༢༠༡༧ ཟླ་ ༦ ཚེས་ ༢༧ རེས་གཟའ་མིག་དམར།
༄༅། །ཕྱི་ལོ་ ༢༠༡༧ ཟླ་ ༦ ཚེས་ ༢༦ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་གཙོས་ཤེས་རིག་བཀའ་བློན་དངོས་གྲུབ་ཚེ་རིང་མཆོག་དང་། ཤེས་རིག་དྲུང་ཆེ་ཀརྨ་སེངྒེ་ལགས་བཅས་ཀྱིས་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ CBSE ཀྱི་འགན་འཛིན་སྐུ་ཞབས་རཱ་ཇེཤ་ཀུ་མཱར་ཅཏུརྦེདི་ Rajesh Kumar Chaturvedi མཆོག་ནང་མི་ལྷན་རྡ་སར་སྤྲོ་འཆམ་ཕེབས་པར་མཇལ་འཕྲད་གནང་འདུག
སྐུ་མགྲོན་རྣམ་པར་ཆོས་ནོར་གསོལ་མགྲོན་ཁང་དུ་དགོང་མོའི་གསོལ་ཚིགས་འདེགས་འབུལ་ཞུས་པ་དང་སྦྲགས། དཔལ་ལྡན་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱི་ལྷན་ཁང་ཁག་ངོ་སྤྲོད་ཞིབ་ཕྲ་གནང་བ་དང་འབྲེལ་སྐུ་ཞབས་རཱ་ཇེཤ་ཀུ་མཱར་ཅཏུརྦེདི་མཆོག་ལ་དྲན་རྟེན་གྱི་ཚུལ་དུ་སྟོན་པའི་ཞལ་ཐང་ཞིག་ཕྱག་རྟགས་སུ་འབུལ་ལམ་ཞུས་མཚམས་ཁོང་གིས་ཐུགས་རྗེ་ཆེ་ཞུ་དང་སྦྲགས་འཚམས་འདྲི་ཞུས་འདུག་པ་བཅས།།
