༢༠༡༧ ཟླ་ ༨ ཚེས་ ༤ རེས་གཟའ་པ་སངས།
༅༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། ཁམས་བྲག་གཡབ་ནང་དུ་རྒྱ་གཞུང་གིས་དོན་མེད་བོད་མི་འཛིན་བཟུང་དང་བཀག་ཉར་བྱས་འདུག འདི་ལོའི་བོད་ཟླ་ལྔ་པའི་ནང་དུ་ཁམས་བྲག་གཡབ་མཁར་སྒང་སོ་ཁྲི་བ་བྱམས་པ་ཆོས་རྒྱལ་ཟེར་བ་ཞིག་རྒྱ་གཞུང་གིས་དོན་མེད་ཆུ་དབར་དགོན་པའི་ཚེ་ཆོག་ཚོགས་པའི་སྐབས་སུ་འཛིན་བཟུང་དང་བཀག་ཉར་བྱས་ཡོད་འདུག
དེ་ཡང་འདི་ལོའི་བོད་ཟླ་ལྔ་པའི་ནང་དུ་བྲག་གཡབ་ཆུ་དབར་དགོན་པའི་ཚེ་ཆོག་གི་དུས་སྟོན་ཆེན་མོ་ཚོགས་པའི་སྐབས་མི་མང་ཕོན་ཆེན་ཆུ་དབར་དགོན་དུ་འདུ་འཛོམས་བྱེད་སྡོད་པའི་སྐབས་དེར། ཆུ་དབར་དགོན་ནས་ལེ་བར་གཅིག་ཙམ་གཤམ་འོག་ཏུ་ཡོད་པའི་རྒྱ་གཞུང་གི་ནོར་ཁྲང་ཤང་ཟེར་བ་དེ་ནས་སོ་ཁྲི་བ་བྱམས་པ་ཆོས་རྒྱལ་ལ་ཁ་པར་འབྱོར་ནས་འཕྲལ་མར་ནོང་ཁྲང་ཤང་དུ་འོང་དགོས་ལུགས་བཤད་ཡོད་འདུག
ཁོ་རང་ནོང་ཁྲང་ཤང་དུ་འབྱོར་བ་དང་རྒྱ་མི་ལས་བྱེད་ཀྱིས་དེ་མ་ཐག་ཏུ་འཛིན་བཟུང་བྱས་པ་མ་ཟད། རྡུང་རྡེག་བཏང་རྗེས་ནོང་ཁྲང་ཤང་དུ་ཞག་གཅིག་བཀག་ཉར་བྱས་ཡོད་འདུག འོན་ཀྱང་བྱམས་པ་ཆོས་རྒྱལ་གྱིས་གཙོས་མི་མང་སུས་ཀྱང་ཁོ་རང་རྒྱ་གཞུང་གིས་འཛིན་བཟུང་བསྡམས་བཀྱིགས་དང་བཀག་ཉར་བྱས་དོན་རྩ་བ་ནས་ཤེས་ཡོད་མི་འདུག
ཕྱི་ཉིན་བྲག་གཡབ་རྫོང་ནས་རྒྱ་མིའི་ཉེན་རྟོག་པ་འབྱོར་ནས་ཁོ་རང་བྲག་གཡབ་རྫོང་དུ་འཁྱེར་ནས་ཞག་གཉིས་བཀག་ཉར་བྱས་ཞོར་འདྲི་རྩད་བྱེད་དོན། ཁྱོད་རང་རྒྱ་གར་ལ་ཡོད་པའི་སྤུན་མཆེད་ངག་དབང་བྱམས་པ་དང་འབྲེལ་བ་ཨེ་ཡོད། ཁྱོད་རང་ཚོ་ནང་མི་སུ་དང་སུས་ངག་དབང་བྱམས་པར་དང་འབྲེལ་བ་བྱེད་ཀྱི་ཡོད་སོགས་འདྲི་རྩད་བྱས་ཡོད་འདུག རྒྱ་མི་ཉེན་རྟོག་པས་བྱམས་པ་ཆོས་རྒྱལ་གྱི་ཁ་པར་ནང་སྤུན་མཆེད་ངག་དབང་བྱམས་པ་དང་འབྲེལ་བ་ཡོད་པའི་དཔང་རྟགས་གང་ཡང་མ་རག་སྟབས། བྲག་གཡབ་རྫོང་རྒྱ་མིའི་བཙོན་ཁང་ནང་ཞག་པོ་གཉིས་བཀག་ཉར་དང་འདྲི་རྩད་བྱས་རྗེས་གློད་གྲོལ་བཏང་འདུག་ཀྱང་། ཁོ་རང་གི་ལག་ཐོགས་ཁ་པར་རྒྱ་དམར་ཉེན་རྟོག་པས་བདག་ཉར་ཞིབ་འཇུག་བྱས་ཏེ་ཉིན་གྲངས་འགའ་ཤས་ཀྱི་རྗེས་སུ་རྫོང་སྤྱི་བདེ་ལས་ཁུངས་ནང་ཁ་པར་ལེན་དུ་ཤོག་ལབ་ནས་ཕྱིར་སྤྲོད་བྱས་འདུག
རྒྱ་མིའི་ཉེན་རྟོག་པ་འགས་ཁྱོད་རང་ཚོའི་སྤུན་མཆེད་ངག་དབང་བྱམས་པ་ནི་རྒྱ་གར་ལ་ཏཱ་ལའི་བླ་མའི་རྒྱུག་ཁྱི་ཞིག་ཡིན་འདུག་པས་ཁྱོད་ཚོ་སུས་ཀྱང་འབྲེལ་བ་མ་བྱེད་ན་དགའ་གི་རེད། ཅེས་ཉེན་བརྡ་ཡང་བཏང་ཡོད་འདུག བྱམས་པ་ཆོས་རྒྱལ་ནི་ཁམས་བྲག་གཡབ་མཁར་སྒང་སོ་ཁྲི་ནས་ཡིན་ཞིང་ད་ལྟ་རང་ལོ་ ༣༠ དང་ཕའི་མིང་ལ་རྡོ་རྗེ་རྣམ་རྒྱལ་ལམ་རྡོ་རྣམ་དང་མའི་མིང་ལ་རྡོ་རྗེ་སྒྲོལ་དཀར་རམ་རྡོ་སྒྲོན་ཟེར་གྱི་ཡོད་འདུག །
