༢༠༡༧ ཟླ་ ༨ ཚེས་ ༥ རེས་གཟའ་སྤེན་པ།
༄༅། །མོ་སོ་ཀོ་ཚོང་ལས་སློབ་གྲྭའི་སློབ་སྤྱི་སྐུ་ཞབས་གི་རི་གོ་རི་ཨེཝ་ཊོ་ Grigory Avetov ལགས་དང་གསར་འགོད་པ་ཌི་མི་ཊི་རི་ Dmitry ལགས་རྣམ་གཉིས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་བཅར་འདྲི་ཞུས་པ་དེ་ཨིན་སྐད་ནས་ཐད་ཀར་རུ་སུའི་སྐད་ནང་གསུང་སྒྱུར་ཞུས་ཡོད་འདུག
སྐུ་ཞབས་གི་རི་གོ་རི་ལགས་ཀྱིས་ཐོག་མར་འཚམས་འདྲི་ཞུས་པ་དང་སྦྲགས་གསུང་དོན། འཆར་ལ་ཉེ་བའི་ཕྱི་ཟླ་ ༡༡ ནང་ང་ཚོས་ཨུ་རུ་སུ་ནང་ Synergy Global Forum in Russia ཞེས་པའི་ལྷན་ཚོགས་ཤིག་བསྐོང་ཚོགས་ཞུ་གཏན་འཁེལ་ཡོད། ལྷན་ཚོགས་དེར་ཁྱོན་བསྡོམས་དོན་གཉེར་བ་མི་གྲངས་ ༡༥༠༠༠ ཙམ་འདུ་འཛོམས་ཡོང་རྒྱུའི་ཚོད་དཔག་བྱེད་བཞིན་ཡོད། སྐབས་དེར་དེ་རིང་ང་ཚོས་༸གོང་ས་མཆོག་ལ་བཅར་འདྲི་ཞུས་པའི་བརྙན་ཐུང་འདི་ཚོགས་བཅར་བ་རྣམས་ལ་བསྟན་འཆར་ཡོད། ཅེས་སྙན་སེང་ཞུས།
ཕྱོགས་མཚུངས་གསར་འགོད་པ་ཌི་མི་ཊི་རི་ལགས་ཀྱིས་གསུང་དོན། དེ་རིང་འདིར་༸གོང་ས་མཆོག་༸སྐུ་ངོ་མ་དང་མཇལ་ནས་དྲི་བ་དྲིས་ལན་ཞུ་རྒྱུའི་གོ་སྐབས་བྱུང་བ་ནི་ཧ་ཅང་སྐལ་པ་བཟང་པོ་ཞིག་ཡིན། ཞེས་གསུང་རྗེས་༸གོང་ས་མཆོག་ལ་དྲི་བ་ཞུ་དོན། ཕྱི་དངོས་པོ་ཡར་རྒྱས་དང་ནང་སེམས་ཀྱི་རིང་ཐང་དབར་ཆ་སྙོམས་ཡོང་ཐབས་གང་ཡོད། ཅེས་འདྲི་སྐབས་༸གོང་ས་མཆོག་ནས་ད་ལྟ་འཛམ་བུ་གླིང་འདི་བདེ་ཞིང་སྐྱིད་པ་ཞིག་འདུག་གམ། ཞེས་བཀའ་རྩད་མཛད་པ་དང་སྦྲགས་བཀའ་ལན་སྩལ་དོན།
དེང་དུས་འཛམ་གླིང་ནང་དམག་འཁྲུག་མང་དུ་འགྲོ་བཞིན་པ་དང་ཐ་ན་ཞི་བདེ་ཡོད་སའི་ས་ཁུལ་ནང་དུའང་དབུལ་ཕྱུག་བར་ཁྱད་ཧ་ཅང་ཡོང་བཞིན་ཡོད།
འཛམ་གླིང་ནང་གི་མི་འབོར་དུང་ཕྱུར་ ༧༠ ཡོད་པ་རྣམས་ཚང་མ་བདེ་བ་འདོད་ཅིང་སྡུག་བསྔལ་མི་འདོད་མཁན་ཤ་སྟག་ཡིན། འོན་ཀྱང་གཙོ་བོ་རྙོག་གྲ་དང་དཀའ་ངལ་མང་པོ་ཞིག་མི་རང་ཉིད་ཀྱིས་བཟོ་བཞིན་ཡོད།
