༢༠༡༧ ཟླ་ ༦ ཚེས་ ༢༣ རེས་གཟའ་པ་སངས།
༄༅། །ཨ་རིའི་གྲོས་ཚོགས་འཐུས་མི་ ༣༧ མཚན་རྟགས་འཁོད་པའི་ཞུ་སྙན་ཞིག་སྲིད་འཛིན་སྐུ་ཞབས་ཌོ་ནལ་ཊམ་མཆོག་ལ་ཕུལ་ནས་ཨ་རིའི་ཕྱི་སྲིད་ལས་ཁུངས་ནང་བོད་དོན་དམིགས་བསལ་འབྲེལ་མཐུད་པ་མགྱོགས་མྱུར་བསྐོ་གཞག་གནང་དགོས་པའི་རེ་འདུན་ཤུགས་ཆེ་བཏོན་འདུག
ཞུ་སྙན་དེའི་ནང་འཁོད་དོན། བོད་ཀྱི་ཐུན་མིན་ཆོས་དང་རིག་གཞུང་། སྐད་ཡིག་སྲུང་སྐྱོབ་བྱ་རྒྱུ་ཙམ་མ་ཟད། བོད་མིའི་གཞི་རྩའི་འགྲོ་བ་མིའི་ཐོབ་ཐང་ཡང་སྲུང་སྐྱོབ་བྱ་རྒྱུ་དེ་མཚུངས་གལ་གནད་ཆེན་པོ་ཡིན། གནད་དོན་འདི་དག་ཐད་ཨ་རིའི་མང་ཚོགས་རྣམས་ཀྱིས་སེམས་འཚབ་ཧ་ཅང་གནང་བཞིན་ཡོད་པ་མ་ཟད། གྲོས་ཚོགས་ནང་སྤྱི་མཐུན་དང་མང་གཙོ་ཚོགས་པ་གཉིས་ཀས་ཐུན་མོང་ཐོག་སེམས་འཚབ་གནང་བཞིན་ཡོད། དེ་སྔ་ཕྱི་ལོ་ ༢༠༠༢ ལོར་ཨ་རིའི་གྲོས་ཚོགས་ནང་གཏན་འབེབས་གནང་བའི་བོད་མིའི་ཐོག་འཛིན་པའི་སྲིད་བྱུས་ཕྱི་ལོ་ ༢༠༠༢ ཞེས་པ་དེ་ཡང་གཙོ་བོ་བོད་མིའི་ཐུན་མིན་ངོ་བོ་སྲུང་སྐྱོབ་བྱ་རྒྱུའི་མངོན་འདོད་སྒྲུབ་ཐབས་ཆེད་ཡིན་ཞིང་། དེའི་ཆེད་ཨ་རིའི་ཕྱི་སྲིད་ལྷན་ཁང་དུ་བོད་དོན་དམིགས་བསའ་འབྲེལ་མཐུད་པ་ཞིག་བསྐོ་གཞག་གནང་སྲོལ་ཡོད་པ་དང་། འབྲེལ་མཐུད་པ་དེའི་ལས་འགན་གཙོ་བོ་ནི་བོད་ཀྱི་ཐུན་མིན་ཆོས་དང་རིག་གཞུང་། སྐད་ཡིག མི་རིགས་ཀྱི་ངོ་བོ་བཅས་སྲུང་སྐྱོབ་ཐོག་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ཐད་ཤུགས་རྒྱག་རྒྱུ་གཙོ་བོ་རེད།
ཕྱི་ལོ་ ༢༠༠༢ ལོར་བོད་དོན་རྒྱབ་སྐྱོར་གྱི་སྲིད་བྱུས་དེ་གཏན་འབེབས་བྱུང་རྗེས་བོད་དོན་དམིགས་བསལ་འབྲེལ་མཐུད་པའི་གནས་རིམ་དེ་དྲུང་གཞོན་ལས་རོགས་ཀྱི་གནས་རིམ་ཐོག་བསྐོ་གཞག་གནང་ཡོད། དེར་བརྟེན་ཐེངས་འདིར་ང་ཚོས་སྲིད་འཛིན་མཆོག་ནས་ལམ་སྲོལ་དེ་མུ་མཐུད་ནས་རྒྱུན་སྐྱོང་གནང་སྟེ་བོད་མིར་སྔར་མུས་བཞིན་རྒྱབ་སྐྱོར་གྱི་རྣམ་པ་གསལ་བཏོན་གནང་དགོས་པ་མ་ཟད། རྒྱ་ནག་གཞུང་ལའང་ང་ཚོའི་བོད་མིའི་འགྲོ་བ་མིའི་ཐོབ་ཐང་སྲུང་སྐྱོབ་ཐད་ཆོད་སེམས་རྒྱུན་སྐྱོང་བྱེད་བཞིན་ཡོད་པའི་བརྡ་ལན་ཞིག་སྤྲད་དགོས།
