༄༅། །ཕ་རན་སིའི་གྲོས་ཚོགས་འོག་མའི་ཚོགས་གཞོན་སྐུ་ཞབས་ཅལ་སི་ཌི་ཀར་སོན་ Mr Charles de Courson མཆོག་གིས་སྦར་སེལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་དྲུང་ཆེ་རྣམ་རྒྱལ་བསམ་གྲུབ་ལགས་གཉིས་ལ་གྲོས་ཚོགས་ཀྱི་གསོལ་ཐབ་ཏུ་ཆེད་མངགས་མགྲོན་འབོད་ཐོག་གསོལ་ཚིགས་ཕུལ་འདུག

དེ་ཡང་སྐུ་ཞབས་ཅལ་སི་མཆོག་ནི་ཡུལ་དེའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་ཡིན་ཞིང་། ཐེངས་འདིར་གླེང་མོལ་གནང་རྒྱུའི་གནད་དོན་གཙོ་བོ་ནི། དེང་སྐབས་ཕ་རན་སིའི་ཡུལ་དུ་ཆབ་སྲིད་ཀྱི་གནས་སྟངས་ཧ་ཅང་འཕོ་འགྱུར་ཕྱིན་པའི་ཁྲོད་དེ་སྔའི་གྲོས་ཚོགས་བོད་དོན་རྒྱབ་སྐྱོར་ཚོགས་མི་རྣམས་ཀྱི་གནས་སྟངས་ལའང་འཕོ་འགྱུར་ཕྱིན་ཡོད་སྟབས།  འཕོ་འགྱུར་གྱི་དུས་སྐབས་འདིར་གྲོས་ཚོགས་ནང་བོད་དོན་རྒྱབ་སྐྱོར་ཚོགས་པ་མུ་མཐུད་གནས་དགོས་པ་མ་ཟད། ཚོགས་མི་གསར་འདེམས་བྱ་རྒྱུ་དེའང་དུས་ཀྱི་དགོས་མཁོ་ཞིག་ཆགས་པའི་གནས་སྟངས་བཅས་ཡིན་འདུག  སྤྱིར་ཡུལ་དེའི་ནང་དུ་ཆབ་སྲིད་ཀྱི་གནས་སྟངས་འཕོ་འགྱུར་ཆེན་པོ་ཆགས་དགོས་པའི་རྒྱུ་མཚན་ནི་སྲིད་འཛིན་གསར་པ་སྐུ་ཞབས་མེག་རོན་ Mr Macron མཆོག་ལ་ཚད་མཐོའི་རྒྱལ་ཁ་ཐོབ་པར་བརྟེན་ཕ་རན་སི་ཙམ་མ་ཟད། ཡུ་རོབ་སྤྱི་མཐུན་གྱི་ཆབ་སྲིད་གནས་སྟངས་ཐོག་ལའང་ཤུགས་རྐྱེན་ཆེན་པོ་ཐེབས་ཡོད།

རྒྱལ་ཡོངས་གྲོས་ཚོགས་ཀྱི་འོས་བསྡུ་ཆེན་མོ་བྱུང་རྗེས་གྲོས་ཚོགས་ཀྱི་འཐུས་མི་རྣམས་ལའང་འཕོ་འགྱུར་ཆེན་པོ་བྱུང་ཡོད།  སྲིད་འཛིན་མེག་རོན་མཆོག་གི་ཆབ་སྲིད་ཚོགས་པར་རྒྱལ་ཁ་ཆེན་པོ་ཐོབ་པ་དེས་གྲོས་ཚོགས་ནང་གི་དེ་སྔ་ཡུན་རིང་ནས་དབང་ཆ་ཆེན་པོ་སྤྱོད་བཞིན་པའི་ཆབ་སྲིད་ཚོགས་པ་གཙོ་གྲས་ཁག་གཅིག་ལ་ཕམ་ཉེས་བཏང་ཡོད་སྟབས། ཆབ་སྲིད་ཚོགས་པ་དེ་དག་གི་གྲོས་ཚོགས་འཐུས་མི་བོད་དོན་རྒྱབ་སྐྱོར་བ་རྣམས་གྲོས་ཚོགས་ནང་ཡང་བསྐྱར་འོས་འདེམས་བྱུང་མེད་པ་སོགས་ཀྱི་གནས་སྟངས་བྱུང་ཡོད།

 སྐུ་ཞབས་ཅལ་སི་ཌི་ཀར་སོན་མཆོག་གིས། གཞི་རྩའི་ཡུ་རོབ་ཀྱི་དབྱར་ཁའི་གུང་སེང་བཏང་གྲབས་ཡོད་སྟབས་གུང་སེང་རྗེས་སུ་ཕ་རན་སིའི་གྲོས་ཚོགས་གསར་པའི་ནང་བོད་དོན་རྒྱབ་སྐྱོར་ཚོགས་པའི་ཚོགས་མི་གསར་པ་འཚོལ་ཐབས་ཆེད་འབད་བརྩོན་ཤུགས་ཆེ་གནང་དགོས་པའི་ལམ་སྟོན་གནང་བ་དང་སྦྲགས།  བར་དེར་བོད་དོན་རྒྱབ་སྐྱོར་གསར་པ་འཚོལ་ཐབས་ཆེད་བགྲོ་གླེང་དང་བསམ་འཆར་བརྗེ་ལེན་སོགས་སྔོན་འགྲོའི་གྲ་སྒྲིག་རིགས་གནང་ཐུབ་རྒྱུ་ཡིན་སྐོར་ཡང་གསུངས།