༢༠༡༧ ཟླ་ ༥ ཚེས་ ༩ རེས་གཟའ་མིག་དམར།

༄༅། །ཨ་རིའི་གྲོས་ཚོགས་ཀྱི་མང་གཙོ་དང་སྤྱི་མཐུན་ཚོགས་པ་ཐུན་མོང་ལས་གྲུབ་པའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་ཞིག་ཕྱི་ལོ་ ༢༠༡༧ ཟླ་ ༥ ཚེས་ ༩ ཉིན་གྱི་ཉིན་གུང་ཆུ་ཚོད་ ༡ ཙམ་ལ་ལྡི་ལི་ནས་རྡ་སའི་ཉེ་འགྲམ་གྷ་གྷལ་གནམ་ཐང་དུ་ཕེབས་འབྱོར་སྐབས་བོད་མིའི་སྒྲིག་འཛུགས་ཀྱི་བཀའ་དྲུང་སྟོབས་རྒྱལ་ཚེ་རིང་ལགས་དང་དྲིལ་བསྒྲགས་དྲུང་ཆེ་ཤར་གླིང་བསྟན་འཛིན་ཟླ་སྒྲོན་ལགས། སྤྱི་ཚོགས་ཡར་རྒྱས་ཐེབས་རྩའི་འགན་འཛིན་སྐལ་རྡོར་ཨུ་དཀར་ཚང་ལགས་བཅས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས།

གནམ་ཐང་ནས་སྐུ་མགྲོན་རྣམས་ཐད་ཀར་བཞུགས་སྒར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གཟིམ་ཆུང་མཇལ་ཁར་བཅར་ཡོད། དེ་རྗེས་རྡ་སྟེང་བོད་ཁྱིམ་སློབ་གྲྭར་ཕེབས་ནས་འཚམས་གཟིགས་གནང་བ་མ་ཟད། སློབ་གྲྭའི་ལག་ཤེས་བཟོ་གྲྭ་སོགས་སུ་སྲོལ་རྒྱུན་བོད་མིའི་ལག་ཤེས་ཀྱི་ཐོན་དངོས་སོགས་སྤུས་གཟིགས་གནང་།

དེ་རྗེས་གངས་སྐྱིད་དུ་ཆགས་པའི་བོད་མིའི་སྒྲིག་འཛུགས་བཀའ་ཤག་ལྷན་ཁང་དུ་ཕེབས་ནས་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་མཇལ་འཕྲད་གནང་བ་མ་ཟད། གཞུང་དང་གཞུང་འབྲེལ་མིན་པའི་བུད་མེད་ནུས་སྟོབས་གོང་སྤེལ་གྱི་འགོ་ཁྲིད་མི་སྣ་ ༡༦ དང་མཇལ་འཕྲད་གྲུབ་མཚམས། གྲོས་ཚོགས་འཐུས་མི་རྣམས་བོད་ཀྱི་ཟློས་གར་ཚོགས་པའི་སྲོལ་རྒྱུན་གྱི་གཞས་སྣ་འཁྲབ་སྟོན་གཟིགས་རྒྱུ་མ་ཟད།  དགོང་དྲོར་གཞུང་འབྲེལ་གསོལ་སྟོན་ལ་རོལ་རྗེས་བཞུགས་གནས་མགྲོན་ཁང་དུ་ཕེབས་གནང་རྒྱུ་ཡིན་འདུག

དེ་ཡང་ཨ་རིའི་གྲོས་ཚོགས་འཐུས་མི་བརྒྱད་པོ་རྣམས་ནི། གྲོས་ཚོགས་འོག་མའི་ཚོགས་གཙོ་ཟུར་པ་དང་མང་གཙོ་ཚོགས་པའི་ཚོགས་གཙོ་ལྕམ་སྐུ་ནེན་སི་པེ་ལོ་སི་ Nancy Pelosy མཆོག་དང་། གྲོས་ཚོགས་འོག་མའི་འཐུས་མི་སྐུ་ཞབས་ཨི་ལོ་ཡི་ཊི་ཨེན་ཇེལ་ Eliot Engel མཆོག གྲོས་ཚོགས་འོག་མའི་འཐུས་མི་སྐུ་ཞབས་ཇིམ་སེན་སེན་བྷེར་ནར་ Jim Sensenbrenner མཆོག གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷོ་ཝན་ Jim McGovern མཆོག གྲོས་ཚོགས་འོག་མའི་འཐུས་མི་ལྕམ་སྐུ་བྷེ་ཊི་མེག་ཀ་ལམ་ Betty McCollum མཆོག གྲོས་ཚོགས་འོག་མའི་འཐུས་མི་ལྕམ་སྐུ་ཇོ་སི་བྷི་ཊི་ Joyce Beatty མཆོག གྲོས་ཚོགས་འོག་མའི་འཐུས་མི་ལྕམ་སྐུ་པར་མི་ལཇ་ཡ་པཱལ་ Pramila Jayapal མཆོག   གྲོས་ཚོགས་འོག་མའི་འཐུས་མི་སྐུ་ཞབས་ཇུ་ཌི་ཅུ་ Judy Chu མཆོག་བཅས་ཡིན་འདུག །