༸གོང་ས་མཆོག་གི་དགོངས་པར་ཨ་རིའི་སྲིད་གཞུང་གསར་པར་མཛད་དཀའ་བཟོ་རྒྱུའི་ཐུགས་འདུན་རྩ་བ་ནས་མེད།

གསར་ལས་ཁང་གི་གསར་འགོད་པས།

༢༠༡༧-༠༥-༢༤

༢༠༡༧ ཟླ་ ༥ ཚེས་ ༢༤ རེས་གཟའ་ལྷག་པ།

༄༅། །ཕྱི་ལོ་ ༢༠༡༧ ཟླ་ ༥ ཚེས་ ༢༤ ཉིན་རྒྱལ་སྤྱིའི་བོད་དོན་ལས་འགུལ་ཁང་གིས་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ལ་ཨ་རིའི་རྒྱལ་ས་ཝ་ཤིང་ཊོན་དུ་ཕེབས་བསུའི་མཛད་སྒོ་ཞིག་གོ་སྒྲིག་ཞུས་ཡོད།

སྐབས་དེར་དཔལ་ལྡན་སྲིད་སྐྱོང་མཆོག་གིས་གསུང་དོན། ད་བར་ང་ཚོས་རེ་སྒུག་བྱས་ནས་བསྡད་པ་རེད། དུས་ཡུན་དེ་ཙམ་རིང་པོའི་རིང་རེ་བ་མ་བརླག་པར་སྡོད་ཐུབ་པ་དེ་ནི་གཙོ་བོ་གྲོགས་པོ་ཁྱེད་རང་ཚོ་ལྟ་བུ་ཡོད་པར་བརྟེན་ནས་བྱུང་ཐུབ་ཡོད། ང་ཚོས་ད་དུང་མཛའ་བརྩེའི་འབྲེལ་ལམ་རྒྱུན་སྐྱོང་འོག་མུ་མཐུད་ལས་འགུལ་སྤེལ་ཐུབ་ཚེ་གཞིས་བཞུགས་བོད་མིའི་མངོན་འདོད་ལྟར་མི་རིང་བར་ང་ཚོས་༸གོང་ས་མཆོག་བོད་ལ་གདན་འདྲེན་ཞུ་ཐུབ་པ་དང་བོད་ལ་རང་དབང་གི་ཉི་མ་མགྱོགས་ནས་མྱུར་དུ་འཆར་ཐུབ་ངེས་རེད།

བོད་མིའི་སྒྲིག་འཛུགས་ལ་མཚོན་ན་ཨ་རི་གཞུང་གིས་གནང་བའི་རོགས་དངུལ་དེ་དག་འགྲོ་སོང་བསྲི་ཚགས་ཐོག་ནས་ལས་དོན་ཚགས་ཚུད་ངང་སྤེལ་མཁན་གྱི་སྒྲིག་འཛུགས་ཤིག་ཡིན་ཞིང་། སྲི་ཞུའི་ལས་བྱེད་རྣམས་ལྷག་བསམ་དཀར་ཞིང་ལས་ལ་བརྩོན་པ་ཆེ་བ་ཤ་སྟག་ཡིན། ད་བར་ཨ་རིས་གཙོས་སྲིད་གཞུང་གཞན་ཚོས་བོད་མིའི་སྒྲིག་འཛུགས་ལ་གནང་བའི་རོགས་དངུལ་དེ་དག་ང་ཚོས་དོ་དོ་ཏན་ཏན་བྱས་ནས་འགྲོ་སོང་བཏང་དང་གཏོང་མུས་ཡིན། དེར་བརྟེན་ང་ཚོས་ཁྱེད་རྣམ་པ་ཚང་མར་བཀའ་དྲིན་ཆེ་ཞུ་རྒྱུ་ཡིན།

ལྷག་པར་ཨ་རིའི་གཞུང་གིས་བོད་དོན་ཐོག་དམིགས་བསལ་ཐུགས་ཁུར་བཞེས་ནས་བོད་དོན་རྒྱབ་སྐྱོར་ཤུགས་ཆེ་གནང་དང་གནང་མུས་ལ་ཐུགས་རྗེ་ཆེ་ཞུ་རྒྱུ་ཡིན། ༸གོང་ས་མཆོག་གི་དགོངས་པར་ཨ་རིའི་སྲིད་གཞུང་གསར་པར་མཛད་དཀའ་བཟོ་རྒྱུའི་ཐུགས་འདུན་རྩ་བ་ནས་མེད། ང་ཚོ་བོད་མི་ས་ཡ་དྲུག་ལས་མེད་སྟབས་ཁྱེད་རྣམ་པས་ང་ཚོའི་ཚབ་གནང་ནས་བོད་དོན་རྒྱབ་སྐྱོར་གྱི་འབོད་སྒྲ་སྒྲོགས་རོགས། ཞེས་གསུངས།

གཞན་ཡང་སྐབས་དེར་དེ་སྔའི་འཛམ་གླིང་མཉམ་འབྲེལ་རྒྱལ་ཚོགས་སུ་ཨ་རིའི་གཞུང་ཚབ་གནང་མྱོང་ཡོད་པ་སྐུ་ཞབས་ཀེཐ་ཧར་པར་ Keith Harper མཆོག་གིས་གསུང་དོན།