ངོས་རང་གི་ཉམས་མྱོང་ཐོག་ནས་བཤད་ན། སེམས་ནང་ཞི་བདེ་ཡོད་ན་ལུས་པོའི་བདེ་ཐང་ལའང་རང་བཞིན་གྱིས་ཕན་ཐོགས་ཡོང་བཞིན་འདུག དེང་དུས་ཤེས་ཡོན་གྱི་དགོས་དམིགས་གཙོ་བོ་ནི་ཕྱི་དངོས་པོ་ཁོ་ནར་དམིགས་པར་བརྟེན་དེང་དུས་ཤེས་ཡོན་ཐོག་ནས་དཔལ་འབྱོར་ལོངས་སྤྱོད་ཕྱུག་པོ་ཆགས་པ་དེ་དག་གིས་ནང་གི་ཞི་བདེ་དེ་གཙོ་བོ་ཕྱི་དངོས་པོའི་ཐོག་ནས་མིན་པར་ནང་གི་བསམ་བློའི་ཐོག་ནས་ཡོང་བཞིན་ཡོད་པ་དེར་ཕལ་ཆེར་ངོས་འཛིན་བྱ་རྒྱུ་ཁག་པོ་རེད།
གལ་ཏེ་མིའི་ལྷན་སྐྱེས་རང་བཞིན་འདི་ཁོང་ཁྲོ་ལྡན་པ་ཡིན་ན་རེ་བ་རྒྱག་ས་མེད། འོན་ཀྱང་མིའི་ལྷན་སྐྱེས་རང་བཞིན་དེ་དེ་ལས་ཟློག་སྟེ་བྱམས་བརྩེའི་རང་བཞིན་ལྡན་པ་ཡིན་སྟབས་བཟང་ཕྱོགས་ཀྱི་རེ་བ་རྒྱག་ས་ཞིག་ཡོད། གཞན་གྱི་བདེ་སྡུག་ལ་བསམ་བློ་གཏོང་རྒྱུ་འདི་ང་ཚོའི་འཚོ་གནས་བྱ་རྒྱུའི་རྨང་གཞི་ཡིན་ཞིང་། དངོས་ཡོད་གནས་སྟངས་ནི་ང་ཚོ་ཕན་ཚུན་གཅིག་ལ་གཅིག་བརྟེན་ཐོག་ནས་འཚོ་དགོས། དེར་བརྟེན་འགྲོ་བ་མི་རིགས་གཅིག་གྱུར་གྱི་འདུ་ཤེས་འཛིན་དགོས་པ་ཧ་ཅང་གལ་ཆེན་པོ་ཆགས་ཡོད།
དེང་སྐབས་འཛམ་གླིང་གི་དངོས་ཡོད་གནས་སྟངས་དེར་འགྱུར་བ་ཧ་ཅང་ཕྱིན་ཡོད་ཀྱང་ང་ཚོའི་བསམ་བློ་གཏོང་སྟངས་དེ་ད་དུང་དུས་རབས་ ༢༠ ནང་གི་བསམ་བློ་གཏོང་སྟངས་ཐོག་ནས་འགྲོ་བཞིན་ཡོད། ཕྱོགས་མཚུངས་གཏོར་རྒོལ་གཏོང་རྒྱུའི་མཚོན་ཆའི་ནུས་པ་དེ་དག་ཧ་ལས་པའི་ཚབས་ཆེན་པོ་ཡོད། ཅེས་བཀའ་ལན་སྩལ།
འཛམ་གླིང་ཞི་བདེ་ལྷིང་འཇགས་ཡོང་བའི་ཐུགས་རེ་མཛད་བཞིན་ཡོད་མེད་ཀྱི་དྲི་བར་བཀའ་ལན་སྩལ་དོན།
འཛམ་གླིང་ཞི་བདེ་ཡོང་ཐུབ་པའི་རེ་བ་དང་ཡིད་ཆེས་ཆ་ཚང་ཡོོད། དཔེར་ན་འཛམ་གླིང་དམག་ཆེན་གཉིས་པའི་སྐབས་རྒྱལ་ཁབ་ཕན་ཚུན་དམག་འཁྲུག་དང་འཐབ་རྩོད་བྱས་ནས་ལོ་མང་པོ་གནས་ཡོད་ཀྱང་ཕྱིས་སུ་ཡུ་རོབ་མཐུན་ཚོགས་ཀྱི་སྒྲིག་འཛུགས་གསར་གཏོད་འོག་དེ་སྔ་རྒྱལ་ཁབ་ཕན་ཚུན་མི་མཐུན་པའི་དགྲ་བོར་ངོས་འཛིན་བྱས་པ་རྣམས་ད་ཆ་གྲོགས་པོར་གྱུར་ནས་སྤྱིའི་བདེ་ཐབས་སླད་འབད་བརྩོན་བྱེད་བཞིན་ཡོད། འདི་ནི་བཟང་ཕྱོགས་ཀྱི་རྣམ་འགྱུར་ཞིག་ཡིན།
