༢༠༡༧ ཟླ་ ༧ ཚེས་ ༢༡ རེས་གཟའ་པ་སངས།
༄༅། །ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ལིའུ་ཞའོ་པོ་དམ་པ་མཆོག་རྒྱ་ནག་གི་བཙོན་ཁང་ནང་ཡུན་རིང་མནར་གཅོད་འོག་སྙུན་གཞི་ཚབས་ཆེ་ཕོག་རྐྱེན་ཕྱི་ཟླ་ ༧ ཚེས་ ༡༣ རེས་གཟའ་ཕུར་བུ་ཉིན་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་པར་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་གོ་སྒྲིག་འོག ཕྱི་ལོ་ ༢༠༡༧ ཟླ་ ༧ ཚེས་ ༢༡ རེས་གཟའ་པ་སངས་ཕྱེད་ཡོལ་ཆུ་ཚོད་ ༤ ཐོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མཆོད་འབུལ་སྨོན་ལམ་ཚོགས་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གིས་གསུང་དོན།
དེ་རིང་ང་ཚོ་འདིར་འཛོམས་དགོས་པའི་རྒྱུ་མཚན་གཙོ་བོ་ནི་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ལིའུ་ཞའོ་པོ་མཆོག་འདས་གྲོངས་སུ་གྱུར་བར་དམ་པ་ཁོང་དང་ཁོང་གི་ནང་མི་རྣམས་ལ་ཐུགས་སྨོན་སྐྱོན་ཆེད་འཛོམས་ཡོད་སྟབས་ཚང་མས་སྨོན་ལམ་ཡག་པོ་སྐྱོན་རོགས། ཁོང་འདས་གྲོངས་སུ་འགྲོ་སྐབས་དགུང་གྲངས་ ༦༡ རེད་འདུག འཁྲུངས་ཡུལ་དེ་རྒྱ་ནག་མངའ་སྡེ་ཆང་ཆུང་ནང་ཡིན་པ་དང་། ཆུང་དུས་སྐབས་ནས་ཤེས་ཡོན་ལ་དོ་སྣང་ཧ་ཅང་གནང་མཁན་ཞིག་ཡིན་པ་མ་ཟད། སློབ་ཕྲུག་ཧ་ཅང་ཡག་པོ་ཞིག་ཡིན་པ་ཡོངས་སུ་གྲགས་པ་ཞིག་ཡིན་འདུག དམ་པ་ཁོང་གིས་བརྩམས་པའི་དཔེ་དེབ་གྲངས་ ༡༦ འདུག རྩོམ་ཡིག་ལ་མཚོན་ན་སྟོང་ཕྲག་བརྒལ་བ་འདུག དེ་བཞིན་ནོ་བེལ་ཞི་བདེའི་གཟེངས་རྟགས་ཀྱིས་རྒྱལ་སྤྱིའི་ནང་གྲགས་ཆེ་བའི་གསོལ་རས་ཐོབ་པ་གྲངས་ ༡༤ འདུག དམ་པ་ཁོང་མང་གཙོ་དང་རང་དབང་འཐབ་རྩོད་པ་ཞིག་ཡིན་པ་ནི་ཕྱི་ལོ་ ༡༩༨༩ ལོར་པེ་ཅིང་གཙོ་བོར་གྱུར་བའི་རྒྱ་ནག་རྒྱལ་ཡོངས་སུ་སློབ་ཕྲུག་མང་པོ་ཞིག་གིས་ལས་འགུལ་སྤེལ་ནས་མང་གཙོ་འཐབ་རྩོད་བྱེད་སྐབས།
