༢༠༡༧ ཟླ་ ༥ ཚེས་ ༣ རེས་གཟའ་ལྷག་པ།

༄༅། །ཕྱི་ལོ་ ༢༠༡༧ ཟླ་ ༥ ཚེས་ ༢ ཉིན་ཨ་རིའི་གྲོས་ཚོགས་འོག་མའི་མང་གཙོ་ཚོགས་པའི་ Democrat འཐུས་མི་སྐུ་ཞབས་ཇིམ་མེག་གྷོ་ཝན་ Jim McGovern མཆོག་དང་ཕི་ལོ་རི་ཌ་ Florida མངའ་སྡེའི་སྤྱི་མཐུན་ཚོགས་པའི་གྲོས་ཚོགས་འཐུས་མི་ Republican  ལྕམ་སྐུ་ཨི་ལེ་ཡ་ན་ལེ་ཊི་ནེན་ Ileana Ros-Lehtinen མཆོག་གིས་གྲོས་ཚོགས་ནང་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མདུན་དུ་བཤམས་ནས་བོད་དོན་རྒྱབ་སྐྱོར་ཤུགས་ཆེ་གནང་འདུག

དེ་ཡང་ཨ་རིའི་མེ་ས་ཆུ་སེཊ་ Massachusetts མངའ་སྡེའི་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་མཆོག་གིས་གསུང་བཤད་གནང་དོན། ཕྱི་ལོ་ ༢༠༠༢ ལོར་ཨ་རིའི་གྲོས་ཚོགས་ནང་བོད་མིའི་མངོན་འདོད་ལ་རྒྱབ་སྐྱོར་ཞུ་ཆེད། བོད་དོན་རྒྱབ་སྐྱོར་གྱི་སྲིད་བྱུས་ཕྱི་ལོ་ ༢༠༠༢ Tibetan Policy Act 2002 ཞེས་པ་གཏན་འབེབས་གནང་ནས་བོད་མིའི་ཆོས་དད་དང་འགྲོ་བ་མིའི་ཐོབ་ཐང་། ཐུན་མིན་ངོ་བོ་དང་རིག་གཞུང་། སྐད་ཡིག་སོགས་སྲུང་སྐྱོབ་ལ་རྒྱབ་སྐྱོར་གནང་ཡོད། སྲིད་བྱུས་དེའི་འོག

༡༽རྒྱ་ནག་གཞུང་གིས་བོད་ཀྱི་གནད་དོན་གསལ་ཆེད་༸གོང་ས་མཆོག་གི་སྐུ་ཚབ་དང་ལྷན་གྲོས་མོལ་གང་མགྱོགས་ཞུ་དགོས་པ་དང་།

༢༽བོད་མི་ཆབ་སྲིད་བཙོན་པ་རྣམས་མགྱོགས་མྱུར་གློད་བཀྲོལ་དགོས་པ།

༣༽བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་གསར་འཛུགས་དགོས་པ།

༤༽ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་ལ་རྒྱ་ནག་གཞུང་གིས་ཐེ་བྱུས་གང་ཡང་མེད་པའི་ཐོག་ནས་ཐོས་བསམ་སློབ་གཉེར་གནང་ཐུབ་པ་ཡོང་ཐབས།

དཔལ་ལྡན་ཚོགས་གཙོ་མཆོག གྲོས་ཚོགས་ནང་སྲིད་བྱུས་དེ་གཏན་འབེབས་བྱུང་ནས་ད་ཆ་ལོ་བཅོ་ལྔ་ཕྱིན་ཡང་གོང་འཁོད་གཞི་རིམ་གྱི་གནད་དོན་དེ་དག་ཐད་ཡར་རྒྱས་དང་འགྱུར་བ་དེ་ཙམ་བྱུང་མེད། བོད་རྒྱ་གྲོས་མོལ་ལྟ་བུར་མཚོན་ན། ཕྱི་ལོ་ ༢༠༡༠ ནས་ད་བར་བསྐྱར་གསོ་བྱུང་ཐུབ་མེད། བོད་ནང་ཆབ་སྲིད་བཙོན་པ་བརྒྱ་ཕྲག་མང་པོ་རྒྱ་ནག་གི་བཙོན་དུ་མུ་མཐུད་དཀའ་སྡུག་མྱོང་བཞིན་ཡོད་པའི་ཁྲོད་མང་པོ་ཞིག་དགེ་འདུན་པ་ཡིན་ཞིང་། འགའ་ཤས་ནི་དཔེར་ན། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་ལྟ་བུ་བཙོན་ཁང་ནང་བཀག་ཉར་འོག་འདས་གྲོངས་སུ་འགྱུར་བཞིན་ཡོད།

