༢༠༡༧ ཟླ་ ༦ ཚེས་ ༡༢ རེས་གཟའ་ཟླ་བ།
༄༅། །བོད་མིའི་སྒྲིག་འཛུགས་བཀའ་ཤག་གིས་འདི་ལོ་ནི་རྒྱལ་སྤྱིའི་བོད་དོན་ལས་འགུལ་གྱི་ལོར་སྲུང་བརྩི་གནང་རྒྱུའི་གསལ་བསྒྲགས་སྔོན་སོང་ལྟར། ཕྱི་ལོ་ ༢༠༡༧ ཟླ་ ༦ ཚེས་ ༩ ཉིན་སུད་སི་གྲོང་ཁྱེར་ཇི་ནི་ཝའི་ནང་དུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༣༥ འཚོགས་བཞིན་པའི་དུས་སྐབས་དང་བསྟུན་ཅེག་སྤྱི་མཐུན་རྒྱལ་ཁབ་དང་ཨིན་ཡུལ། ཕ་རན་སི། འཇར་མ་ནི། ཨི་ཊ་ལི། སུད་སི་བཅས་ནས་བོད་མི་དང་བོད་དོན་རྒྱབ་སྐྱོར་བ་བཅས་ཁྱོན་མི་གྲངས་སྟོང་ཕྲག་མང་པོས་གྲོང་ཁྱེར་ཇི་ནི་ཝའི་ནང་བོད་དོན་གོམ་བགྲོད་ཀྱི་ལས་འགུལ་སྤེལ་འདུག
སྤྱིར་ལས་འགུལ་གོ་སྒྲིག་གནང་མཁན་སུད་སི་དང་ལེག་ཊེན་སི་ཊ་ཡིན་བོད་རིགས་སྤྱི་མཐུན་ཚོགས་པ་དང་། སུད་བོད་མཛའ་འབྲེལ་ཚོགས་པ། རྒྱལ་སྤྱིའི་བོད་དོན་ལས་འགུལ་ཁང་བཅས་ཡིན་འདུག སྐབས་དེར་གཏམ་བཤད་སྤེལ་མཁན་ཚོས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པའི་སྐོར་དང་། ལྷག་པར་བོད་མི་ཚོས་རང་སྲེག་ལས་འགུལ་སྤེལ་བཞིན་པའི་ཛ་དྲག་གི་གནས་སྟངས་སོགས་ངོ་སྤྲོད་གནང་། ཕྱོགས་མཚུངས་ལས་འགུལ་བ་རྣམས་ཀྱིས་ཕྱག་ཏུ་འཛིན་པའི་འཕྲེད་དར་དང་སྦྱར་ཡིག་སོགས་ནང་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་མགྱོགས་མྱུར་གློད་བཀྲོལ་དགོས་པ་དང་། བོད་ཀྱི་སྐད་ཡིག་སྲུང་སྐྱོབ་ཆེད་ལས་འགུལ་བ་བཀྲ་ཤིས་དབང་ཕྱུག་མགྱོགས་མྱུར་རྒྱ་ཡི་བཀག་ཉར་འོག་ནས་གློད་བཀྲོལ་གཏོང་དགོས་པའི་དགོས་འདུན་རྣམས་འཁོད་འདུག
གོམ་བགྲོད་ལས་འགུལ་འདུ་འཛོམས་ཐོག་ཕ་རན་སིའི་གྲོས་ཚོགས་གོང་མའི་འཐུས་མི་སྐུ་ཞབས་ཨེན་སྡི་རི་གྷ་ཏོ་ལིན་ Mr. André Gattolin མཆོག་གིས་དེ་ཉིན་བོད་དོན་རྒྱབ་སྐྱོར་གྱི་གཏམ་བཤད་སྤེལ་འདུག དེ་ཡང་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ལ་ཞུ་སྙན་ཕུལ་བའི་ནང་། བོད་མིའི་འགྲོ་བ་མིའི་ཐོབ་ཐང་ལ་རྒྱ་ནག་གཞུང་གིས་བརྩི་བཀུར་ཞུས་ནས་ཐོབ་ཐང་བརྡལ་བཤིག་གཏོང་རྒྱུ་མཚམས་འཇོག་བྱེད་དགོས་པ་དང་། པཎ་ཆེན་རིན་པོ་ཆེ་མཆོག་གིས་གཙོས་བོད་མི་ཆབ་སྲིད་བཙོན་པ་རྣམས་མགྱོགས་མྱུར་གློད་བཀྲོལ་གཏང་དགོས་པ་མ་ཟད། བོད་ནང་དུ་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཆེས་མཐོའི་སྐུ་ཚབ་རྟོག་ཞིབ་ཚོགས་ཆུང་ཕེབས་འཇུག་དགོས་པའི་རེ་འདུན་བཏོན་འདུག
སྤྱིར་ཐེངས་འདིར་བོད་དོན་ལས་འགུལ་དེ་པ་ལ་ཡི་སི་ཝིལ་སོན་ཞེས་པ་ནས་དབུ་འཛུགས་གནང་མཐར་རྒྱལ་ཚོགས་ཀྱི་ལས་ཁུངས་ཡོད་སར་མཇུག་སྒྲིལ་གནང་འདུག སྐབས་དེར་གཏམ་བཤད་སྤེལ་མཁན་ཁོང་ཅེག་སྤྱི་མཐུན་རྒྱལ་ཁབ་ཀྱི་སྲིད་བློན་གཞོན་པ་ཟུར་པ་སྐུ་ཞབས་མར་ཊིན་བྷུར་སིག་ Mr. Martin Bursik མཆོག་དང་། ཨིན་གཞུང་གི་ནང་སྲིད་བློན་ཆེན་གཞོན་པ་ཟུར་པ་སྐུ་ཞབས་ནོར་མན་བྷེ་ཀར་ Mr. Norman Baker མཆོག དེ་བཞིན་འཇར་མན་ནང་གནས་སྡོད་རྒྱ་རིགས་གསར་འགོད་པ་དང་ཆབ་སྲིད་བཙོན་ཟུར་སྐུ་ཞབས་ཀྲང་ཕིང་ Mr. Zhang Phing ལགས། ཕ་རན་སིའི་གྲོས་ཚོགས་གོང་མའི་འཐུས་མི་སྐུ་ཞབས་ཨེན་སྡི་རི་གྷ་ཏོ་ལིན་ Mr. André Gattolin མཆོག སུད་སི་གྲོས་ཚོགས་འཐུས་མི་ཟུར་པ་སྐུ་ཞབས་རེ་ནེ་ལོནགྷེ་ཏི་ Mr. Rene Longet མཆོག དེ་བཞིན་བོད་མི་མང་ཡུ་རོབ་སྤྱི་འཐུས་བྱམས་པ་ཚེ་རིང་ལགས་སོགས་ཕེབས་འདུག །
