༢༠༡༧ ཟླ་ ༦ ཚེས་ ༢༡ རེས་གཟའ་ལྷག་པ།

༄༅། །ཕྱི་ལོ་ ༢༠༡༧ ཟླ་ ༦ ཚེས་ ༢༡ ཉིན་གངས་སྐྱིད་གཉའ་ཁྲི་ཚོགས་ཁང་དུ་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་དངོས་གྲུབ་ཚེ་རིང་མཆོག་གིས་ཤེས་རིག་ལས་ཁུངས་ནས་འདོན་སྤེལ་ཞུས་པའི་ཤེས་རིག་བྱིས་པའི་འགུལ་བརྙན་༼དྲན་པ་བརྗེད་སླ་བའི་ཨ་ཁུ་ཕག་པ་དང་། བོད་སྐད་དུ་སྒྱུར་འཇུག་ཞུས་པའི་སངས་རྒྱས་ཀྱི་མདོ།༽ཞེས་པའི་འགུལ་བརྙན་ཁག་དབུ་འབྱེད་གནང་ཡོད། 

དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༤ ཙམ་ལ་དབུ་འབྱེད་མཛད་སྒོའི་སྐུ་མགྲོན་གཙོ་བོ་ཤེས་རིག་བཀའ་བློན་དངོས་གྲུབ་ཚེ་རིང་མཆོག ཤེས་རིག་དྲུང་ཆེ་སྣང་ས་ཆོས་སྒྲོན་ལགས་དང་ཀརྨ་སེངྒེ་ལགས། ཤེས་རིག་བརྡ་ཆད་ཚན་པའི་འགན་འཛིན་ཟུར་པ་ཀརྨ་སྨོན་ལམ་ལགས། བོད་ཀྱི་སྒྲ་བསྒྱུར་ཁང་གི་འགན་འཛིན་བསྟན་འཛིན་ཆོས་འཕེལ་ལགས་དང་ལས་རོགས་མིག་དམར་ཆུང་བདག་ལགས། འཇམ་དཔལ་འགུལ་བརྙན་ཁང་གི་འགན་འཛིན་འཇམ་དཔལ་རྡོ་རྗེ་ལགས། ཤེས་རིག་ལས་ཁུངས་ཀྱི་ལས་བྱེད་ཁག་གཅིག དཔེ་སྟོན་སློབ་གྲྭའི་འཛིན་རིམ་གསུམ་པའི་སློབ་ཕྲུག་དང་དེ་བཞིན་ཕྱི་ནང་གི་གསར་འགོད་པ་བཅས་ཚང་འཛོམས་ཀྱི་ཐོག་མར་ཤེས་རིག་ཤེས་ཡོན་འགན་འཛིན་ཚེ་རིང་བསམ་གྲུབ་ལགས་ཀྱིས་ངོ་སྤྲོད་གསུང་བཤད་གནང་གྲུབ་མཚམས་སྐུ་མགྲོན་གཙོ་བོ་མཆོག་གིས་ཤེས་རིག་བྱིས་པའི་འགུལ་བརྙན། animation དྲན་པ་བརྗེད་སླ་བའི་ཨ་ཁུ་ཕག་པ་དང་། བོད་སྐད་དུ་སྒྱུར་འཇུག་ཞུས་པའི་སངས་རྒྱས་ཀྱི་མདོ།  ཞེས་པ་དབུ་འབྱེད་གནང་སྟེ་འགུལ་བརྙན་སྟོན་གནང་ཡོད། 

