༢༠༡༧ ཟླ་ ༧ ཚེས་ ༧ རེས་གཟའ་པ་སངས།
༄༅། །འདི་གའི་ཆེད་གཉེར་གསར་འགོད་པ་ཡེ་ཤེས་ཀུན་གྲགས་ལགས་ཀྱིས་ས་གནས་ནས་བཏང་གནས་ནང་འཁོད་དོན། ལ་དྭགས་ལྷོ་བྱང་བོད་མི་ཡོངས་ནས་ཕྱི་ལོ་ ༢༠༡༧ ཟླ་ ༧ ཚེས་ ༦ ཉིན་ལ་དྭགས་ཞི་བ་ཚལ་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༢ ལ་ཕེབས་པའི་༸སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠།༤༠ ཐོག་སྐུ་མགྲོན་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་དགའ་ལྡན་ཁྲི་ཟུར་རིན་པོ་ཆེ་མཆོག་དང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག ལ་དྭགས་ནང་པའི་ཚོགས་པའི་ཚོགས་གཙོ་ཚེ་དབང་འཕྲིན་ལས་ལགས། ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་དེད་དཔོན་བསོད་ནམས་ཟླ་བ་བློན་པོ་ལགས། ལ་སྤྱི་ཚེ་བརྟན་དབང་ཕྱུག་ལགས། ས་གནས་འཐུས་ཚོགས་ཀྱི་ཚོགས་གཙོ། ས་གནས་རང་བདེན་ཚོགས་གཙོ། དགོན་སྡེ་ཁག་གི་མཁན་བླ་སྤྲུལ་རྣམ་པ་སོགས་གཞུང་དང་གཞུང་འབྲེལ་མིན་ཚོགས་སྡེ་ཁག་གི་སྐུ་ཚབ་རྣམ་པ། ས་གནས་ཀྱི་གནད་ཡོད་མི་སྣ། བོད་ཁྱིམ་དང་ལམ་སྒྲོན་སློབ་གྲྭས་གཙོས་སློབ་གྲྭ་ཁག་གི་སློབ་ཕྲུག་རྣམ་པ།
བོད་མི་དང་ས་གནས་ཡུལ་མི་སོགས་ཁྱོན་མི་གྲངས་ཁྲི་ཚོ་བརྒལ་བ་འདུ་འཛོམས་ཀྱིས་ཐོག་མར་ཚང་མ་སྐུ་བཞེངས་ཐོག་ལ་དྭགས་བོད་ཁྱིམ་སློབ་ཕྲུག་གིས་སྣེ་ཁྲིད་དེ་འཕགས་བོད་གཉིས་ཀྱི་རྒྱལ་གླུ་བཏང་གྲུབ་མཚམས་ལ་དྭགས་ནང་ཚོགས་ཀྱི་ཚོགས་གཙོ་ཚེ་དབང་འཕྲིན་ལས་ལགས་ཀྱིས་འཚམས་འདྲིའི་གསུང་བཤད་དང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོགས་སྦྱང་དང་སྒྲགས་གསུང་དོན། དེ་རིང་འདིར་ལ་དྭགས་བསོད་ནམས་གླིང་ལྷོ་བྱང་བོད་མི་ཡོངས་རྫོགས་ནས་མ་གྲོས་བསམ་པ་གཅིག་མཐུན་ཐོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་རྒྱུའི་གོ་སྐབས་བཀའ་དྲིན་ཐོབ་པ་འདི་ནི་ཤིན་ཏུ་ནས་བསོད་ནམས་ཀྱི་རྒྱུ་ཆེ་རུ་འགྲོ་བ་དང་། ལྷག་པར་དགའ་ལྡན་ཁྲི་ཟུར་རིན་པོ་ཆེ་མཆོག་དབུ་བཞུགས་ཐོག་བརྟན་བཞུགས་བསྟར་འབུལ་ཞུས་ཐུབ་པ་དང་༸གོང་ས་༸སྐྱབས་མགོན་ཆེན་པོ་མཆོག་གི་འཁྲུངས་སྐར་གཟབ་རྒྱས་ཞུས་ཐུབ་པ་འདི་ལ་འབྲེལ་ཡོད་ཆང་མར་གོ་སྐབས་འདིའི་བརྒྱུད་ཐུགས་རྗེ་ཆེ་ཞེས་ཞུ་རྒྱུ་ཡིན།
ཁ་སང་ང་སླེ་རུ་འབྱོར་བ་དང་ཉེ་འཁོར་དུ་བཅར་བ་ཡིན། ལ་དྭགས་ཡུལ་མི་དང་བོད་མི་སྤྱི་ཡོངས་དཔལ་འབྱོར་གནས་སྟངས་དང་ཕྱི་ནང་གི་ཤེས་ཡོན་ཐོག་དོ་སྣང་ཕྲན་བུ་ཆེ་རུ་ཕྱིན་པའི་རྣམ་པ་གསལ་པོ་མཐོང་བྱུང་། དེར་བརྟེན་དེ་རིང་གི་གོ་སྐབས་འདིའི་བརྒྱུད་མུ་མཐུད་ང་རང་ཚོའི་ཐུན་མོང་མིན་པའི་རིག་གཞུང་དང་ཆོས་དེ་དག་རྒྱུན་འཛིན་དར་སྤེལ་གནང་ཐུབ་དགོས་རྒྱུ་གལ་ཆེན་པོ་རེད་ཅེས་ཞུ་འདོད་བྱུང་།
