༢༠༡༧ ཟླ་ ༥ ཚེས་ ༤ རེས་གཟའ་ཕུར་བུ།

༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ནིའུ་ཛི་ལེན་ཌི་ཡུལ་དུ་འཚམས་གཟིགས་གནང་བཞིན་པ་ལྟར། ཕྱི་ཚེས་ ༣ ཉིན་གྲོས་ཚོགས་ཀྱི་ལྗང་ཁུ་ཚོགས་པའི་འཐུས་མི་སྐུ་ཞབས་གྷེ་རེ་ཊི་ཧུ་ཇི་སི་ MP Gareth Hughes of Green Party མཆོག་གིས་ཇི་ལྟར་མགྲོན་འབོད་ཞུས་པ་ལྟར་ཡུལ་དེའི་གྲོང་ཁྱེར་ཝེ་ལིང་ཊོན་ནང་དུ་རྟེན་གཞི་བྱས་པའི་གྲོས་ཚོགས་སུ་ཕེབས་ནས་གྲོས་ཚོགས་ཀྱི་ཆབ་སྲིད་ཚོགས་པ་གསུམ་ལས་གྲུབ་པའི་གྲོས་ཚོགས་འཐུས་མི་ཁག་གཅིག་དང་ལྷན་མཇལ་འཕྲད་གནང་འདུག སྐབས་དེར་སྲིད་སྐྱོང་མཆོག་གིས་ད་ལྟའི་བོད་ནང་གི་ཛ་དྲག་གནས་སྟངས་སྤྱི་དང་། ལྷག་པར་དེང་སྐབས་བོད་བརྒྱུད་ནང་བསྟན་སློབ་གཉེར་ཁང་ཆེ་ཤོས་སུ་གྲགས་པ་གསེར་རྟ་བླ་རུང་སྒར་ཙམ་མ་ཟད་ཡར་ཆེན་སྒར་ཡང་གཏོར་བཤིག་བཏང་དང་གཏོང་བཞིན་པའི་གནས་སྟངས་གསལ་སྟོན་གནང་འདུག

ཕྱོགས་མཚུངས་བོད་ཀྱི་ཁོར་ཡུག་ཉམས་ཆག་འགྲོ་སླའི་སྐོར་དང་། འཛམ་གླིང་ཤར་ནུབ་ཀྱི་སྣེ་གཉིས་ཕུད་བོད་ནི་སྣེ་གསུམ་པར་ངོས་འཛིན་བྱེད་བཞིན་ཡོད་སྟབས་འཛམ་གླིང་སྤྱི་དང་ལྷག་པར་ཨེ་ཤི་ཡའི་དཀྱིལ་འཁོར་ནང་བོད་ཀྱི་ཁོར་ཡུག་དེ་ཧ་ཅང་གནད་འགག་ཆེན་པོ་ཆགས་ཡོད་སྐོར་དང་། དེ་བཞིན་བོད་ནང་དུ་རྒྱ་རིགས་ཧ་ཅང་མང་པོ་གནས་སྤོ་བྱེད་བཞིན་པ་དང་། དཔལ་འབྱོར་ཡར་རྒྱས་ལ་ཁ་གཡར་ནས་འཛུགས་སྐྲུན་ལས་གཞི་རྒྱ་ཆེ་སྤེལ་བཞིན་པ་སོགས་ལ་བརྟེན་ནས་བོད་མིའི་ཐུན་མིན་ངོ་བོ་དང་རིག་གཞུང་སོགས་རིམ་བཞིན་ཡལ་ནས་བོད་ཡུལ་རྒྱ་ཡུལ་དུ་འགྱུར་རྒྱུའི་ཉེན་ཁ་ཡོད་སྐོར། མཐའ་དོན་སྲིད་སྐྱོང་མཆོག་གིས་རྒྱ་ནག་གཞུང་ནས་བོད་སར་ཐོག་མ་བཙན་འཛུལ་བྱེད་ཚུལ་སྐོར་མདོར་ཙམ་གསུངས་པ་དང་སྦྲགས། ཨ་རིའི་གཞུང་ལྟར་བོད་མིའི་སྒྲིག་འཛུགས་ཀྱི་གཉིས་སྨན་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་གནང་རོགས་ཞེས་གྲོས་ཚོགས་འཐུས་མི་རྣམ་པས་བརྒྱུད་ཡུལ་དེའི་སྲིད་གཞུང་ལ་རེ་འདུན་ཡང་བཏོན་འདུག

