༢༠༡༧ ཟླ་ ༧ ཚེས་ ༡༠ རེས་གཟའ་ཟླ་བ།
༄༅། །སྦེལ་ཇམ་ Belgium གྲོང་ཁྱེར་ཨེནཊ་ཝརྤ་ Antwer ནང་དུ་བོད་རིགས་ཚོགས་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༢ བཞེས་པའི་༸སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་འདུག སྤྱིར་ཉིན་རྒྱབ་ཏུ་རྩེད་རིགས་སྣ་ཚོགས་གོ་སྒྲིག་གནང་བ་བརྒྱུད་མཛད་སྒོ་སྲུང་བརྩི་ཞུས་པ་མ་ཟད། མཛད་སྒོ་དངོས་གཞི་ཕྱེད་ཡོལ་དུ་གོ་སྒྲིག་གནང་འདུག སྐབས་དེར་མཛད་སྒོའི་སྐུ་མགྲོན་གཙོ་བོ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་༸གོང་ས་མཆོག་གི་༸སྐུ་ཚེའི་མཛད་ཁུར་གཙོ་བོ་གསུམ་དང་ལྷག་པར་བོད་མིའི་འཐབ་རྩོད་ཁྲོད་མགོན་པོ་གང་ཉིད་མཆོག་གིས་དགུང་གྲངས་ ༡༦ སྐབས་ནས་བཟུང་ཆོས་སྲིད་གང་གི་ཆ་ནས་བློ་ཡུལ་དུ་ཤོང་དཀའ་བའི་རླབས་ཆེན་གྱི་མཛད་འཕྲིན་བསྐྱངས་པ་རྣམས་སྙིང་བསྡུས་ཀྱི་ཚུལ་དུ་ངོ་སྤྲོད་གནང་།
ལྷག་པར་ཕྱི་ལོ་ ༡༩༥༩ ལོར་དུས་འགྱུར་བྱུང་རྗེས་བོད་མི་རྣམས་ལ་ངོ་ཤེས་གནམ་དང་ས་མ་གཏོགས་མེད་པ་ལྟ་བུ་བོད་ཀྱི་ལོ་རྒྱུས་ནང་དེ་སྔ་བྱུང་མྱོང་མེད་པའི་གཉན་འཕྲང་ཧ་ཅང་ཆེ་བའི་དུས་སྐབས་སུ་༸གོང་ས་མཆོག་གི་ཐུགས་རྗེའི་བཀའ་དྲིན་ཉག་གཅིག་ལ་བརྟེན་ནས་བོད་མི་འབུམ་ལྷག་ཙམ་རྒྱ་གར་གཙོ་བོར་གྱུར་བའི་ཕྱི་རྒྱལ་ཡུལ་གྲུ་འདྲ་མིན་ནང་བཙན་བྱོལ་དུ་གྱར་རྗེས། ཐོག་མར་གཞི་ཆགས་དང་སློབ་གྲྭ དགོན་སྡེ་སོགས་ཉམས་གསོ་མཛད་པ་བརྒྱུད་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་དང་ཉམས་པ་སླར་གསོ་མཛད་པ་ཙམ་དུ་མ་ཟད། བཙན་བྱོལ་བོད་མིའི་སྤྱི་ཚོགས་ཁྲོད་ཡང་དག་པའི་མང་གཙོའི་ལམ་བཟང་གསོལ་སྩལ་མཛད་འབྲས་སུ་ད་ཆ་ཡུལ་གྲུ་གཞན་ལ་འགྲམ་ཆུ་ལྡང་མི་དགོས་པ་ཞིག་ཏུ་གྱུར་གནང་མཛད་དེ་བཙན་བྱོལ་བ་འདྲ་འདྲའི་ནང་ནས་མི་འདྲ་ཙམ་ཆགས་ཐུབ་པ་དང་།
གཞན་ཡང་རྒྱལ་སྤྱིའི་ཐོག་ལ་མཚོན་ན། ནོ་བེལ་ཞི་བདེའི་གཟེངས་རྟགས་ཀྱིས་མཚོན་རྒྱལ་སྤྱིའི་སྡིངས་ཆའི་ཐོག་གྲགས་ཆེ་བའི་གཟེངས་རྟགས་དང་མཁས་པའི་མཚན་གནས། མི་སེར་གྱི་ཕྱག་འཁྱེར་སོགས་དུ་མ་གཙུག་རྒྱན་དུ་བཞེས་ནས་འཛམ་གླིང་གི་གྲགས་ཅན་དབུ་ཁྲིད་ཁྲོད་གཟེངས་སུ་ཐོན་པའི་མཛད་པ་བདག་གིར་བཞེས་ནས་སྐྱེ་བོ་མཆོག་དམན་ཀུན་གྱིས་གཙུག་ཏུ་བཀུར་བ་དང་། ལྷག་པར་ད་ལྟའི་དུས་སྐབས་འདིར་བོད་ཀྱི་གནད་དོན་རྩ་ཡལ་དུ་མ་ཕྱིན་པར་གསོན་པོར་གནས་ཐུབ་པ་འདི་ནི་མགོན་པོ་གང་ཉིད་མཆོག་གི་ཐུགས་རྗེའི་བྱིན་རླབས་དང་༸སྐུའི་གཟི་བརྗིད་ཉག་གཅིག་ལ་བརྟེན་ནས་བྱུང་ཚུལ་སོགས་གསུངས།
སྤྱིར་༸སྐུའི་འཁྲུངས་སྐར་མཛད་སྒོའི་ཐོག་མེ་ཏོག་རིན་པོ་ཆེས་གཙོས་གཞུང་འབྲེལ་མིན་པའི་སྐུ་ཚབ་འཐུས་མི་རྣམས་ཕེབས་ཡོད། སྐབས་དེར་བོད་རིགས་ཚོགས་པའི་ཚོགས་གཙོ་ཀརྨ་ལགས་ཀྱིས་ལས་བསྡོམས་སྙིང་བསྡུས་སྒྲོག་སྦྱངས་ཞུས་ཡོད་པ་བཅས།།