ཕྱི་ལོ་ ༢༠༡༦ ཕྱི་ཟླ་ ༣ ཚེས་ ༡༡ ཉིན་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཤིག་སུད་སི་གྲོང་ཁྱེར་ཇི་ནི་ཝར་ཚོགས་པ་རེད། སྐབས་དེར་སྲིད་གཞུང་ཁག་གི་སྐུ་ཚབ་འཐུས་མི་དང་གཞུང་ཚབ་པ་སོགས་ལྷན་ཚོགས་སུ་ཕེབས་རྒྱུར་དམ་བསྒྲགས་བཟོ་ཆེད་རྒྱ་ནག་གཞུང་གིས་ཐབས་ལམ་འདྲ་མིན་ཐོག་ནས་གནོན་ཤུགས་སྤྲོད་ཐབས་བྱས་ཡོད་ཀྱང་ལམ་ལྷོང་མ་བྱུང་བ་རེད། དེས་གང་མཚོན་བཞིན་ཡོད་ཅེ་ན་ང་ཚོས་བདེན་པ་མིན་པའི་གནས་སྟངས་ལ་རྒྱལ་ཁ་རྩ་བ་ནས་ཐོབ་འཇུག་འདོད་མེད་པ་གསལ་སྟོན་བྱས་ཡོད།

རྒྱ་ནག་གཞུང་གིས་བོད་མིའི་སྐོར་ལ་འཁྱོག་བཤད་སྣ་ཚོགས་སྤེལ་བ་མ་ཟད། ༸གོང་ས་མཆོག་ལའང་རྒྱལ་ཁབ་ཁ་བྲལ་བ་ཡིན་པའི་སྐྱོན་བརྗོད་ཞུས་ཡོད། འོན་ཀྱང་དོན་དངོས་ནི་༸གོང་ས་ཏཱ་ལའི་བླ་མ་མཆོག་ནི་དེ་འདྲ་རྩ་བ་ནས་མ་རེད། འདི་ནི་ང་ཚོས་ཧ་ཅང་གསལ་པོ་ཤེས་ཀྱི་ཡོད། མི་སུ་འདྲ་ཞིག་གིས་ཁོང་དང་མཇལ་ནས་བཀའ་མོལ་ཞུ་བ་ཡིན་ན་ཁོང་གིས་ལས་དེ་འདྲ་ཞིག་རྩ་བ་ནས་བརྩམ་རྒྱུ་མ་རེད། ཅེས་གསུངས།

ཕྱོགས་མཚུངས་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་Jim McGovern མཆོག་གིས་གསུང་དོན། ང་ཚོ་རྡ་རམ་ས་ལར་བསྐྱོད་སྐབས་ཕེབས་བསུའི་སྣེ་ལེན་གཟབ་རྒྱས་གནང་བྱུང་བ་དེ་དག་ནམ་ཡང་རྗེད་ཐབས་མེད། ང་ཚོ་རྡ་སར་བསྐྱོད་པའི་དགོས་དམིགས་གཙོ་བོ་ང་ཚོ་བོད་མི་དང་༸གོང་ས་མཆོག དེ་བཞིན་སྲིད་སྐྱོང་བློ་བཟང་སེངྒེ་མཆོག་གི་རྒྱབ་ཏུ་ལངས་ཡོད། ཅེས་པའི་བརྡ་ལན་ཞིག་རྒྱ་ནག་གཞུང་ལ་སྤྲོད་ཆེད་ཡིན།

ང་ཚོས་༸གོང་ས་ཏཱ་ལའི་བླ་མ་མཆོག་དང་བོད་མི་བཙན་བྱོལ་བ་རྣམས་རང་ཡུལ་དུ་ཆིབས་སྒྱུར་བསྐྱངས་ནས་བོད་རིགས་གཞན་དང་ལྷན་རང་དབང་ངང་རང་གི་ཐུན་མིན་ཆོས་དང་རིག་གཞུང་། སྐད་ཡིག་སོགས་རྒྱུན་འཛིན་མུ་མཐུད་མཛད་ཐུབ་པ་དང་། བོད་ནང་གི་དམ་བསྒྲགས་དེ་དག་འཕྲལ་མར་མཚམས་འཇོག་དགོས་པ་དེ་ཡིན། ཞེས་སོགས་གསུངས།

སྤྱིར་རྒྱལ་སྤྱིའི་བོད་དོན་ལས་འགུལ་ཁང་ནི་ཕྱི་ལོ་ ༡༩༨༨ ལོར་གསར་འཛུགས་གནང་བ་ཞིག་ཡིན་འདུག ལས་ཁུངས་དེའི་ཡན་ལག་ལས་ཁུངས་ཡོ་རོབ་ཨམ་སི་ཊར་ཌེམ་ Amsterdam གྲོང་ཁྱེར་དང་། རྒྱལ་ས་འབར་ལིན། Berlin འབར་སེལ་ Brussels བཅས་སུ་ཡོད་འདུག་པ་བཅས།།

གསར་གནས།