བརྙན་འཕྲིན་གཟིགས་ཆེད་འདིར་གནོན།

ལྷ་སའི་ནང་ད་བར་ཨ་རིའི་གཞུང་ཚབ་གསར་འཛུགས་ཐུབ་མེད། དེར་བརྟེན་ཨ་རིའི་ལས་བྱེད་པ་ཚོར་ཛ་དྲག་གི་དུས་སྐབས་དཔེར་ན། ཕྱི་ལོ་ ༢༠༡༥ ལོར་བོད་རང་སྐྱོང་ལྗོངས་ཁུལ་དུ་ས་གཡོམ་གྱི་གོད་ཆག་ཕོག་སྐབས་ཨ་རིའི་མི་སེར་བཅུ་ཕྲག་འགའ་ཤས་འཆི་སྐྱོན་བྱུང་བ་སོགས་དཀའ་ངལ་ཧ་ཅང་འཕྲད་ཡོད། སྐབས་དེར་ང་ཚོའི་གཞུང་གི་ལས་བྱེད་པ་ཚོར་བོད་ནང་བསྐྱོད་ནས་རོགས་རམ་གྱི་ལས་གཞི་སྤེལ་རྒྱུར་འགོག་རྐྱེན་ཧ་ཅང་བྱུང་ཡོད།

རྒྱ་ནག་གུང་ཁྲན་ཏང་ནི་ཆོས་མེད་སྨྲ་བ་ཡིན་བཞིན་དུ་༸གོང་ས་ཏཱ་ལའི་བླ་མའི་༸སྐུའི་ཡང་སྲིད་ཐོག་ཐེ་བྱུས་བྱེད་བཞིན་ཡོད། ངས་འདིར་གར་སོང་ཆ་མེད་དུ་གྱུར་བའི་བོད་བརྒྱུད་ནང་བསྟན་གྱི་བླ་མ་རྩ་་ཆེ་ཤོས་གཉིས་པར་ངོས་འཛིན་ཞུ་བཞིན་པའི་ཀུན་གཟིགས་པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་གི་གནས་སྟངས་ཐད་སེམས་འཚབ་ཆེན་པོ་ཡོད་ཅེས་ཞུ་རྒྱུ་ཡིན།

ལོ་ངོ་ ༢༢ གོང་དུ་༸གོང་ས་ཏཱ་ལའི་བླ་མ་མཆོག་གིས་དགུང་གྲངས་ ༦ ལ་སོན་པའི་དགེ་འདུན་ཆོས་ཀྱི་ཉི་མ་མཆོག་ཀུན་གཟིགས་པཎ་ཆེན་རིན་པོ་ཆེ་མཆོག་གི་ཡང་སྲིད་དུ་ངོས་འཛིན་མཛད་ནས་ཉིན་གསུམ་གྱི་རྗེས་རྒྱ་ནག་གཞུང་གིས་ཁོང་དོ་དམ་བཀག་ཉར་འོག་བཙན་ཁྲིད་བྱས་རྐྱེན་ད་བར་གར་སོང་ཆ་མེད་དུ་གྱུར་ཡོད།

