༢༠༡༧ ཟླ་ ༥ ཚེས་ ༢༢ རེས་གཟའ་ཟླ་བ།

༄༅།  །ཁང་གཉེར་ཚང་ཀུན་དགའ་བཀྲ་ཤིས་ལགས་ནི།  ཕྱི་ལོ་ ༡༩༦༣ ལོར་ལྷ་སར་སྐྱེས།  ཕྱི་ལོ་ ༡༩༨༢ ལོར་ལྷ་ས་སློབ་འབྲིང་དང་པོ་ནས་འཛིན་རིམ་བཅུ་གཉིས་ཐོན།  སློབ་གྲྭ་ཆེན་མོར་ཡིག་རྒྱུགས་བཏང་ཡང་།  ཡིག་རྒྱུགས་གྲུབ་འབྲས་མ་ཐོན་གོང་ ༡༩༨༢ ལོའི་ཟླ་བ་ ༡༠ པར་འབྲུག་བརྒྱུད་རྒྱ་གར་དུ་བཙན་བྱོལ་བ་ཡོང་དགོས་བྱུང་།  འབྲུག་དམག་སྒར་གྱི་ལྟ་སྲུང་ཁང་དུ་ཟླ་བ་དྲུག་བཀག་ཉར་བྱས།  ཕྱི་ལོ་ ༡༩༨༣ ལོའི་ཟླ་ ༥ ནང་རྒྱ་གར་དུ་འབྱོར།

ཕྱི་ལོ་ ༡༩༨༣ ཟླ་བ་ ༡༡ ནས་ནས་ ༡༩༨༥ ཟླ་བ་ ༥ པ་བར་རང་ཁོངས་ལས་བྱེད་ཀྱི་ངོ་བོར་སྐབས་བདེའི་བདེ་སྲུང་བོད་གནས་ཉན་ཞིབ་ཁང་དུ་རྒྱ་བོད་ཡིག་སྒྱུར་དང་།  ཉན་ཞིབ་ཀྱི་ལས་ཁུར་ཞུས།  ཕྱི་ལོ་ ༡༩༨༥ ཟླ་བ་ ༦ ཚེས་ ༡ ཉིན་བདེ་སྲུང་བོད་གནས་ཉན་ཞིན་ཁང་གི་གཞོན་དྲུང་དུ་བསྐོ་བཞག  ཕྱི་ལོ་ ༡༩༩༡ ཟླ་བ་ ༧ ཚེས་ ༡ ནས་བདེ་སྲུང་བོད་གནས་ཉམས་ཞིབ་ཁང་གི་རྒན་དྲུང་དུ་གནས་སྤར་གྱིས་ལས་འགན་རང་འཇགས།  ཕྱི་ལོ་ ༡༩༩༢ ཟླ་བ་ ༨ ཚེས་ ༡ ནས་སྡེ་ཚན་འགན་འཛིན་དུ་གནས་སྤར་གྱིས་ལས་འགན་རང་འཇགས། ཕྱི་ལོ་ ༡༩༩༤ ཟླ་བ་ ༨ ཚེས་ ༤ ནས་དྲུང་གཞོན་ལས་རོགས་སུ་གནས་སྤར་གྱིས་ལས་འགན་རང་འཇགས།  ཕྱི་ལོ་ ༡༩༩༤ ཟླ་བ་ ༩ ཚེས་ ༡ ནས་བདེ་སྲུང་ལས་ཁུངས་སུ་གནས་སྤོ་བསྐོ་གཞག ཕྱི་ལོ་ ༡༩༩༧ ཟླ་བ་ ༥ ཚེས་ ༡༧ ནས་དྲུང་གཞོན་དུ་གནས་སྤར་གྱིས་ལས་འགན་རང་འཇགས།

ཕྱི་ལོ་ ༡༩༩༧ ཟླ་བ་ ༩ ཚེས་ ༡ ནས་ཐེ་ཝན་སྐུ་ཚབ་དོན་གཅོད་ཁང་གི་དྲུང་གཞོན་གནས་རིམ་ཐོག་གནས་སྤོ་གནང་།  ཕྱི་ལོ་ ༢༠༠༢ ཟླ་བ་ ༤ ཚེས་ ༣༠ ནས་དྲུང་གཞོན་གནས་རིམ་ཐོག་བདེ་སྲུང་ལས་ཁུངས་སུ་གནས་སྤོ་གནང་། ཕྱི་ལོ་ ༢༠༠༤ ཟླ་ ༡༡ ཚེས་ ༡༠ ནས་ཟུང་དྲུང་དུ་གནས་སྤར་གྱིས་རང་འཇགས་བདེ་སྲུང་ལས་ཁུངས་ཀྱི་ཟུང་དྲུང་དུ་བསྐོ་བཞག ཕྱི་ལོ་ ༢༠༠༩ ཟླ་བ་ ༡ ཚེས་ ༡༡ ནས་ཨ་རི་སྐུ་ཚབ་དོན་གཅོད་ཁང་གི་རྒྱ་སྐད་ཚན་པའི་ཟུང་དྲུང་དུ་གནས་སྤོ་བསྐོ་བཞག་གནང་། ཕྱི་ལོ་ ༢༠༡༢ ཟླ་བ་ ༢ ཚེས་ ༢ ནས་དྲུང་ཆེ་ལས་འཕར་དུ་གནས་སྤོ་དང་།  ཟླ་བ་ ༥ ཚེས་ ༢ ནས་བཟུང་ཨ་རི་སྐུ་ཚབ་དོན་ཁང་གི་དྲུང་འཕར་དུ་ལས་འགན་བཀོད་སྒྲིག་གནང་།

 ཕྱི་ལོ་ ༢༠༡༣ ཟླ་བ་ ༦ པར་དཔལ་ལྡན་སྲིད་སྐྱོང་མཆོག་ནས་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་མིར་བསྐོ་བཞག ཕྱི་ལོ་ ༢༠༡༡ ཟླ་བ་ ༧ ཚེས་ ༦ ཉིན་ཞབས་ལོ་ཧྲིལ་པོ་ཉེར་ལྔ་འཁོར་བའི་ལེགས་སྐྱེས་ཕྱག་འཁྱེར་ལེན། ཕྱི་ལོ་ ༢༠༡༤ ཟླ་བ་ ༡༡ ཚེས་ ༢༠ ཉིན་བདེ་སྲུང་ལས་ཁུངས་ཀྱི་དྲུང་འཕར་དུ་གནས་སྤོ་གནང་།  ༢༠༡༥ ཟླ་བ་ ༤ ཚེས་ ༡༥ ཉིན་སླར་ཡང་བདེ་སྲུང་ལས་ཁུངས་ཀྱི་མགྲིན་ཚབ་པར་བསྐོ་བཞག  ཕྱི་ལོ་ ༢༠༡༦ ཟླ་ ༧ ཚེས་ ༡ ནས་དྲུང་འཕར་གནས་རིམ་ཐོག་ཨ་རི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པར་བསྐོ་གཞག་གནང་། ཕྱི་ལོ་ ༢༠༡༧ ཟླ་བ་ ༥ ཚེས་ ༡༥ ནས་དྲུང་ཡིག་ཆེན་མོར་གནས་སྤར་གནང་བ་བཅས་ཀྱི་ལོ་རྒྱུས་མདོར་བསྡུས་སུ།