༢༠༡༧ ཟླ་ ༦ ཚེས་ ༢༢ རེས་གཟའ་ཕུར་བུ།

༄༅། །འཇར་མན་གྱི་སྲིད་འཛིན་ཟུར་པ་སྐུ་ཞབས་ཧེལ་མེ་ཊི་ཀོལ་ Helmut Kohl  མཆོག་ཟླ་འདིའི་ཕྱི་ཚེས་ ༡༦ ཉིན་དགུང་གྲངས་ ༨༧ ཐོག་འདས་གྲོངས་སུ་གྱུར་བར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་གདུང་སེམས་མཉམ་སྐྱེའི་ཐུགས་གསོའི་འཕྲིན་ཡིག་གཅིག་དམ་པ་ཁོང་གི་སྐུ་ཟླར་ཕུལ་བའི་ནང་འཁོད་དོན། འཇར་མན་གྱི་སྲིད་འཛིན་ཟུར་པ་སྐུ་ཞབས་ཧེལ་མེ་ཊི་ཀོལ་མཆོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་བྱུང་བར་ང་རང་ཧ་ཅང་བློ་ཕམ་བྱུང་།

 དམ་པ་ཁོང་ནི་འཛམ་གླིང་དམག་ཆེན་གཉིས་པའི་རྗེས་འཇར་མན་སྲིད་འཛིན་ཡུན་རིང་ཤོས་གནང་མཁན་གྱི་རླབས་ཆེན་དབུ་ཁྲིད་ཁྲོད་གཅིག་ཡིན་པ་མ་ཟད།   ཡུ་རོབ་སྤྱི་མཐུན་ཚོགས་པ་གསར་འཛུགས་གནང་མཁན་གྲས་ཤིག་ཀྱང་ཡིན། ཁོང་གི་སྲིད་འཛིན་ལས་ཡུན་རིང་འཇར་མན་ཤར་ནུབ་གཅིག་ཏུ་ཟླ་སྒྲིལ་ཐུབ་པ་དང་།  ཁྱིམ་མཚེས་རྒྱལ་ཁབ་ཕ་རན་སི་དང་མཐུན་ལམ་གོང་མཐོ་བཏང་ཐུབ་པ་སོགས་རླབས་ཆེན་གྱི་མཛད་བྱས་དེ་དག་ནི་འཛམ་གླིང་གཞན་གྱི་དབུ་ཁྲིད་རྣམས་ལ་མིག་དཔེ་འོས་པ་ཞིག་ཏུ་གྱུར་ཡོད།

ང་ཚོས་དམ་པ་ཁོང་ནི་བོད་ཀྱི་གྲོགས་པོ་ཞིག་ལ་ངོས་འཛིན་ཞུ་བཞིན་ཡོད།  ལྷག་པར་དམ་པ་ཁོང་ཕྱི་ལོ་ ༡༩༨༧ ལོར་བོད་ནང་ཕེབས་པར་བརྟེན་བོད་མི་རྣམས་ལ་བཟང་ཕྱོགས་ཀྱི་རེ་བ་རྒྱག་གཞི་ཆེན་པོ་ཞིག་ཏུ་གྱུར་ཐུབ་པ་བྱུང་ཡོད།  དེར་བརྟེན་ངས་བོད་མིའི་སྒྲིག་འཛུགས་ཀྱི་ཚབ་ཞུས་ནས་འཇར་མན་གཞུང་མང་གཉིས་ལ་ཐེངས་འདིར་སྙིང་ཐག་པ་ནས་སེམས་གསོ་ཞུ་རྒྱུ་ཡིན། ཞེས་འཁོད།།