དེར་བརྟེན་ད་ཆ་ཁོང་བཙོན་ཁང་ནང་ཡུན་རིང་ཤོས་བཞུགས་མཁན་གྱི་ཆབ་སྲིད་བཙོན་པ་ཞིག་ཆགས་ཡོད། རྒྱ་ནག་གཞུང་གིས་རིན་པོ་ཆེ་མཆོག་གི་གནས་སྟངས་གང་འདྲ་ཡིན་མིན་ཐད་གནས་ཚུལ་རྩ་བ་ནས་གསལ་བཤད་བྱེད་ཀྱི་མེད། ངས་དེ་རིང་འདིར་གསལ་པོ་བྱས་ནས་ཞུ་རྒྱུར། རྒྱ་ནག་གཞུང་ལ་༸རྒྱལ་བ་ཡབ་སྲས་རྣམ་གཉིས་ཀྱིས་མཚོན་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་ཐག་གཅོད་བྱ་རྒྱུའི་ཐོབ་ཐང་རྩ་བ་ནས་མེད།

དཔལ་ལྡན་ཚོགས་གཙོ་མཆོག ང་ལ་བོད་ནང་དུ་བོད་མིའི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བཞིན་པའི་གནས་ཚུལ་ཡང་ཡང་འབྱོར་བཞིན་འདུག དཔེར་ན། བོད་བརྒྱུད་ནང་བསྟན་གྱི་སློབ་གཉེར་ཁང་གྲགས་ཆེན་གསེར་རྟ་བླ་རུང་སྒར་གཏོར་བཤིག་བཏང་དང་གཏོང་མུས་ཡིན་པ་དང་། བོད་མི་ཚོར་སོ་སོའི་ལུང་པའི་ནང་རང་དབང་ཐོག་ནས་འགྲོ་བསྐྱོད་བྱ་རྒྱུར་དམ་བསྒྲགས་བསུན་གཙེར་བཟོ་བཞིན་པའི་གནས་སྟངས་སོགས་ལ་བརྟེན་ད་ཆ་ང་ཚོས་བོད་ཐོག་འཛིན་བཞིན་པའི་སྲིད་བྱུས་ལ་བསྐྱར་དུ་བསམ་བློ་གཏང་དགོས་པའི་དུས་ལ་བབ་འདུག

ད་བར་རྒྱ་ནག་གཞུང་གིས་བོད་མིའི་གཞི་རིམ་འགྲོ་བ་མིའི་ཐོབ་ཐང་ལ་བརྩི་བཀུར་ཞུ་དགོས་པའི་ལས་འགན་ཐོག་འཐུས་ཤོར་ཧ་ཅང་བཏང་བ་དེར་ཉེས་མེད་ཆག་ཡང་ཐོག་ནས་ཕྱིན་པ་རེད། དེར་འགྱུར་བ་ཞིག་གཏང་དགོས། འདི་ག་ཆབ་སྲིད་ཚོགས་པ་གཉིས་ཀྱི་འཐུས་མི་ལྷན་འཛོམས་ཐོག་ངས་ཁྲིམས་འཆར་ H.R.1872 འདི་འདོན་རྒྱུ་ཡིན། ཁྲིམས་འཆར་འདི་ནི་རྒྱ་ནག་གཞུང་གིས་ཨ་རིའི་གཞུང་འབྲེལ་མི་སྣ་དང་གསར་འགོད་པ། ཡུལ་སྐོར་སྤྲོ་འཆམ་པ་སོགས་བོད་མི་གནས་སྡོད་ཀྱི་ས་ཁུལ་ཁག་དང་བོད་རང་སྐྱོང་ལྗོངས་སོགས་སུ་འགྲོ་རྒྱུར་དམིགས་བསལ་ཆོག་མཆན་ཞུ་དགོས་པ་སོགས་དམ་བསྒྲགས་བྱེད་བཞིན་ཡོད་སྟབས། དམ་བསྒྲགས་བྱེད་མཁན་གྱི་རྒྱ་ནག་འབྲེལ་ཡོད་དཔོན་རིགས་དེ་དག་ཨ་རིའི་ནང་ཡོང་རྒྱུའི་མཐོང་མཆན་ཐོག་དམ་བསྒྲགས་བྱེད་དགོས།