དེ་རྗེས་སྐུ་མགྲོན་གཙོ་བོ་ཤེས་རིག་བཀའ་བློན་མཆོག་གིས་འཚམས་འདྲི་དང་འབྲེལ་གསུང་བཤད་གནང་དོན། བར་ལམ་ནས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱིས་བོད་ཀྱི་སྐད་ཡིག་དང་། ལྷག་པར་སློབ་གྲྭ་ཁག་གི་ནང་བོད་སྐད་ཡག་པོ་དང་གཙང་མ་རྒྱག་ཐུབ་རྒྱུའི་ཐོག་དང་། དེ་བཞིན་སློབ་སྦྱོང་ཡར་རྒྱས་ཡོང་སླད་ལས་གཞི་འདྲ་མིན་མང་པོ་ཞིག་སྤེལ་བ་རེད། གོང་དུ་ཤེས་ཡོན་ལྷན་ཚོགས་ཀྱི་འགན་འཛིན་ཚེ་རིང་བསམ་གྲུབ་ལགས་ཀྱིས་གསུང་པ་ལྟར། ཤེས་རིག་ལས་ཁུངས་ཀྱི་ཚོགས་ཆེན་སྔ་རྗེས་ནང་དང་།  དེ་བཞིན་འབྲེལ་ཡོད་སློབ་གྲྭ་ཁག་གི་རྒན་ལགས་རྣམ་པ་ཚོ་དང་མཉམ་དུ་ཚོགས་འདུ་ཚོགས་པའི་སྐབས་སུའང་འགུལ་བརྙན་གྱི་ལམ་ནས་སློབ་ཕྲུག་ཚོར་བོད་པའི་སྐད་ཡིག་སློབ་ཁྲིད་བྱེད་རྒྱུའི་ཐབས་ཤེས་གནང་དགོས་འདུག  ཅེས་དགོངས་འཆར་མང་པོ་ཕེབས་ཀྱི་འདུག  ཤེས་རིག་དྲུང་ཆེ་རྣམ་གཉིས་དང་ཤེས་ཡོན་ཐོག་ཕྱག་ལས་གནང་མཁན་ཚང་མ་སྐབས་རེ་ཚོགས་འདུ་ཚོགས་པའི་སྐབས་བོད་པའི་ཤེས་ཡོན་སྒྲོམ་གཞིའི་ནང་ཨིན་སྐད་ཐོག་ཞུས་པ་ཡིན་ན།  Children’s Literature ཟེར་གྱི་རེད། བྱིས་པའི་ཆེད་དུ་རྩོམ་རིགས་ཟེར་ནའང་གང་ལྟར་དེ་འདྲའི་དགོས་མཁོ་ཡོད་པ་གང་ཞིག་ལ་ཆ་ཚང་མ་ཚང་བ་ལྟ་བུ་ཞིག་རེད་འདུག

ད་བར་རྩོམ་སྒྲུང་དང་། ཕྲུ་གུ་རང་གི་ཐོག་ལ་དམིགས་པའི་སྒྲུང་དེབ་ལྟ་བུར་ཆ་བཞག་པ་ཡིན་ན་བར་ལམ་བོད་ཁྱིམ་དང་། སཾ་བྷོ་ཌ་བོད་སློབ། བོད་ཀྱི་དཔེ་མཛོད་ཁང་། ཤེས་རིག་རྩོམ་སྒྲིག་སྡེ་ཚན་བཅས་ནས་དཔེ་དེབ་ཕལ་ཆེར་ ༣༠༠ ཙམ་ཕྲུ་གུའི་ཆེད་དུ་དམིགས་ཏེ་དཔར་སྐྲུན་གནང་བ་ལས་གཞན་མི་འདུག དེར་བརྟེན་ཕྲུ་གུའི་ནང་ནས་ཀྱང་བོད་ཡིག་ཐོག་དོ་སྣང་བྱེད་དགོས་རེད་ཟེར་དུས་སྒྲུང་དེབ་ཡོད་པ་ཚང་མ་ཀློག་ཟིན་པ་ཡིན། སྒྲུང་དེབ་གསར་པ་འཁྱེར་ཤོག་ཟེར་གྱི་འདུག ཅེས་གསུང་མཁན་ཕ་མ་མང་པོ་ཡོང་བཞིན་འདུག འདི་ང་ཚོ་འཛིན་སྐྱོང་གི་ལས་ཀ་བྱེད་མཁན་ཚོར་དངོས་གནས་གདོང་ལེན་བྱེད་དགོས་པའི་གནས་སྟངས་ཆགས་ཀྱི་འདུག  