དེ་བཞིན་བོད་ནང་སངས་རྒྱས་ཀྱི་བསྟན་པ་དར་ཁྱབ་རྒྱ་ཆེན་པོ་བྱུང་ཡོད། འོན་ཀྱང་ད་ལྟའི་དུས་སུ་རྒྱ་ནག་གཞུང་གི་སྲིད་བྱུས་ཐོག་ནས་གནས་སྟངས་གང་འདྲ་ཆགས་ཀྱི་ཡོད་མེད་ང་ཚོས་ཚོད་དཔག་ཞུ་ཚོད་མ་ཐུབ་པའི་གནས་སྟངས་ཆགས་ཡོད། དེར་བརྟེན་བཙན་བྱོལ་ནང་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་རྗེའི་བཀའ་དྲིན་ཉག་གཅིག་དང་དེ་བཞིན་རིས་མེད་དབུ་ཁྲིད་བླ་ཆེན་རྣམ་པས་བཀའ་དྲིན་ལ་བརྟེན་ནས་དེང་སང་གི་དུས་ཚོད་ལ་ནང་ཆོས་ཀྱི་སྒྲ་ཙམ་ཡང་མ་ཐོས་པའི་ནུབ་ཕྱོགས་ཀྱི་ལུང་པ་ཡིན་ནའང་འདྲ། དེ་བཞིན་ནང་ཆོས་ལ་དོ་སྣང་ཤུགས་ཆེ་རུ་འགྲོ་བ་ཞིག་དང་། ལྷག་པར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་རྗེའི་བཀའ་དྲིན་ཉག་གཅིག་ལ་བརྟེན་ནས་དེང་སང་ནུབ་ཕྱོགས་ཚན་རིག་གི་མི་སྣ་གྲགས་ཅན་གྱིས་ང་ཚོའི་ནང་ཆོས་ལ་དོ་ནང་སླེབས་པ་དེ་འདྲའི་གནས་སྟངས་ཆགས་ཡོད།
ང་ཚོས་གཙོ་བོ་ཤུགས་རྒྱག་ས་དེ་ཧི་མ་ལ་ཡའི་མི་རིགས་དང་ལ་དྭགས་དེ་ཚོ་གལ་ཆེན་པོ་ཆགས་ཡོད། སྔོན་མ་ཡིན་ནའང་ཁུ་ནུ་བླ་མ་རིན་པོ་ཆེ་དང་དེ་བཞིན་ད་ལྟའི་ཆར་ལ་དགའ་ལྡན་ཁྲི་ཟུར་རིན་པོ་ཆེ་མཆོག་གིས་དབུས་བསྟན་པའི་གཞི་རྐང་ཚུགས་པ་དེ་འདྲའི་ཁུངས་གཏུགས་ས་ལྟ་བུ་ཆགས་ཡོད། སངས་རྒྱས་ཀྱི་བསྟན་པ་དེ་ཉིད་ལ་འཆད་ཉན་དང་གཞུང་ཆེན་ཁག་ལ་སློབ་སྦྱོང་བྱེད་དགོས་རྒྱུའི་དུས་ཚོད་གལ་ཆེན་པོ་ཞིག་ཆགས་ཡོད།
བདེན་པ་གཉིས་ཀྱི་རྣམ་གཞག་དཔྱིས་ཕྱིན་པ་ཤེས་པར་ནང་པའི་གཞུང་ཆེན་ཁག་ལ་སློབ་སྦྱོང་བྱེད་དགོས་རྒྱུ་ཧ་ཅང་གལ་ཆེན་པོ་ཆགས་སྟབས་དེ་རིང་འདིར་འབྲེལ་ཡོད་དགེ་འདུན་པ་དང་བསྟན་འཛིན་གྱི་སྐྱེས་བུ་མང་པོ་ཞིག་ཕེབས་འདུག མ་འོངས་པར་ང་ཚོ་རེ་བ་བརྒྱག་སའི་གཞི་རྩ་ལྟ་བུ་ཆགས་ཡོད་སྟབས། འགན་འཁུར་མཁན་ཚང་མས་དེ་ཚོའི་ཐོག་ལྷོད་གཡེང་དུ་མ་སོང་བའི་ཐོག་ནས་སངས་རྒྱས་ཀྱི་བསྟན་པ་འདི་ཉིད་ཤེས་གྲུབ་གཉིས་ཀྱི་ཐོག་ནས་འཛིན་སྐྱོང་སྤེལ་ཐུབ་དགོས་རྒྱུ་གལ་ཆེན་པོ་རེད། ཅེས་དེ་རིང་གི་གོ་སྐབས་འདིའི་བརྒྱུད་ནས་གསོལ་འདེབས་ཞུ་ན་དྲན་བྱུང་ཞེས་གསུང་།
དེ་ནས་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་དེད་དཔོན་བསོད་ནམས་ཟླ་བ་བློན་པོ་ལགས་དང་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་གསུང་བཤད་གནང་གྲུབ་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཚན་རིག་ཀུན་གཏུས་རྒྱ་ཡིག་ཐོག་འཇམ་དབྱངས་རིན་ཆེན་ལགས་ཀྱིས་ཕབ་སྒྱུར་ཞུས་པ་དེ་ཉིད་དབུ་འབྱེད་མཛད་རྗེས་བཀའ་སློབ་སྩལ།།