ད་ལྟའི་དུས་སྐབས་འདི་ནི་བོད་མི་ཚོར་ཧ་ཅང་གཉན་འཕྲང་ཆེ་བའི་དུས་སྐབས་ཤིག་ཆགས་ཡོད། དཔེར་ན་དེང་སྐབས་རྒྱ་ནག་གཞུང་གིས་འཛམ་གླིང་ནང་བོད་བརྒྱུད་ནང་བསྟན་གྱི་སློབ་གཉེར་ཁང་ཆེ་ཤོས་སུ་གྲགས་པ་གསེར་རྟ་བླ་རུང་སྒར་གཏོར་བཤིག་ཚབས་ཆེ་བཏང་དང་གཏོང་བཞིན་པའི་གནས་སྟངས་འོག་ནས་བོད་མིའི་འགྲོ་བ་མིའི་ཐོབ་ཐང་དང་ཆོས་དད་རང་དབང་ཐོག་རྒྱ་ནག་གཞུང་གིས་དམ་བསྒྲགས་སུན་བཙེར་ཇི་ལྟར་བཟོ་བཞིན་ཡོད་པ་ཧ་ཅང་གསལ་པོ་མཚོན་ཐུབ། ཕྱི་རྒྱལ་མི་སྣ་ཁག་གཅིག་དམ་བསྒྲགས་ཡོད་མེད་ལ་མ་ལྟོས་པར་དཀའ་ངལ་ཧ་ཅང་མང་པོར་གདོང་ལེན་བྱས་མཐར་བོད་ནང་བསྐྱོད་ཐུབ་པ་དང་། ཁོང་ཚོས་བརྗོད་པ་ལྟར་ན་བོད་ནང་གི་ས་ཆ་གང་སར་ཉེན་རྟོག་མི་སྣ་བཀྲམ་ཡོད་པ་མ་ཟད། ས་གནས་གཅིག་ནས་གཅིག་ཏུ་རང་དབང་ཐོག་ནས་འགྲོ་མ་བཅུག་པར་འགག་སྒོ་ཧ་ཅང་མང་པོ་བརྒྱུད་ནས་འགྲོ་དགོས་པ་སོགས་མདོར་ན་བོད་མི་རྣམས་དུས་རྟག་ཏུ་འཇིགས་སྣང་འོག་གནས་བཞིན་ཡོད་པ་འགྲེལ་བརྗོད་བྱེད་བཞིན་ཡོད།
ལྷག་པར་ཕྱི་ལོ་ ༢༠༡༠ ཕྱི་ཟླ་ ༡ ནས་ད་བར་༸གོང་ས་ཏཱ་ལའི་བླ་མ་མཆོག་གི་སྐུ་ཚབ་དང་རྒྱ་ནག་འགོ་ཁྲིད་དབར་གྲོས་མོལ་སྐྱར་གསོ་བྱུང་མེད། སྤྱིར་བོད་མི་ས་ཡ་མང་པོས་དེ་སྔའི་ཨ་རིའི་སྲིད་གཞུང་རིམ་བྱོན་གྱིས་རྒྱབ་སྐྱོར་གནང་བའི་བོད་རྒྱ་གྲོས་མོལ་སྐྱར་གསོ་ཡོང་རྒྱུར་བཟང་ཕྱོགས་ཀྱི་རེ་བ་ཧ་ཅང་བཅོལ་བཞིན་ཡོད། དཀའ་ངལ་དེ་དག་ཡོངས་རྫོགས་སེལ་ཆེད་གོམ་པ་དང་པོ་དེ་བོད་དོན་དམིགས་བསལ་འབྲེལ་མཐུད་པ་བསྐོ་གཞག་གནང་རྒྱུ་དེ་རེད། ཅེས་འཁོད་འདུག །