ཁྲིམས་འཆར་འདིའི་རིགས་ལམ་འགྲོ་སྟངས་ཧ་ཅང་ཁ་གསལ་རེད། ཨར་རྒྱ་ཡུལ་གཉིས་ཀྱི་འབྲེལ་ལམ་གྱི་རྨང་གཞི་ནི་ཕྱོགས་གཉིས་དབར་ཕན་ཚུན་ཡིད་ཆེས་བློ་འགེལ་ཐོག་ནས་འགྲོ་འོང་གི་ཐོབ་ཐང་འདྲ་མཉམ་དགོས་པ་ལྟར་ཨ་རིའི་ནང་དུ་རྒྱ་མི་རྣམས་རང་དབང་ཐོག་ནས་འགྲོ་འོང་བྱེད་ཆོག་ཀྱང་ཨ་རིའི་གཞུང་འབྲེལ་མི་སྣ་དང་ཡུལ་སྐོར་སྤྲོ་འཆམ་པ། གསར་འགོད་པ། དེ་བཞིན་བོད་ནང་སྐྱེས་པའི་ཨ་རི་མི་སེར་ཡིན་པ་སོགས་བོད་ནང་དུ་འགྲོ་བསྐྱོད་ལ་དམ་བསྒྲགས་བྱེད་བཞིན་ཡོད།

གནད་དོན་གཞན་ཞིག་ནི། བོད་ནང་གི་བོད་མི་ཚོ་རྒྱ་ནག་གི་མི་སེར་ཡིན་མིན་གཉིས་ཐག་གཅོད་བྱེད་དགོས་པ་ལས་འདམ་ཁ་གཞན་མེད། གལ་ཏེ་ཡིན་པ་ཡིན་ན་བོད་མི་ཚོ་ཡང་རྒྱ་ནག་མི་སེར་སྤྱི་འདྲ་སྤྱི་མཚུངས་ལྟར་བོད་ཙམ་མ་ཟད། རྒྱ་ནག་གི་ས་གནས་གཞན་དུའང་འགྲོ་འོང་གི་རང་དབང་དང་ཐོབ་ཐང་སོགས་ཆ་ཚང་སྤྲོད་དགོས། དེ་བཞིན་བོད་མིའི་ཆོད་དད་དང་འགྲོ་བ་མིའི་ཐོབ་ཐང་ལ་བརྩི་བཀུར་ཞུ་བཞིན་ཡོད་པའི་ཁུངས་སྐྱེལ་ར་སྤྲོད་བྱེད་དགོས། དང་ཐོག་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ཕྱི་ལོ་ ༢༠༡༥ ཕྱི་ཟླ་ ༧ ནང་གློ་བུར་དུ་རྒྱ་ནག་གི་བཙོན་ཁང་ནང་དགོངས་པ་རྫོགས་པའི་དོན་རྐྱེན་དེར་རྒྱལ་སྤྱིའི་རང་དབང་ལྡན་པའི་སྐུ་ཚབ་རྟོག་ཞིབ་ཚོགས་ཆུང་གིས་རྩད་ཞིབ་ངེས་པར་དུ་བྱེད་འཇུག་དགོས།

ཕྱོགས་མཚུངས་སྲིད་འཛིན་སྐུ་ཞབས་ཌོ་ནལ་ཊམ་ Donald Trump མཆོག་གི་སྲིད་གཞུང་གསར་པས་གང་མགྱོགས་ཨ་རིའི་བོད་དོན་དམིགས་བསལ་འབྲེལ་མཐུད་པ་བསྐོ་གཞག་གནང་དགོས། ང་ཚོས་བོད་དོན་ལས་འགུལ་མདུན་བསྐྱོད་བྱེད་པར་དམིགས་བསལ་སྐུ་ཚབ་གཅིག་ངེས་པར་དུ་དགོས། ཁོང་གི་བརྒྱུད་ནས་རྒྱ་ནག་གཞུང་གིས་བོད་རྒྱ་གྲོས་མོལ་བསྐྱར་གསོ་ཡོང་ཐབས་གནང་དགོས་པ་མ་ཟད། སྲིད་གཞུང་གསར་པའི་ངོས་ནས་༸གོང་ས་མཆོག་དང་། མང་གཙོའི་ལམ་ནས་འོས་འདེམས་བྱས་པའི་བོད་མིའི་ཆབ་སྲིད་དབུ་ཁྲིད་མཆོག་དང་ལྷན་དངོས་སུ་གཞུང་འབྲེལ་ཐོག་ནས་འབྲེལ་བ་མངོན་གསལ་དོད་པོ་གནང་དགོས།