ཕྲུ་གུ་སྐྱེས་ནས་ཟླ་བ་དྲུག་ཙམ་ནས་འགུལ་བརྙན་གྱི་ལྟས་མོ་སྟོན་པ་ཡིན་ན། འདིའི་མྱོང་བ་ལྟ་བུ་བླང་ཐུབ་ཀྱི་འདུག དཔེར་ན། ང་ཚོ་ཕ་མ་ཚོ་ནང་ལ་སྡོད་པའི་སྐབས་སུ་ཕྲུ་གུས་ཁ་ལག་བཟའ་རྒྱུར་རྙོག་གྲ་ཤོད་སྐབས་ལྟས་མོ་ཞིག་བསྟན་པ་ཡིན་ན་ཕྲུ་གུ་དེ་ལྟས་མོར་མགོ་བོ་འཁོར་བར་བརྟེན་ཕ་མས་ཁ་ལག་མགྱོགས་པོ་ཕྲུ་གུ་དེའི་ཁའི་ནང་བླུགས་རྒྱུ་དེ་འདྲ་བྱེད་བཞིན་ཡོད།  དེས་ཕྲུ་གུའི་སེམས་ཁམས་ཐོག་ལ་ཤུགས་རྐྱེན་ཆེན་པོ་ཐེབས་ཀྱི་ཡོད་པ་དངོས་ཡོད་གནས་ཚུལ་རེད་འདུག འོན་ཀྱང་འདི་ཡོད་རེད་དམ་ཅེ་ན་སྤྱི་ཡོངས་ནས་ཕྱག་ལས་གནང་མཁན་དེ་འདྲ་འདུག འོན་ཀྱང་ཕྲུ་གུ་རང་ལ་དམིགས་པ་དེ་འདྲ་མེད་པའི་བཟོ་འདྲ་རེད་འདུག འདིའི་ཐོག་ལ་ཤེས་ཡོན་ལྷན་ཚོགས་ནས་དམིགས་བསལ་འཁུར་བཞེས་ནས་དེ་འདྲའི་ལས་འཆར་གཅིག་སྤེལ་བ་འདི་དང་པོ་ཆགས་བཞིན་འདུག འདིའི་ཐོག་ནས།  དྲན་པ་བརྗེད་སླ་བའི་ཨ་ཁུ་ཕག་པ། ཟེར་བ་འདི་དང་པོ་རང་ནས་རྣམ་རྟོག་གི་བཟོ་འདྲ་ཨ་ཁུ་ཕག་པ་ཞེས་དེ་འདྲ་གང་ཡིན་ནམ་ཞེས་ད་གིན་གསུངས་པ་ནང་བཞིན་འདི་མར་འབྲི་བ་དང་སྟོན་དགོས་དུས་ལས་ཀ་ཧ་ཅང་མང་པོ་རེད་འདུག འགྲོ་སོང་ཧ་ཅང་ཆེན་པོ་རེད་འདུག ང་ཚོ་འདིའི་ནང་ལ་འཛུལ་ནས་ཧ་གོ་བ་མ་གཏོགས་དེ་མིན་ང་ཡང་སྔོན་མ་ལས་སླ་པོ་ཞིག་ཡིན་སྙམ་པའི་བསམ་བློ་བཏང་བ་ཡིན། ད་ལྟ་གསུངས་པ་ནང་བཞིན་སྐར་མ་གཅིག་རིང་ལས་ཀ་བྱེད་དུས་སྒོར་འབུམ་གཅིག་ཙམ་འགྲོ་བཞིན་འདུག སྐར་ཆ་གཅིག་གི་ནང་པར་རིས་ཉི་ཤུ་སུམ་བཅུ་བརྒྱག་དགོས་ཀྱི་འདུག དེ་འདྲ་ཡིན་དུས་ལས་ཀ་བྱེད་མཁན་ཧ་ཅང་གིས་དཀའ་ལས་ཁག་པོ་རེད་འདུག ཅེས་སོགས་ཀྱི་གསུང་བཤད་གནང་རྗེས་ཀུན་དགའ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་། དེ་ནས་གསོལ་ཇ་ཞལ་ཏོག་ལ་རོལ་རྗེས་མཛད་སྒོ་གྲོལ་ཡོད་པ་བཅས། །