༢༠༡༧ ཟླ་ ༥ ཚེས་ ༨ རེས་གཟའ་ཟླ་བ།
༄༅། །ཐེངས་འདིར་ཕ་རན་སིའི་རྒྱལ་ཡོངས་སྲིད་འཛིན་འོས་བསྡུའི་སྐབས་སྐུ་ཞབས་ཨེ་མེ་ནུ་ཨལ་མེཀ་རོན་ Emmanuel Macron མཆོག་ལ་རྒྱལ་ཁ་ཐོབ་པར་བརྟེན། ཕྱི་ལོ་ ༢༠༡༧ ཟླ་ ༥ ཚེས་ ༨ ཉིན་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་སྲིད་འཛིན་གསར་པ་མཆོག་ལ་འཚམས་འདྲི་ཞུས་པའི་ནང་འཁོད་དོན། ངས་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་སྐུ་ཉིད་མཆོག་ལ་ཕ་རན་སིའི་རྒྱལ་ཡོངས་འོས་བསྡུ་ཆེན་མོའི་ཁྲོད་རྒྱལ་ཁ་ཐོབ་པར་སྙིང་ཐག་པ་ནས་དགའ་བསུའི་འཚམས་འདྲི་ཞུ་རྒྱུ་ཡིན།
སྐུ་ཉིད་མཆོག་གིས་ཕ་རན་སི་མི་མང་གི་སེམས་ཁོངས་སུ་འཁོན་འཛིན་སྤངས་པའི་འཆམ་མཐུན་གྱི་སྤྱི་ཚོགས་ཤིག་བསྐྲུན་རྒྱུའི་ཆོད་སེམས་གཏིང་ཚུགས་པ་ཞིག་ཡོད་པ་དེ་རྒྱུན་སྐྱོང་བྱ་རྒྱུ་ཡིན། ཞེས་ཁས་ལེན་གནང་བ་ལྟར་ཐེངས་འདིར་སྐུ་ཉིད་མཆོག་ལ་རྒྱལ་ཁ་ཐོབ་པར་བརྟེན། མི་མང་གི་མངོན་འདོད་གསལ་པོར་མཚོན་ཐུབ་པ་ཙམ་མ་ཟད། བསམ་ཚུལ་མི་མཐུན་པ་གཞི་རྩར་བཟུང་ནས་དབྱེན་སྦྱོར་གྱི་ཡོ་ལང་ཕྱོགས་བཅུར་བརྡོལ་བཞིན་པའི་དུས་སྐབས་འདིར། རྒྱལ་ཡོངས་འོས་བསྡུའི་གྲུབ་འབྲས་དེས་རང་དབང་དང་འཆམ་མཐུན། འདྲ་མཉམ་བཅས་ཕ་རན་སིའི་ཡུལ་གྱི་གཞི་རྩའི་ལྟ་གྲུབ་གསུམ་མུ་མཐུད་སྲ་བརྟན་ཐོག་རྒྱུན་སྐྱོང་བྱེད་མིན་ཚོད་བལྟ་བྱས་པ་ལྟ་བུ་ཞིག་ཀྱང་ཆགས་ཡོད།
ཕ་རན་སིའི་ཡུལ་འདི་ཉིད་ཡུ་རོབ་མཐུན་ཚོགས་ European Union ནང་བོད་དོན་ལ་རྒྱབ་སྐྱོར་ཤུགས་ཆེ་ཤོས་གནང་མཁན་གྲས་ཤིག་ཡིན། ལྷག་པར་ཕྱི་ལོ་ ༢༠༠༨ ལོར་ཡུལ་དེའི་རྒྱལ་ས་པེ་རི་སིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མི་སེར་གྱི་ཕྱག་འཁྱེར་འབུལ་ལམ་ཞུས་པ་དེས་བོད་དང་བོད་མིའི་འཐབ་རྩོད་ལ་རྒྱབ་སྐྱོར་དང་གདུང་སེམས་མཉམ་སྐྱེའི་རྣམ་པ་ཤུགས་ཆེ་ཡོད་པ་གསལ་བཏོན་གནང་ཡོད། ཕྱོགས་མཚུངས་སྐུ་ཉིད་མཆོག་གིས་ཕྱི་ལོ་ ༢༠༡༦ ཟླ་ ༩ ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་གནང་བ་མ་ཟད། བོད་དོན་རྒྱབ་སྐྱོར་གྱི་གསུང་བཤད་ཐེངས་མང་སྤེལ་གནང་ཡོད། དེར་བརྟེན་ད་ཆ་སྐུ་ཉིད་མཆོག་གིས་ཕ་རན་སི་ཡུལ་གྱི་སྲིད་འཛིན་གསར་པའི་ཐུགས་འགན་བཞེས་རྒྱུར་མངོན་དུ་ཕྱོགས་པའི་སྐབས་འདིར་དབུ་མའི་ལམ་གྱི་ལངས་ཕྱོགས་འཛིན་ནས་བོད་ཀྱི་གནད་དོན་གསལ་ཐབས་བྱེད་བཞིན་པའི་བོད་མི་རྣམས་ལ་མུ་མཐུད་རྒྱབ་སྐྱོར་ཡོང་བའི་རེ་བ་ཞུ་རྒྱུ་ཡིན།
སྐུ་ཉིད་མཆོག་ད་བར་ཕ་རན་སི་ཡུལ་གྱི་སྲིད་འཛིན་རིམ་བྱོན་ཁྲོད་སྲིད་འཛིན་དགུང་ན་ཕྲ་ཤོས་ཡིན་སྟབས་རྒྱལ་སྤྱིའི་ཆབ་སྲིད་ཐོག་མང་གཙོའི་རིན་ཐང་གོང་མཐོར་གཏོང་རྒྱུར་བཟང་ཕྱོགས་ཀྱི་ཤུགས་རྐྱེན་སྦྱིན་ཐུབ་པའི་རེ་བ་ཞུ་བཞིན་ཡོད། ཅེས་འཁོད། སྤྱིར་སྐུ་ཞབས་ཨེ་མེ་ནུ་ཨལ་མེཀ་རོན་མཆོག་ནི་ཕ་རན་སི་རྒྱལ་ཡོངས་སྲིད་འཛིན་གྱི་འོས་བསྡུའི་ཁྲོད་ལྕམ་སྐུམ་རིན་ལེ་པེན་ Marine Le Pen མཆོག་ལས་འོས་གྲངས་གང་ཙམ་ཕོན་ཆེ་བ་ཐོབ་ནས་སྲིད་འཛིན་དུ་བདམས་ཐོན་བྱུང་འདུག་པ་བཅས།།
འཕྲིན་ཡིག་ངོ་མ་ཨིན་ཡིག་ཐོག་ཡོད་པས་དེར་རྩ་འཛིན་ཡོང་བ་ཞུ།
