ཕྱི་ལོ་ ༢༠༡༧ ཟླ་ ༦ ཚེས་ ༨ རེས་གཟའ་ཕུར་བུ།
༄༅། །ཕྱི་ལོ་ ༢༠༡༧ ཟླ་ ༦ ཚེས ༥ ནས་ ༧ བར་ཉིན་གྲངས་གསུམ་རིང་ཕྱི་ལོ་ ༢༠༡༧ ལོའི་ཁེ་ན་ཌ་བོད་དོན་ཞུ་གཏུག་གི་ལས་འགུལ་དེ་ཉིད་མཇུག་སྒྲིལ་ཡོད།
དེ་ཡང་ཁེ་ན་ཌ་ཁུལ་གནས་སྡོད་བོད་མི་རྣམས་ཁེ་ན་ཌའི་རྒྱལ་ས་ཨོ་ཊ་ཝར་ Ottawa འདུ་ཛོམས་ཀྱིས་ཁེ་ན་ཌའི་གྲོས་ཚོགས་འཐུས་མི་རྣམས་དང་ལྷན་མཇལ་འཕྲད་ཞུས་ཏེ་བོད་དོན་ལ་རྒྱབ་སྐྱོར་ཡོང་བའི་འབོད་སྐུལ་ཞུས་འདུག
སྐབས་དེར་ཀེ་ན་ཌའི་གྲོས་ཚོགས་གོང་མའི་ཚོགས་མི་ཟུར་པ་དང་ཁེ་ན་ཌའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཀོན་སིག་ལེའུ་ཌི་ནི་ནོ་ Consiglio DiNino ལགས་ཀྱིས་བོད་ནང་གི་གནས་སྟངས་ཉིན་རེ་བཞིན་ཇེ་སྡུག་དུ་འགྲོ་བཞིན་ཡོད་སྐོར་དང་། གལ་སྲིད་ཁེ་ན་ཌ་དང་རྒྱ་ནག་དབར་འབྲེལ་ལམ་བཟང་པོ་ཞིག་དགོས་ན། བོད་ནང་གི་འགྲོ་བ་མིའི་ཐོབ་ཐང་ཐོག་གྲོས་བསྡུར་གནང་དགོས་སྐོར་གསུངས།
ཁེ་ན་ཌ་བོད་དོན་ཞུ་གཏུག་ལས་འགུལ་འདི་ཉིད་ཁེ་ན་ཌའི་བོད་དོན་རྒྱབ་སྐྱོར་ཚོགས་པ་དང་། བོད་རིགས་སྤྱི་མཐུན་ཚོགས་པ། དེ་བཞིན་ཁེ་ན་ཌའི་ནང་གི་ཚོགས་པ་ཁག་གཅིག་གི་ལོ་འཁོར་ལས་ལས་འཆར་ཡིན་པ་དང་། ལས་འཆར་འདི་ཉིད་ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་དང་ཨ་རི་སྐུ་ཚབ་དོན་ཁང་དང་ལྷན་གོ་སྒྲིག་གནང་བ་ཞིག་ཡིན་འདུག