དེ་བཞིན་ཨ་རིའི་ཕྱི་སྲིད་ལས་ཁུངས་ནས་༸གོང་ས་ཏཱ་ལའི་བླ་མ་མཆོག་གི་ལོ་མང་རིང་བསགས་གནང་མཛད་པའི་སྐུའི་ཆེ་བའི་ཡོན་ཏན་དང་ཐུགས་མྱོང་ལས་བློ་སྐྱེད་གང་མང་ཞུ་ཐབས་གནང་དགོས། བོད་ཀྱི་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་བོད་དུ་ཆིབས་སྒྱུར་བསྐྱང་རྒྱུར་ཐུགས་འདོད་མཛད་བཞིན་ཡོད་ཚེ་རྒྱ་ནག་གཞུང་གིས་༸གོང་ས་མཆོག་ངེས་པར་དུ་བོད་ནང་གདན་འདྲེན་ཞུ་དགོས། རིང་མིན་༸གོང་ས་མཆོག་དགུང་གྲངས་ ༨༢ བཞེས་རྒྱུ་ཡིན་སྟབས་རང་ཡུལ་དུ་ངེས་པར་དུ་གདན་འདྲེན་ཞུ་དགོས།

ཨ་རིའི་ཕྱི་སྲིད་དྲུང་ཆེ་མཆོག་གིས་མང་གཙོའི་ལམ་ནས་འོས་འདེམས་བྱས་པའི་སྲིད་སྐྱོང་འབུམ་རམས་པ་བློ་བཟང་སེངྒེ་མཆོག་དང་མཇལ་འཕྲད་གནང་ནས་བཙན་བྱོལ་བོད་མིའི་མང་གཙོའི་གྲུབ་འབྲས་ལ་ངོས་འཛིན་ཞུ་དགོས། ཕྱོགས་མཚུངས་ཨ་རིའི་སྲིད་གཞུང་ངོས་ནས་སྲིད་གཞུང་གཞན་དང་མཉམ་དུ་རྡོག་སྒྲིལ་ནས་བོད་དོན་རྒྱབ་སྐྱོར་མཐུན་ཚོགས་བཟོས་ཏེ་ཚང་མས་མཉམ་རུབ་ཀྱིས་རྒྱལ་སྤྱིའི་ངོ་བོའི་ཐོག་ནས་བོད་མི་རྣམས་ལ་རྒྱབ་སྐྱོར་གནང་ཐབས་གནང་དགོས།

དཔལ་ལྡན་ཚོགས་གཙོ་མཆོག བོད་མི་ཚོར་དུས་ཚོད་ཧ་ཅང་གཉན་འཕྲང་ཞིག་གི་སྒང་བསླེབས་ཡོད། བོད་མིར་རྒྱབ་སྐྱོར་ཡོད་ཟེར་མཁན་ཚོས་ད་ཆ་ཁ་ནས་བཤད་པ་ཙམ་མིན་པར་ངོས་ཐོག་ལག་ལེན་དོན་འཁྱོལ་གནང་རྒྱུའི་དུས་ལ་བབ་ཡོད། ཅེས་གསུངས།

དེ་རྗེས་ལྕམ་སྐུ་ཨི་ལེ་ཡ་ན་ལེ་ཊི་ནེན་ Ileana Ros-Lehtinen མཆོག་གིས་མུ་མཐུད་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེའི་མདུན་དུ་བོད་དོན་རྒྱབ་སྐྱོར་གྱི་གསུང་བཤད་ཤུགས་ཆེ་སྤེལ་ཡོད་པ་བཅས།།