༢༠༡༧ ཟླ་ ༨ ཚེས་ ༧ རེས་གཟའ་ཟླ་བ།
༄༅། །ཕྱི་ལོ་ ༢༠༡༧ ཟླ་ ༨ ཚེས་ ༤ ཉིན་དགའ་ལྡན་ཁྲི་ཐོག་ ༡༠༤ རྗེ་བཙུན་བློ་བཟང་བསྟན་འཛིན་རིན་པོ་ཆེ་མཆོག་གི་ཁྲི་འདོན་མཛད་སྒོར་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ངོ་བཅར་ཞུས་གནང་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༦ ཐོག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དུ་རྟེན་གཞི་བྱས་པའི་དགའ་ལྡན་བླ་སྤྱི་དང་། དེ་ནས་ཆུ་ཚོད་ ༡༠ ཐོག་དགའ་ལྡན་ནང་གི་ཁྲི་ཐོག་ཁང་དུ་ཁྲི་འདོན་གྱི་མཛད་སྒོ་ཚོགས་འདུག
མཛད་སྒོའི་ཐོག་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དང་། ཤར་པ་ཆོས་རྗེ་རིན་པོ་ཆེ། འབྲས་སྤུངས་ཁྲི་པ། གདན་ས་ཆེན་པོ་གསུམ་གྱི་མཁན་པོ་དང་མཁན་ཟུར། དེ་བཞིན་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག བཀའ་ཟུར་རྒྱ་རི་སྒྲོལ་མ་མཆོག དགེ་ལུགས་སྤྱི་འཐུས། ལྷོ་སྤྱི། གཞུང་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་བཅས་བཅར་ཡོད། ཕྱི་ཚེས་ ༥ ཉིན་རིན་པོ་ཆེ་མཆོག་ལ་དགེ་ལུགས་ཡོངས་ནས་བརྟན་བཞུགས་འདེགས་འབུལ་ཞུས་ཡོད་པ་བཅས།།