ཕྱོགས་མཚུངས་རྒྱ་གར་གཞུང་གིས་རྒྱལ་ཁབ་གཞན་ལས་ལྷག་པ་བོད་དོན་དང་བོད་མི་ཚོར་རྒྱབ་སྐྱོར་གནང་དང་གནང་མུས་ཡིན་པ་མ་ཟད། ལྷག་པར་ད་ཆ་རྒྱ་གར་གཞུང་གིས་དེ་སྔ་དང་མི་འདྲ་བར་བོད་དོན་ལ་མངོན་གསལ་དོད་པོའི་ཐོག་ནས་རྒྱབ་སྐྱོར་གནང་བཞིན་ཡོད་སྐོར་གསུངས། མཇལ་འཕྲད་གྲུབ་རྗེས་གྲོས་ཚོགས་ཀྱི་ལས་རིམ་འགྲོ་བཞིན་པར་ཟུར་ཉན་དུ་ཕེབས་པ་མ་ཟད། གྲོས་ཚོགས་ཀྱི་ཨེ་ཤི་ཡ་ལྷན་ཁང་དུ་ཕེབས།

དེ་ཉིན་གྱི་ཕྱེད་ཡོལ་སྲིད་སྐྱོང་མཆོག་གིས་ཡུལ་དེའི་རྒྱལ་ཡོངས་རླུང་འཕྲིན་ཚན་པའི་གསར་འགོད་པ་ལྕམ་སྐུ་ཀིམ་ཧིལ་ Kim Hill ལགས་ཀྱི་དྲི་བར་ལན་འདེབས་གནང་བའི་ཚན་པ་དེ་རེས་གཟའ་སྤེན་པའི་ཉིན་རྒྱང་སྲིང་ཞུ་རྒྱུ་ཡིན་འདུག

སྲིད་སྐྱོང་མཆོག་གིས་ཝིག་ཊོ་རི་ཡ་མཐོ་སློབ་ཀྱི་ཁྲིམས་ལུགས་རིག་པའི་བསྟི་གནས་ཁང་དུ་གསུང་བཤད་གནང་བཞིན་པ།

དེ་རྗེས་སྲིད་སྐྱོང་མཆོག་ཝིག་ཊོ་རི་ཡ་མཐོ་སློབ་ Victoria of University ཏུ་ཕེབས་ནས་མཐོ་སློབ་ཀྱི་ཁྲིམས་ལུགས་རིག་པའི་བསྟི་གནས་ཁང་དུ་འཚམས་གཟིགས་གནང་བ་མ་ཟད། དགེ་ལས་སློབ་ཕྲུག་རྣམས་ལ་ཆུ་ཚོད་གཅིག་དང་ཕྱེད་ཀ་ཙམ་རིང་གསུང་བཤད་དང་དྲི་བ་དྲིས་ལན་གནང་འདུག སྐབས་དེར་སློབ་ཕྲུག་གྲངས་ ༡༥༠ ཙམ་དང་བོད་དོན་རྒྱབ་སྐྱོར་བ། དེ་བཞིན་རྒྱ་རིགས་སློབ་ཕྲུག་འགའ་ཤས་ཡང་ཕེབས་འདུག དྲི་བ་མཐའ་མར་བོད་ནང་བསྐྱོད་མྱོང་ཡོད་པའི་རྒྱ་རིགས་སློབ་མ་ཞིག་གིས་ད་ལྟའི་བོད་ནང་གི་གནས་སྟངས་ལ་སེམས་འཚབ་ཀྱི་རྣམ་པ་ཤུགས་ཆེ་འདོན་སྐབས་སྲིད་སྐྱོང་མཆོག་གིས་དེར་མོས་མཐུན་ཐོག་གསལ་བཤད་སོགས་གནང་།

དེ་ནས་སྲིད་སྐྱོང་མཆོག་གིས་གྲོས་ཚོགས་འཐུས་མི་སྐུ་ཞབས་གྷེ་རེ་ཊི་ཧུ་ཇི་སི་ Gareth Hughes མཆོག་ལ་དྲན་རྟེན་གྱི་ཕྱག་རྟགས་ཤིག་འབུལ་ལམ་ཞུས་པ་མ་ཟད། མཐོ་སློབ་ཀྱི་སློབ་དགེ་ལྕམ་སྐུ་ཁེ་ཐེ་ར་ཡིན་ Catherine J. Iorns མཆོག་ལའང་དྲན་རྟེན་ཕྱག་རྟགས་ཕུལ་ནས་ཁོང་རྣམ་པས་ད་བར་བོད་མི་དང་བོད་དོན་ལ་རྒྱབ་སྐྱོར་གནང་བར་བསྔགས་བརྗོད་དང་སྦྲགས་བཀའ་དྲིན་རྗེས་དྲན་ཞུས་འདུག །