༢༠༡༧ ཟླ་ ༧ ཚེས་ ༢༦ རེས་གཟའ་ལྷག་པ།

༄༅། །ཕྱི་ལོ་ ༢༠༡༧ ཟླ་ ༧ ཚེས་ ༢༦ རེས་གཟའ་ལྷག་པའི་ཉིན་གྱི་སྔ་དྲོ་ཆུ་ཚོད་ ༧ ཐོག་རྒྱལ་གཅེས་པ་བསྟན་འཛིན་ཆོས་དབྱིངས་ལགས་ཀྱི་སྐུ་ཕུང་བཞུགས་སྒར་ལྷ་རྒྱལ་རིའི་མདུན་ཐང་དུ་གདན་ཞུས་ཀྱིས་དམ་པ་ཁོང་གི་ཕ་མ་གཉིས་དང་སྤུན་མཆེད།  བོད་མི་མང་སྤྱི་འཐུས་ཚོགས་གཙོ་སྦྲེལ་པོ།  བོད་མིའི་སྒྲིག་འཛུགས་ཀྱི་ནང་སྲིད་དང་དཔལ་འབྱོར།  ཤེས་རིག་བཅས་ལས་ཁུངས་སོ་སོའི་བཀའ་བློན་རྣམ་པ།  དེ་བཞིན་སྤྱི་འཐུས་གཞན་ཁག་གཅིག་དང་། གཉུག་མར་གནས་པ་དང་གློ་བུར་དུ་ལྷགས་པའི་སེར་སྐྱ་མང་ཚོགས། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་གྱིས་གཙོས་རྒྱུན་ལས་རྣམ་པ་སོགས་ཁྱོན་མི་གྲངས་བརྒྱ་ཕྲག་བརྒལ་བ་འདུ་འཛོམས་ཀྱིས་ཐོག་མར་བོད་རྒྱལ་ཁབ་ཆེན་པོ་རྒྱལ་གླུ་བཏང་།

དེ་ནས་རྒྱལ་གཅེས་པ་འདས་གསོན་ཡོངས་ལ་གདུང་སེམས་མཉམ་སྐྱེ་མཚོན་ཆེད་མྱ་ངན་གུས་འདུད་མཚོན་སླད་ངག་བཅད་སྐར་མ་གཅིག་ཞུས་གྲུབ་མཚམས་བོད་ཀྱི་གཞོན་ནུ་ཚོགས་པའི་ཚོགས་གཞོན་དང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གསུང་བཤད་གནང་རྗེས་རྒྱལ་གཅེས་པ་བསྟན་འཛིན་ཆོས་དབྱིངས་ལགས་ཀྱི་ཕ་ངག་དབང་མཁས་གྲུབ་ལགས་ཀྱིས་རྒྱལ་གཅེས་པ་བསྟན་འཛིན་ཆོས་དབྱིངས་ལགས་ཀྱིས་རང་ལུས་མེར་སྲེག་བཏང་བའི་བརྒྱུད་རིམ་ཁག་ངོ་སྤྲོད་གནང་བ་དང་འབྲེལ་བོད་རིགས་སློབ་མ་རྣམས་ནས་བོད་ཀྱི་རྩ་དོན་ཆེད་རང་ལུས་མེར་སྲེག་གི་ཐབས་ལམ་མ་གདམ་པར།  ཤེས་ཡོན་ཐོག་ནས་འཐབ་རྩོད་རྒྱུན་སྐྱོང་བྱ་རྒྱུ་ཧ་ཅང་གལ་ཆེ་སྐོར་དང་། ལྷག་པར་བོད་ཀྱི་སྐད་ཡིག་ལ་དོ་སྣང་གནང་དགོས་པའི་འབོད་སྐུལ་ཤུགས་ཆེ་གནང་ཡོད།

དེ་རྗེས་རྒྱལ་གཅེས་པ་ཁོང་གི་སྐུ་ཕུང་ལ་མཇལ་དར་སྒྲོན་རྗེས།  བྱང་ཆུབ་སེམས་མཆོག་རིན་པོ་ཆེ་གསུང་བཞིན་དུ་དམ་པ་ཁོང་གི་སྐུ་ཕུང་ཞུགས་འབུལ་ཆེད་དུར་ཁྲོད་དུ་གདན་འདྲེན་ཞུས་ནས་སྨོན་ལམ་གསུང་དོན་དང་སྦྲགས་སྔ་དྲོའི་ཆུ་ཚོད་ ༩།༣༠ ཙམ་ལ་སྐུ་ཕུང་ཞུགས་འབུལ་གནང་ཡོད།

སྤྱིར་རྒྱ་རིགས་རང་དབང་དང་མང་གཙོ་འཐབ་རྩོད་པ་སྐུ་ཞབས་ལིའུ་ཞའོ་པོ་མཆོག་འདས་གྲོངས་སུ་གྱུར་བར་ཕྱི་ཚེས་ ༢༡ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མཆོད་འབུལ་སྨོན་ལམ་ཚོགས་ཡོད།  སྐབས་དེར་དཔལ་ལྡན་སྲིད་སྐྱོང་མཆོག་གིས། བསྟན་འཛིན་ཆོས་དབྱིངས་ལགས་ཀྱི་རྒྱལ་གཅེས་མངོན་འདོད་ལ་རྒྱབ་སྐྱོར་ཡོད་ཀྱང་། བོད་མི་ས་ཡ་དྲུག་ལས་མེད་སྟབས་བོད་མི་རེ་རེའི་ཚེ་སྲོག་ཧ་ཅང་རྩ་བ་ཆེན་པོ་ཡིན་པར་བརྟེན་ང་ཚོ་གསོན་པོར་གནས་པའི་ཐོག་ནས་འཐབ་རྩོད་ལ་འབད་དགོས་པ་དང་།   བོད་ནང་དུ་མཚོན་ན་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་འོག་བོད་མི་ཚོས་རང་ལུས་མེར་སྲེག་གཏོང་བཞིན་ཡོད་པ་ང་ཚོས་ཤེས་ཀྱི་ཡོད།  འོན་ཀྱང་རང་དབང་ལུང་པའི་ནང་ཡོད་པའི་བོད་མི་ཚོར་བོད་ཀྱི་རྩ་དོན་བསྒྲུབ་ཆེད་ཐབས་ལམ་འདྲ་མིན་སྣ་ཚོགས་ཡོད་སྟབས་རང་ལུས་མེར་སྲེག་གི་ལས་འགུལ་རིགས་མ་སྤེལ་རོགས་ཞེས་དུས་རྟག་ཏུ་འབོད་སྐུལ་ཞུ་བཞིན་ཡོད་སྐོར་གསུང་ཡོད་པ་བཅས།།