དེ་སྔའི་རུ་སུ་སྤྱི་མཐུན་ཚོགས་པ་ལྟ་བུར་མཚོན་ནའང་མག་ཁེ་སི་ལྟ་གྲུབ་ལ་ངོས་རང་ཧ་ཅང་མོས་པོ་ཡོད། ལྷག་པར་མག་ཁེ་སི་ Marx རིང་ལུགས་ཐོག་ནས་དཔལ་འབྱོར་ལམ་ལུགས་དེ་དག་ཧ་ཅང་ཡིད་དབང་འཁྲོག་པོ་ཡོད། འོན་ཀྱང་ཕྱིས་སུ་ལེ་ཉིན་ Lenin བསླེབས་རྗེས་དབང་ཆའི་འཐབ་རྩོད་སྒང་ལ་ཕྱིན་ནས་དམག་ཆེན་ལངས་པའི་དུས་སྐབས་སུ་ལག་བསྟར་བྱས་པའི་རྒྱལ་ཁབ་ཀྱི་བདེ་འཇགས་ཆེད་གསང་རྒྱ་དང་དམ་བསྒྲགས་བྱ་རྒྱུའི་ལམ་སྲོལ་དེ་དག་རྒྱུན་སྐྱོང་བྱས་ནས་ཕྱིན་པ་རེད། དེར་བརྟེན་དབང་ཆ་གཅིག་བསྡུས་རིང་ལུགས་ཀྱིས་མག་ཁེ་སི་རིང་ལུགས་ཕམ་པར་བྱས་ཡོད། ཅེས་བཀའ་ལན་སྩལ།
དེ་རྗེས་ཨུ་རུ་སུའི་མ་འོངས་མདུན་ལམ་སྐོར་གྱི་དྲི་བར་བཀའ་ལན་སྩལ་དོན།
ཨུ་རུ་སུ་ནི་སྟོབས་ཆེན་རྒྱལ་ཁབ་གཅིག་ཡིན་ཞིང་རུ་སུ་མི་མང་ཚོ་ཡང་ཞི་དུལ་བག་ཡོད་ཅན་ཡིན། དེར་བརྟེན་ཨུ་རུ་སུ་གཞུང་གིས་དཀའ་ངལ་འཕྲད་སྐབས་འགན་ཁུར་ལྡན་པའི་ཐོག་ནས་ཕན་གྲོགས་གང་འདྲ་བྱེད་དགོས་མིན་ཐད་བསམ་བློ་གཏོང་དགོས་པ་ལས་དེ་སྔའི་བག་ཆགས་ཀྱི་ཤུགས་རྐྱེན་འོག་དཀའ་ངལ་འཕྲད་མ་ཐག་ལམ་སེང་དྲག་གནོན་ཁོ་ནས་སེལ་ཐབས་བྱ་རྒྱུའི་བསམ་བློ་གཏོང་བཞིན་པ་འདི་འོས་འཚམས་ཤིག་མ་རེད། ཕྱོགས་གཅིག་ནས་དྲག་པོའི་ཐབས་ལམ་དེ་ད་ཆ་དུས་ཚོད་ཡོལ་ཟིན་པ་དང་། གཉིས་ནས་འཇིགས་སྣང་དང་ཡིད་ཆེས་གཉིས་དུས་ནམ་ཡང་ལྷན་དུ་འགྲོགས་མི་ཐུབ། ཨུ་རུ་སུའི་རྒྱལ་ཁབ་ལ་ནུས་པ་ཧ་ཅང་ལྡན་ཡོད་སྟབས་ནུས་པ་དེ་དག་བྱམས་བརྩེ་དང་འགྲོ་བ་མི་རིགས་གཅིག་གྱུར་གྱི་འདུ་ཤེས་གཞི་ལ་བཞག་ནས་བཀོལ་སྤྱོད་བྱེད་པ་ཡིན་ན། དུས་རབས་འདི་དམག་འཁྲུག་གི་དུས་རབས་ཚབ་ཏུ་གྲོས་མོལ་གྱི་ལམ་ནས་དཀའ་ངལ་སེལ་མཁན་གྱི་དུས་རབས་ཤིག་ཆགས་ཐུབ། ཅེས་བཀའ་ལན་སྩལ།