དམ་པ་ཁོང་ཨ་རིའི་སྙན་གྲགས་ཆེ་བའི་ཀོ་ལམ་བྷི་ཡ་གཙུག་ལག་སློབ་ཁང་དུ་མཁས་དབང་གི་གོ་ས་འཛིན་ནས་བཞུགས་ཡོད་ཀྱང་། སློབ་ཕྲུག་ཚོས་ངོ་རྒོལ་རྔམ་སྟོན་གྱི་ལས་འགུལ་སྤེལ་སྐོར་གནས་ཚུལ་ཐོས་མ་ཐག་དམ་པ་ཁོང་རྒྱ་ནག་ཏུ་ཕྱིར་ལོག་ནས་ལས་འགུལ་ནང་ཆ་ཤས་བླངས་བ་མ་ཟད། ལས་འགུལ་སྣེ་འཁྲིད་གནང་ཡོད། དེ་རྗེས་རྒྱ་ནག་གི་བཙོན་དུ་དཀའ་སྡུག་མྱངས་པའང་བྱུང་འདུག དམ་པ་ཁོང་གིས་བཅའ་ཁྲིམས་ ༠།༨ ཞེས་པ་དེ་བྲིས་འདུག དེ་གཞི་རྩར་འཛིན་ས་དེ་ཅེག་ཀོ་སུ་ལ་ཝ་ཀི་ཡའི་ནང་མང་གཙོ་འཐབ་རྩོད་བྱེད་སྐབས་བཅའ་ཁྲིམས་ ༧༧ ཟེར་བ་ཞིག་ཡོད་པ་དེར་གཞི་བཞག་པ་རེད་འདུག བཅའ་ཁྲིམས་ ༠།༨ ཟེར་བ་དེ་ཕྱི་ལོ་ ༡༩༨༩ ལོར་གནམ་བདེ་སྒོར་མོའི་ཐང་ཆེན་དུ་སློབ་ཕྲུག་ཚོས་མང་གཙོའི་ལས་འགུལ་སྤེལ་ནས་ལོ་བཅུ་ཧྲིལ་པོ་དུས་ཚིགས་དང་བསྟུན་ནས་བྲིས་པ་ཞིག་ཡིན་འདུག བཅའ་ཁྲིམས་ ༠།༨ ཟེར་བ་དེ་འཛམ་གླིང་ནང་ཧ་ཅང་གྲགས་ཆེན་པོ་ཆགས་ཡོད། དེའི་ནང་གཙོ་བོ་རྒྱ་ནག་ནང་མང་གཙོ་དགོས་པ་དང་། མང་གཙོ་དེའང་འཛམ་གླིང་གཞན་དང་མཐུན་པའི་མང་གཙོ་ཀ་བ་གསུམ་གར་ཡོད་པ་དང་། གཏམ་བརྗོད་རང་དབང་ཡོད་པ། འོས་བསྡུ་བྱེད་ཆོག་པ། བཅས་ཁ་གསལ་བཀོད་འདུག དེར་བརྟེན་དམ་པ་ཁོང་བྱས་རྗེས་ཆེན་པོ་ཡོད་མཁན་ཞིག་ཡིན་པ་ཧ་ཅང་གསལ་པོ་རེད།
ལྷག་པར་བོད་དང་འབྲེལ་བ་གང་ཡོད་བརྗོད་ན། རྒྱ་ནག་ནང་དུ་མང་གཙོ་ཙོད་མཁན་བོད་དོན་རྒྱབ་སྐྱོར་གནང་མཁན་མང་པོ་ཞིག་ཡོད་ཀྱང་བོད་དོན་ཆེད་དུ་དམ་པ་ཁོང་གིས་བོད་དང་འབྲེལ་བའི་ཐོག་ནས་དོན་ཚན་ ༡༢ ཅན་གྱི་ཡིག་ཆ་ཞིག་འགྲེམས་སྤེལ་གནང་སྐབས་དེའི་ནང་རྒྱབ་སྐྱོར་གྱིས་མཚན་རྟགས་སྐྱོན་མཁན་དང་ཤོས་དམ་པ་ཁོང་ཡིན་འདུག དོན་ཚན་ ༡༢ ཅན་གྱི་ཞུ་ཡིག་དེའི་ནང་དུ། བོད་ནང་དཀའ་ངལ་ཧ་ཅང་ཡོད་པ་དང་། བོད་ནང་འགྲོ་བ་མིའི་ཐོབ་ཐང་གི་དཀའ་ངལ་ཡོད་པ་དང་། དཀའ་ངལ་དེ་སེལ་ཐབས་བྱེད་དགོས་པ་དང་། དེའི་ཆེད་རྒྱ་ནག་གཞུང་གིས་འགན་ཁུར་ལེན་དགོས་པ། དེར་བརྟེན་དོན་ཚན་ ༡༢ ཅན་གྱི་ཡིག་ཆ་དེར་དམ་པ་ཁོང་གིས་མཚན་རྟགས་སྐྱོན་ཡོད་སྐོར་གསལ་བཤད་གནང་འདུག
ཕྱིས་སུ་དམ་པ་ཁོང་ལ་གནད་དོན་དེའི་སྐོར་འདྲི་རྩད་ཞུ་སྐབས་༸གོང་ས་མཆོག་གི་བཀའ་དགོངས་ལྟར་མིང་དོན་མཚུངས་པའི་རང་སྐྱོང་རྩོད་བཞིན་པ་དེར་བསམ་ཚུལ་གང་ཡོད་ཀྱི་དྲི་བར་དམ་པ་ཁོང་གིས་སྐབས་དེར། ༸གོང་ས་མཆོག་གིས་མིང་དོན་མཚུངས་པའི་རང་སྐྱོང་གི་གནས་བབ་རྩོད་བཞིན་པ་དེ་ཡ་རབས་བཟང་སྤྱོད་ཐོག་ནས་ཀྱང་འགྲིག་པ་ཞིག་ཡིན་པ་མ་ཟད། དོན་དངོས་ཁ་ཡོད་ལག་ཡོད་ཐོག་ནས་ཀྱང་འགྲིག་པ་ཞིག་ཡིན་པ་དང་། ལྷག་པར་༸གོང་ས་ཏཱ་ལའི་བླ་མ་མཆོག་དང་རྒྱ་ནག་དབར་བཀའ་མོལ་གནང་ནས་བོད་ཀྱི་གནད་དོན་གསལ་ཐབས་བྱ་རྒྱུ་དེ་ཧ་ཅང་གལ་ཆེ་ཡིན་སྐོར་གསུངས། ཕྱོགས་མཚུངས་དེ་རྗེས་བོད་དོན་སྐོར་བཀའ་མོལ་ལས་འཕྲོས་ཏེ་༸གོང་ས་མཆོག་ནི་བོད་དང་བོད་མིའི་སྲོག་རྩ་ལྟ་བུ་ཡིན་པར་བརྟེན། བོད་ནང་དུ་ཡོད་པའི་བོད་མི་ཚོས་༸གོང་ས་མཆོག་མཇལ་འདོད་ཡོད། དེར་བརྟེན་རྒྱ་ནག་གཞུང་གིས་བོད་ཀྱི་སྲོག་རྩ་༸གོང་ས་ཏཱ་ལའི་བླ་མ་མཆོག་བོད་དུ་གདན་འདྲེན་ཞུས་དགོས་པ་ཧ་ཅང་གལ་ཆེན་པོ་ཡིན་སྐོར་གསུང་འདུག དམ་པ་ཁོང་གིས་བཀའ་མོལ་དེ་ལྟར་གནང་བར་བརྟེན་དམ་པ་ཁོང་བཙོན་དུ་ཡོད་སྐབས་རྒྱ་ནག་གཞུང་གིས་ཆེད་མངགས་བཀའ་མོལ་དེ་དག་ཁག་དཀྲི་བྱས་ནས་ཉེས་ཆད་འཕར་མ་བཏང་འདུག ཅེས་གསུངས།།
