སླད་རང་གི་གཅེས་པའི་ལུས་སྲོག་བློས་གཏོང་གནང་མཁན་རྣམས་ཀྱི་མངོན་འདོད་གསལ་སྟོན་གནང་ནས་ཚང་མས་རྡོག་རྩ་གཅིག་ཏུ་སྒྲིལ་ནས་ཧུར་ཐག་གནང་དགོས་པའི་འབོད་སྐུལ་ཞུས།
དེ་མཚུངས་ད་བར་རྒྱ་ནག་གཞུང་ནས་བོད་ནང་གཏོར་བཤིག་ཚད་མེད་པ་དང་ཁོར་ཡུག་དུག་རྫས་སོགས་ཀྱིས་བཅོས་ཐབས་མེད་པའི་གནོད་སྐྱོན་ཚད་མེད་པ་བཏང་པ་འདིས་བོད་རྒྱལ་ཁབ་ཙམ་མིན་པར་ཨེ་ཤི་ཡ་དང་ཆེ་ས་ནས་འཛམ་གླིང་ཡོངས་ལ་གྱོང་གུན་ཆེན་པོ་ཞིག་ཕོགས་རྒྱུའི་ཉེན་ཚབས་ཡོད་པར་བརྟེན་ཚང་མས་དོ་སྣང་ཤུགས་ཆེར་གནང་དགོས་པ་གལ་ཆེན་པོ་ཡིན་སྐོར་བཅས་དང་། ཨ་རི་གཞུང་མང་གཉིས་ནས་ད་བར་བོད་མིར་མཐུན་རྐྱེན་རོགས་སྐྱོར་གནང་བ་དང་བོད་དོན་ཐོག་རྒྱབ་སྐྱོར་ཤུགས་ཆེ་གནང་བའི་ཐོག་སྲིད་འཛིན་ཟུར་པ་ཨོ་བཱ་མ་མཆོག་གིས་གཉིས་སྨན་དབུ་མའི་ལམ་གྱི་སྲིད་བྱུས་ཐོག་ནས་བོད་དོན་བདེན་མཐའ་གསལ་ཐབས་ལ་མོས་མཐུན་རྒྱབ་སྐྱོར་གནང་བར་བཀའ་དྲིན་རྗེས་དྲན་ཞུ་རྒྱུ་ཡིན། ཞེས་སོགས་གསུངས།
དཔལ་ལྡན་སྲིད་སྐྱོོང་མཆོག་ཕྱི་ཚེས་ ༢༥ ཉིན་སི་ཡ་ཊལ་རྒྱལ་སར་ཕེབས་འབྱོར་སྐབས་བོད་མིའི་མཐུན་ཚོགས་ཀྱི་ཚོགས་མི་རྣམས་ནས་ཕེབས་བསུའི་སྣེ་ལེན་ཟབ་རྒྱས་ཞུས་རྗེས་ས་སྐྱའི་ཆོས་ཚོགས་དུ་ཆོས་མཇལ་ཞུས་གྲུབ་མཚམས་བོད་མི་ ༡༥༠ ཙམ་ལ་བོད་ཀྱི་ཆོས་དང་རིག་གཞུང་གལ་ཆེན་པོ་བརྩིས་པའི་ཐོག་ནས་མི་ཉམས་རྒྱུན་འཛིན་དང་ཉམས་པ་སླར་གསོ་གནང་དགོས་གལ་ཆེ་སྐོར་སོགས་ཀྱི་གསུང་བཤད་གནང་བ་དང་དྲི་བ་ཁག་གཅིག་ལ་ལན་འདེབས་ཀྱང་གནང་བ་མ་ཟད་། ལྷག་པར་བོད་ཀྱི་ཐུན་མིན་རིག་གཞུང་གཅེས་འཛིན་སླད་ཕ་མ་རྣམས་ནས་སོ་སོའི་ཕྲུ་གུར་གཟའ་མཇུག་སློབ་གྲྭར་བཏང་ནས་བོད་ཀྱི་ངོ་བོ་དང་བོོད་ཀྱི་སྐད་ཡིག་རིག་གཞུང་བཅས་བསླབ་ཏུ་བཏང་དགོས་གལ་ཆེ་ཚུལ་ཡིན་སྐོར་དང་། ཕ་མས་སོ་སོའི་ཕྲུ་གུ་རྣམས་ལ་མ་འོངས་བོད་མི་ཚད་ལྡན་ཞིག་ཆགས་ནས་བོད་མིའི་སྒྲིག་འཛུགས་ནང་ཞབས་ཕྱི་ཞུ་དགོས་སྐོར་སློབ་སྟོན་གནང་གལ་ཆེ་སྐོར་དང་། བོད་མིའི་སྒྲིག་འཛུགས་ཀྱི་ལྷན་ཁང་ཁག་ངོ་སྤྲོད་མདོར་བསྡུས། ལྔ་དང་ལྔ་བཅུའི་ཐབས་བྱུས་བཅས་ཀྱི་སྐོར་ངོ་སྤྲོད་གནང་ཡོད།
དཔལ་ལྡན་སྲིད་སྐྱོང་མཆོག་ཕྱི་ཚེས་ ༢༦ ཉིན་རྒྱབ་དེར་པོཊ་ལེནྜ་ Portland རུ་ཕེབས་ཐོན་གྱིས་ཕྱི་ཚེས་ ༢༧ ཉིན་བོད་མི་རྣམས་ལ་གསུང་བཤད་གནང་རྗེས་ཉིན་རྒྱབ་སེན་ཕ་རན་སིས་ཀོ་ San francisco ཕྱོགས་སུ་ཕེབས་ཐོན་གནང་ཡོད་འདུག །
