༢༠༡༧ ཟླ་ ༨ ཚེས་ ༢༧ རེས་གཟའ་ཉི་མ།

༄༅། །འདི་གར་དཔལ་འབྱོར་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་ཡར་ཐོན་ཚོང་ལས་ལྷན་ཚོགས་ Entrepreneurship Summit ཐེངས་དང་པོ་དབུ་འབྱེད་གནང་ཡོད།

དེ་ཡང་ཕྱོ་ལོ་ ༢༠༡༧ ཟླ་ ༨ ཚེས་ ༢༡ ཉིན་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་རྒྱ་གར་གྲོང་ཁྱེར་ཧེ་དར་བྷཌ་ Hyderbad ནང་རྟེན་གཞི་བྱས་པའི་ SUMVN དང་ nuculus བརྡ་འཕྲིན་འཕྲུལ་ལས་ཁང་ནས་གོ་སྒྲིག་ཞུས་པའི་ Entrepreneurship Summit ཚོགས་ཐེངས་དང་པོ་དབུ་འབྱེད་དང་གསུང་བཤད་གནང་དོན།

དེང་དུས་ཀྱི་ཡར་ཐོན་ཚོང་ལས་ནི་ཧ་ཅང་གལ་ཆེན་པོ་ཡིན་པ་དང། དེའི་ཐོག་ནས་མང་ཚོགས་ཀྱི་དཔལ་འབྱོར་གནས་བབ་ཇེ་བཟང་དུ་གཏོང་ཐུབ་རྒྱུ་མ་ཟད།  ན་གཞོན་ལས་མེད་ཚོ་ལའང་ལས་ཀའི་གོ་སྐབས་བསྐྲུན་ཐུབ་པ་སོགས་ཀྱི་དགེ་མཚན་ཆེན་པོ་ཡོད།  འཕགས་བོད་གཉིས་ལ་མཚོན་ན་ཕྱི་ལོ་ ༡༩༥༩ གོང་ནས་ལོ་རྒྱུས་ཁྲོད་བླ་སློབ་ཀྱི་འབྲེལ་ལམ་བཟང་པོ་ཡོད་སྐོར་སོགས་ཀྱི་གསུང་བཤད་གནང་།

དབུ་འབྱེད་མཛད་སྒོ་གྲུབ་མཚམས་རྒྱ་གར་ཚོང་ལས་ཁྱད་མཁས་མི་སྣ་ཁག་དང་ལྷན་སྣོད་བཅུད་མ་ལག་ Ecosystem སྐོར་ལ་བཞུགས་མོལ་ལྷན་ཚོགས་གནང་། དེ་ནས་བཀའ་བློན་མཆོག་གྲོང་ཁྱེར་དེའི་ནང་འཕྲུལ་ལས་བསྟི་གནས་ཁང་  T-Hub ལ་གཟིགས་སྐོར་གནང་།

ཕྱི་ཚེས་ ༢༢ ཉིན་ཏེ་ལན་ག་ནའི་ Telangana བཟོ་ལས་དང་ཚོང་ལས་ཁང་གི་སྤྱི་ཁྱབ་དྲུང་ཆེ་སྐུ་ཞབས་ཛྱ་ཡེ་ཤི་རན་ཇན་ Jayesh Ranjan མཆོག་ལ་འཚམས་འདྲིའི་མཇལ་འཕྲད་དང་བོད་མིའི་ཡར་ཐོན་ཚོང་ལས་རམ་འདེགས་ལས་གཞིའི་སྐོར་གླེང་མོལ་གནང་།

དེ་ཉིན་གྲོང་ཁྱེར་ཧེ་དར་བྷཌ་ Hyderbad ནང་བོད་ཀྱི་སྨན་རྩིས་ཁང་གི་སྨན་པ་ངག་དབང་དགེ་ལེགས་ལགས་དང་ལས་བྱེད།  དེ་བཞིན་མཐོ་རིམ་སློབ་གྲྭའི་སློབ་ཕྲུག་རྣམས་དང་། བོད་མི་ཡར་ཐོན་ཚོང་པ་ཁག་མཉམ་ལྷན་འཛོམས་ཐོག་གསུང་བཤད་གནང་། མོ་ཧ་ལི་  Mohali བོད་མིའི་ཚོང་པའི་སྐྱིད་སྡུག་ནས་རེ་འདུན་ཞུ་དོན་ལྟར་པན་ཇབ་  Punjab གྲོང་ཁྱེར་ཡར་རྒྱས་ལས་ཁུངས་ཀྱི་སྤྱི་ཁྱབ་འགན་འཛིན་སྐུ་ཞབས་ Ravi Bhagat ལགས་དང་མཇལ་འཕྲད་གནང་རྗེས་ཕྱི་དྲོར་བཀའ་བློན་མཆོག་རྡ་སར་ཕྱིར་ཕེབས་གནང་ཡོད་པ་བཅས།།