༢༠༡༧ ཟླ་ ༥ ཚེས་ ༢༤ རེས་གཟའ་ལྷག་པ།
མཉམ་འབྲེལ་རྒྱལ་ཚོགས་ནང་ཨ་རིའི་གཞུང་ཚབ་གནང་མྱོང་མཁན་སྐུ་ཞབས་ཧར་པར་མཆོག་དང་ལྷན།
༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཟླ་འདིའི་ཕྱི་ཚེས་ ༢༣ ཉིན་ཨ་རིའི་རྒྱལ་ས་ཝ་ཤིང་ཊོན་ནང་རྟེན་གཞི་བྱས་པའི་གྲོས་ཚོགས་འཐུས་མི་རྣམས་དང་མཇལ་འཕྲད་གནང་སྟེ་བོད་དོན་ཞུ་གཏུག་ཤུགས་ཆེ་གནང་འདུག
དེ་ཡང་ཨ་རིའི་ཡུ་ཊ་ Utah མངའ་སྡེའི་གྲོས་ཚོགས་གོང་མའི་འཐུས་མི་སྐུ་ཞབས་མ་ཡིག་ལི་ Mike Lee མཆོག་དང་། གྲོས་ཚོགས་གོང་མའི་ཚོགས་གཞོན་སྐུ་ཞབས་ཨོ་རིན་ཧེ་ཆི་ Orrin Hatch མཆོག་དང་མཇལ་འཕྲད་གནང་སྟེ་བོད་དོན་ཞུ་གཏུག་གི་ལས་འགུལ་སྤེལ་འདུག སྐབས་དེར་དཔལ་ལྡན་སྲིད་སྐྱོང་མཆོག་གིས་ད་ལྟའི་བོད་ནང་གི་ཛ་དྲག་གནས་སྟངས་སྤྱི་དང་བོད་རྒྱ་གྲོས་མོལ་སྐོར་སོགས་ཞུས་པར་གྲོས་ཚོགས་འཐུས་མི་རྣམ་པས་༸གོང་ས་མཆོག་ལ་དད་གུས་ཧ་ཅང་ཞུ་བཞིན་ཡོད་སྐོར་དང་བོད་ནང་གི་གནས་སྟངས་ཛ་དྲག་ཐོག་སེམས་ཚོར་ཧ་ཅང་ཡོད་པ་མ་ཟད། གང་ཐུབ་བོད་དོན་ཐོག་རྒྱབ་སྐྱོར་གནང་རྒྱུའི་ཁས་ལེན་ཡང་གནང་ཡོད།
གྲོས་ཚོགས་གོང་མའི་ཚོགས་གཞོན་སྐུ་ཞབས་ཨོ་རིན་ཧེ་ཆི་ Senator Orrin Hatch མཆོག་ལ་བཀའ་ཤག་གི་ཕྱག་རྟགས་འབུལ་ལམ་ཞུ་སྐབས།
དེ་ནས་ཉིན་རྒྱབ་ཏུ་དཔལ་ལྡན་སྲིད་སྐྱོང་མཆོག་གིས་དབུ་ཁྲིད་གཞན་ཁག་གཅིག་དང་ལྷན་མཇལ་འཕྲད་གནང་སྟེ་བོད་དོན་ཐོག་གོ་བསྡུར་ལྷུག་པོ་གནང་འདུག
གྲོས་ཚོགས་གོང་མའི་འཐུས་མི་སྐུ་ཞབས་མ་ཡིག་ལི་ Mike Lee མཆོག་ལ་བཀའ་ཤག་གི་ཕྱག་རྟགས་འབུལ་ལམ་ཞུ་སྐབས།
ཕྱོགས་མཚུངས་གོང་ཚེས་ཉིན་གྱི་ཕྱེད་ཡོལ་དུ་རྒྱལ་སྤྱིའི་བོད་དོན་ལས་འགུལ་ཁང་གི་གོ་སྒྲིག་འོག་སྲིད་སྐྱོང་མཆོག་ལ་གསོལ་སྟོན་བཤམས་སྐབས་བོད་རིགས་བརྒྱ་ཕྲག་བརྒལ་བ་དང་། དེ་བཞིན་བོད་དོན་རྒྱབ་སྐྱོར་བ་ཨ་རིའི་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་ Jim McGovern མཆོག་དང་། དེ་སྔའི་འཛམ་གླིང་མཉམ་འབྲེལ་རྒྱལ་ཚོགས་ནང་ཨ་རིའི་གཞུང་ཚབ་གནང་མྱོང་མཁན་སྐུ་ཞབས་ཧར་པར་ Mr. Harper མཆོག་ལྟ་བུ་དབུ་ཁྲིད་གྲགས་ཅན་སོགས་མཉམ་ཞུགས་གནང་འདུག
བོད་དོན་རྒྱབ་སྐྱོར་བ་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་མཆོག་དང་ལྷན།
གསོལ་སྟོན་སྐབས་དཔལ་ལྡན་སྲིད་སྐྱོང་མཆོག་དང་ལྷན་སྐུ་ཚབ་དོན་གཅོད་སྤེན་པ་ཚེ་རིང་མཆོག་ཀྱང་ཕེབས་འདུག བཀའ་ཤག་སྐབས་བཅོ་ལྔ་པའི་སྐབས་དང་ཨ་རིའི་སྲིད་གཞུང་གསར་པ་ཕེབས་རྗེས་ཁུལ་དེར་དཔལ་ལྡན་སྲིད་སྐྱོང་མཆོག་ཕེབས་ཐེངས་དང་པོ་ཆགས་ཡོད་པ་བཅས།།
