༢༠༡༧ ཟླ་ ༧ ཚེས་ ༣༠ རེས་གཟའ་ཉི་མ།
༄༅། །ཉེ་ལམ་རྒྱ་གར་རྒྱལ་ས་ལྡི་ལིའི་ཧནྶ་རཱཇ་མཐོ་སློབ་དབུ་བརྙེས་ནས་མི་ལོ་ ༧༠ འཁོར་བའི་དུས་དྲན་དང་བསྟུན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ལ་ཆེ་བསྟོད་ཀྱི་གཟེངས་རྟགས་ཕུལ་ཡོད། སྐབས་དེར་སྲིད་སྐྱོང་མཆོག་ནས་དེང་སྐབས་རྒྱ་ནག་གིས་འབྲོག་ལམ་ས་ཁུལ་དུ་དཔུང་འཇུག་བྱེད་བཞིན་པ་དེ་ནི་རྒྱ་ནག་རྒྱ་སྐྱེད་ཀྱི་མངོན་རྟགས་ཤིག་ཡིན་པ་དང་། ད་ལྟ་ཁུལ་དེར་རྒྱ་དཀར་ནག་གཉིས་མདོང་ཐུག་བྱེད་བཞིན་པའི་སྐབས་འདིར་ང་ཚོས་མཐའ་གཅིག་ཏུ་རྒྱ་གར་གྱི་གནས་སྟངས་ལ་རྒྱབ་སྐྱོར་ཞུ་བཞིན་ཡོད་ཅེས་གསུང་པ་མ་ཟད།
རྒྱ་གར་གྱི་ཁ་གཏད་གཙོ་བོ་རྒྱ་ནག་ཆགས་ཡོད་པའི་སྐོར་དེ་སྔོན་རྒྱ་གར་གྱི་བདེ་སྲུང་བློན་ཆེན་སྐུ་ཞབས་ཇོར་ཇི་ཕརན་ནེནྜེ་སི་ George Fernandes མཆོག་ཙམ་མ་ཟད། བདེ་སྲུང་བློན་ཆེན་ཟུར་པ་སྐུ་ཞབས་མུ་ལ་ཡམ་སིངྒ་ཡ་ཌབ་ Mulayam Singh Yadav མཆོག་ནས་ཀྱང་ཉེ་ལམ་རྒྱ་གར་གྲོས་ཚོགས་ནང་གཏམ་བཤད་དེ་བསྐྱར་ལྡབ་གནང་ཡོད་པ་སྲིད་སྐྱོང་མཆོག་གིས་ལུང་འདྲེན་གནང་བ་དང་སྦྲགས།
དེང་སྐབས་རྒྱ་ནག་གིས་ལྷོ་རྒྱ་ནག་རྒྱ་མཚོ་དང་ཤར་རྒྱ་ནག་རྒྱ་མཚོ། སི་ཀར་བྷོ་རོ་གླིང་ཕྲན།་Scarborough Island མེག་མོ་ཧན་ས་ཚིགས་སོགས་ཕྱོགས་གང་སར་དཔུང་འཇུག་བྱེད་བཞིན་པའི་ཁར་ཉེ་ལམ་འབྲོག་ལམ་ས་ཁུལ་དུའང་དཔུང་འཇུག་བྱེད་བཞིན་པ་འདི་ནི་རྒྱ་སྐྱེད་ཀྱི་གཡོ་བྱུས་ཤིག་ཡིན་པ་ཧ་ཅང་གསལ་པོ་ཡིན་པ་དང་། ལྷག་པར་འབྲོག་ལམ་ཁུལ་དུ་དཔུང་འཇུག་བྱེད་བཞིན་པ་འདི་ནི་རྒྱ་ནག་གཞུང་གིས་ཆེད་མངགས་དངོས་ཡོད་གནས་སྟངས་ལ་རྩི་མེད་རྡོག་རོལ་གཏོང་བཞིན་པའི་སྲིད་བྱུས་ལག་བསྟར་བྱེད་བཞིན་ཡོད་པ་གསལ་པོར་མཚོན་ཐུབ་སྐོར་གསུང་པ་མ་ཟད།
མཛད་སྒོ་གྲོལ་རྗེས་རི་པབ་ལིག་གསར་འགྱུར་བརྙན་འཕྲིན་ Republic TV ཚན་པའི་གསར་འགོད་པའི་དྲི་བར་ལན་འདེབས་གནང་སྐབས་གསུང་དོན། དེ་སྔ་ཕྱི་ལོ་ ༡༩༥༠ འགོ་སྟོད་དུ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་གཙོ་འཛིན་མའོ་ཙེ་ཏུང་ཁོ་པས་བོད་དེ་རྒྱ་ནག་གི་ལག་པ་གཡས་པའི་སྦར་མཐིལ་ལྟ་བུར་དཔེ་སྦྱར་ནས་མཛུབ་མོ་ལྔ་པོ་དེ་དག་ལ་དྭགས་དང་བལ་ཡུལ། འབྲས་ལྗོངས། འབྲུག ཨ་རུ་ནཱ་ཅལ་པར་དེ་ཤི་བཅས་ཡིན་སྐོར་བཤད་ཡོད།
དེར་བརྟེན་ད་ལྟའི་འཆར་རྒྱ་ནག་གཞུང་གིས་དམག་དཔུང་གི་སྟོབས་ཤུགས་འོག་རྒྱ་གར་ལ་མཐའ་སྐོར་ནས་ཉམས་གུད་གཏོང་ཐབས་བྱེད་བཞིན་ཡོད། དེར་བརྟེན་ངས་དུས་རྟག་ཏུ་རྒྱ་གར་ལ་སྤྱང་གྲུང་བྱེད་དགོས་པ་མ་ཟད། འཛམ་གླིང་གཞན་ལའང་བོད་ཀྱི་གནས་སྟངས་ཐོག་ངེས་པར་དུ་དོ་སྣང་གནང་དགོས་པའི་འབོད་སྐུལ་ཞུ་བཞིན་ཡོད། བོད་མི་ཚོར་འཕྲད་བཞིན་པའི་དཀའ་ངལ་དེ་ཉིན་གཅིག་རྒྱ་གར་ལའང་འཕྲད་སྲིད་པ་ཤིག་རེད། ཅེས་གསུངས།།