དེ་ནས་གི་རི་གོ་རི་ཨེཝ་ཊོ་བི་ལགས་དང་ཁོང་གི་གྲོགས་པོ་རྣམས་ནས་༸གོང་ས་༸སྐྱབས་མགོན་ཆེན་པོ་མཆོག་ཨུ་རུ་སུའི་ཡུལ་དུ་འཆར་ཟླ་ ༡༡ ནང་ཚོགས་ལ་ཉེ་བའི་ Synergy Global Forum སྐབས་གདན་འདྲེན་ཞུ་ཐབས་བྱས་ཀྱང་གྲུབ་འབྲས་མ་སོན་པ་དང་། འབྱུང་འགྱུར་ལྷན་ཚོགས་དེའི་ཐོག་ཆིབས་སྒྱུར་བཀའ་དྲིན་སྩལ་ཐུབ་མིན་གྱི་དྲི་བར། ༸གོང་ས་མཆོག་གིས་བཞད་མོ་བཞད་ནས་ཞལ་ཤོབ་དང་སྦྲགས་བཀའ་ལན་སྩལ་དོན།
ད་ལྟའི་འཆར་རྒྱལ་ཁབ་ཁག་གིས་སུ་དང་སུ་གདན་འདྲེན་ཞུ་དགོས་མིན་རྒྱ་ནག་གཞུང་ནས་ཆོག་མཆན་ལེན་དགོས་སྟབས་རྒྱ་ནག་འགོ་ཁྲིད་མཁྲེགས་འཛིན་པ་ཚོས་ངོས་རང་ཁ་བྲལ་བ་དང་འཇིགས་སྐུལ་དྲག་སྤྱོད་པ། དེ་བཞིན་བདུད་ལྟ་བུར་ངོས་འཛིན་བྱེད་བཞིན་ཡོད། དེར་བརྟེན་འབྱུང་འགྱུར་ལམ་སེང་ངོས་རང་ཨུ་རུ་སུར་འགྲོ་ཐུབ་རྒྱུ་ཟེར་བ་ཕལ་ཆེར་ཁག་པོ་རེད། དེར་ངོས་རང་ཕྲན་བུ་བློ་ཕམ་འདུག དེ་ནི་ཨུ་རུ་སུ་གཅིག་པུའི་སྐད་ཆ་མིན། ཨུ་རུ་སུ་ཙམ་མ་ཟད། ཐུ་ཝ་དང་བྷུར་ཡ་ཏི། ཁལ་མུག་བཅས་ནང་པའི་རྒྱལ་ཁབ་དེ་དག་ནང་གི་མི་མང་ཚོ་དཔལ་ན་ལེནྡྲ་ནས་བརྒྱུད་པའི་བོད་བརྒྱུད་ནང་བསྟན་གྱི་རྗེས་འབྲང་པ་ཡིན།
དེར་བརྟེན་ངོས་ཀྱིས་མི་མང་དེ་དག་ལ་ཕན་ཐོགས་ཕྲན་བུ་བྱ་ཐུབ་ན་བསམས་ནས་སྨོན་ལམ་དེ་འདྲ་བརྒྱབ་བཞིན་ཡོད་ཀྱང་ད་བར་སྨོན་ལམ་དེ་བསྒྲུབ་ཐུབ་མ་སོང་། ཞེས་བཀའ་ལན་སྩལ།
མཐར་གི་རི་གོ་རི་ལགས་དང་ཁོང་གི་གྲོགས་པོ་རྣམས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་རུ་སུའི་དམག་མིའི་དབུ་ཞྭ་གཅིག་དང་། སྔ་དུས་སྐབས་དུས་ཚོད་ཚོད་འཛིན་བྱེད་མཁན་བྱེ་མའི་ཤལ་སྣོད་ཀྱི་ཆུ་ཚོད་གཅིག དེ་བཞིན་༸རྒྱལ་བའི་བཀའ་འགྱུར་ཀམ་པུ་ཊར་ནང་ཕབ་ལེན་ཞུས་པའི་བརྙན་ཆས་བཅས་འབུལ་ལམ་ཞུས། བཀའ་འགྱུར་ཕབ་ལེན་ཆེད་ལོ་ངོོ་ ༣༠ བགོར་འདུག་པ་བཅས།།
