༢༠༡༧ ཟླ་ ༨ ཚེས་ ༢༩ རེས་གཟའ་མིག་དམར།

༄༅། །རྒྱ་གར་ནང་དུ་ཡོད་པའི་ཨོ་སི་ཊི་རི་ཡ་ Austria གཞུང་ཚབ་པ་ལྕམ་སྐུ་བྷྲི་གེ་ཏེ་ཨོ་པིངྒར་  Brigitte Oeppinger-Walchshofer  མཆོག་གིས་རྒྱ་གར་གྱི་གསར་ཤོག་གྲགས་ཅན་ཧིན་དུ་ The Hindu ཞེས་པའི་གསར་འགོད་པའི་བཅར་འདྲི་དང་ལེན་གནང་སྐབས།   ༸གོང་ས་ཏཱ་ལའི་བླ་མ་མཆོག་ཨོ་སི་ཊི་རི་ཡར་ཆིབས་སྒྱུར་བསྐྱང་ཚེ་དགའ་བསུ་ཞུ་རྒྱུ་ལས་དགག་བྱ་རྩ་བ་ནས་མེད་སྐོར་གསུངས།

དེ་ཡང་གཞུང་ཚབ་པ་མཆོག་གིས་རྒྱ་དཀར་ནག་གཉིས་འབྲོག་ལམ་ས་མཚམས་ཐོག་གདོང་ཐུག་སྐོར་གྱི་གནད་དོན་དང་འབྲེལ་ནས་གསལ་བཤད་གནང་སྐབས།  ཆོས་ཕྱོགས་ཀྱི་རླབས་ཆེན་དབུ་ཁྲིད་༸གོང་ས་ཏཱ་ལའི་བླ་མ་མཆོག་ལྟ་བུ་གདན་འདྲེན་ཞུ་དགོས་ན་རྒྱ་ནག་གི་གནོན་ཤུགས་ལ་བརྩི་མེད་གཏང་ཐུབ་དགོས་པ་དང་། ༸གོང་ས་ཏཱ་ལའི་བླ་མ་མཆོག་དང་རྒྱ་གར་གྱི་མེས་པོ་དམ་པ་གན་དྷི་ Mahatma Gandhi མཆོག་རྣམ་གཉིས་ནི་འཛམ་གླིང་མང་ཚོགས་རྣམས་ཀྱིས་དགའ་མོས་དང་གུས་བཀུར་ཧ་ཅང་ཞུ་ཡུལ་གྱི་དབུ་ཁྲིད་ཡིན་སྐོར་གསུང་པ་དང་སྦྲགས།

༸གོང་ས་མཆོག་ནི་ཨོ་སི་ཊི་རི་ཡའི་ཡུལ་དུ་དུས་ནམ་ཞིག་ཆིབས་སྒྱུར་བསྐྱང་ཡང་དེར་དགག་བྱ་རྩ་བ་ནས་མེད་སྐོར་གསལ་བཤད་གནང་དོན།  ༸གོང་ས་ཏཱ་ལའི་བླ་མ་མཆོག་ཨོ་སི་ཊི་རི་ཡར་ག་དུས་ཆིབས་སྒྱུར་བསྐྱང་ཡང་དེར་དགག་བྱ་རྩ་བ་ནས་མེད།   ང་ཚོའི་ལངས་ཕྱོགས་དེ་རྒྱ་ནག་གཞུང་ནས་ཀྱང་ཤེས་རྟོགས་ཡོད།  ལྷག་པར་ཡུ་རོབ་སྤྱི་མཐུན་ཚོགས་པ་ནས་ཀྱང་དུས་རྟག་ཏུ་༸གོང་ས་ཏཱ་ལའི་བླ་མ་མཆོག་ལ་བཟང་ཕྱོགས་ཀྱི་སྲིད་བྱུས་འཛིན་བཞིན་ཡོད་པར་བརྟེན།   ཡུ་རོབ་སྤྱི་མཐུན་ཚོགས་པའི་ནང་དུ་ཡོད་པའི་རྒྱལ་ཁབ་སུ་གཅིག་ནས་ཀྱང་༸གོང་ས་མཆོག་གི་ཆིབས་སྒྱུར་ལ་དགག་བྱ་ཞུ་རྒྱུ་མ་རེད།  བོད་མིའི་ཆོས་ཕྱོགས་ཀྱི་དབུ་ཁྲིད་ཁོང་ལྟ་བུ་ནི་དད་གུས་ཧ་ཅང་ཞུ་ཡུལ་གྱི་ཞི་བདེའི་དབུ་ཁྲིད་ཅིག་ཡིན་པ་མ་ཟད།  མེས་པོ་དམ་པ་གན་དྷི་མཆོག་དང་མན་ཌེ་ལ་མཆོག་ལྟ་བུ་ཞི་བདེ་གོང་སྤེལ་གཏོང་གནང་མཛད་མཁན་རླབས་ཆེན་གྱི་དབུ་ཁྲིད་ཅིག་ཡིན།  ཞེས་གསུངས།།