༢༠༡༧ ཟླ་ ༧ ཚེས་ ༡༤ རེས་གཟའ་པ་སངས།
སྐུ་པར། དགའ་ལྡན་ཕོ་བྲང་།
༄༅། །འདི་གའི་ཆེད་གཉེར་གསར་འགོད་པ་ཡེ་ཤེས་ཀུན་གྲགས་ལགས་ཀྱིས་ས་གནས་ནས་བཏང་གནས་ནང་འཁོད་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ནུབ་རར་ཆོས་འབྲེལ་ཉིན་མཐའ་མའི་སྐབས་ཚེ་དབང་བཀའ་དྲིན་བསྐྱངས་གྲུབ་མཚམས་བཀའ་སློབ་སྩལ་དོན།
ཁ་སང་ནས་ཆོས་འབྲེལ་བྱས་ཏེ་དེ་རིང་མཇུག་ཏུ་སྐྱེལ་བ་རེད། གནས་འདིར་དེ་རིང་བཀའ་ཆོས་ཀྱི་མཇུག་ཆགས་ཡོད་སྟབས། སྒྲོལ་དཀར་ཡིད་བཞིན་འཁོར་ལོའི་ཚེ་དབང་ཟིན་པ་ཡིན། སངས་རྒྱས་པའི་ཆོས་ནི་བསམ་བློ་གཏང་ནས་འགྲོ་དགོས་རྒྱུ་ཞིག་རེད། བསམ་བློ་གཏང་ཟེར་རྒྱུ་དེ་དད་པ་གཅིག་པུའི་མི་འགྲིག་པར་གཙོ་བོ་སློབ་སྦྱོང་བྱས་ནས་ཆོས་རབ་ཏུ་རྣམ་འབྱེད་ཀྱི་ཤེས་རབ་ཐོག་ནས་བློ་ལ་འགྱུར་བ་གཏང་དགོས་སྟབས། སློབ་སྦྱོང་བྱེད་རྒྱུ་ཧ་ཅང་གལ་ཆེན་པོ་རེད། ཐོག་མར་སྔོན་ལ་བོད་ཡིག་ཤེས་པར་བྱོས། དེ་ནས་གཙོ་བོ་བོད་ཡིག་ནང་ཡོད་པའི་གཞུང་དེ་ཚོའི་ཐོག་ནས་སོ་སོས་དཔེ་ཆ་ལྟ། འདིར་དཔེ་ཆ་ཤེས་མཁན་གྱི་མཁན་པོ་དང་དགེ་བཤེས་ཁྱེད་རང་ཚོའི་ངོས་ནས་དུས་དུས་ལ་བགྲོ་གླེང་འཚོགས་རྒྱུ་ལྟ་བུ་ངོས་ཀྱིས་མར་འགྲེལ་བཤད་བརྒྱབ་པ་དེ་དག་རིམ་པས་སློབ་སྦྱོང་བྱེད་ནས་ཤེས་པར་བྱེད་དགོས།
སྐུ་པར། དགའ་ལྡན་ཕོ་བྲང་།
ངོས་ལ་ཆ་བཞག་ན་སློབ་སྦྱོང་བྱས་ནས་ཤེས་པ་རེད། ཁྱེད་རང་ཚོས་སངས་རྒྱས་པའི་ཆོས་ཀྱི་ལྟ་གྲུབ་དང་། ལྟ་གྲུབ་དེ་དང་འབྲེལ་བའི་ཐོག་ནས་ཆོས་ཉམས་ལེན་བྱེད་སྟངས་དེ་ཚོའི་གྲས་སློབ་སྦྱོང་བྱེད་ནས་ཤེས་དགོས་རྒྱུ་ཧ་ཅང་གལ་ཆེན་པོ་རེད། འདི་སེམས་ལ་ཞོག ཉིན་ཤས་རིང་འདིར་ཆོས་འབྲེལ་བྱེད་རྒྱུའི་གོ་སྐབས་བྱུང་བར་ངོས་རང་དགའ་པོ་བྱུང་། ཁྱེད་རང་ཚོ་ཡང་དགའ་པོ་བྱུང་ཡོད་ཀྱི་རེད། གོ་སྒྲིག་བྱེད་མཁན་ཁྲིག་སེ་རིན་པོ་ཆེ་མཆོག་གིས་དབུ་མཛད་པའི་ལས་བྱེད་ཚང་མས་ཧུར་ཐག་འབད་ཐག་བྱས་ནས་ལེགས་གྲུབ་ཕུན་སུམ་ཚོགས་པ་བྱུང་བ་རེད། ཚང་མར་ཐུགས་རྗེ་ཆེ་ཞུ་གི་ཡིན། དེ་ནས་མ་འོངས་པར་ང་ཚོ་མཇལ་རྒྱུ་ཡོང་གི་རེད། ཅེས་བཀའ་སློབ་སྩལ་རྗེས་ལ་དྭགས་ནུབ་ར་ཁུལ་དུ་རེ་ཞིག་ཆོས་འབྲེལ་མཇུག་སྒྲིལ་མཛད།།
