ཕྱི་ལོ་ ༢༠༡༧ ཟླ་ ༥ ཚེས་ ༢༣ རེས་གཟའ་མིག་དམར།
༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། སྐབས་ ༡༦ བོད་མི་མང་སྤྱི་འཐུས་རྣམས་བོད་མིའི་འདུ་སྡོད་གཞིས་ཆགས་ཁག་ལ་ཕྱོགས་བསྐྱོད་ཕེབས་རྒྱུའི་ས་བགོས་ཡོད་པ་ལྟར། སྤྱི་འཐུས་དཀོན་མཆོག་ཡར་འཕེལ་ལགས་དང་སྤྱི་འཐུས་རྡོ་རྗེ་ཚེ་བརྟན་ལགས་རྣམ་གཉིས་ཕྱི་ལོ་ ༢༠༡༧ ཟླ་ ༥ ཚེས་ ༢༧ ནས་ཟླ་ ༦ ཚེས་ ༧ བར་རྒྱ་གར་བྱང་ཤར་ས་ཁུལ་ཁྱབ་ཁོངས་བོད་མིའི་སྡོད་ཁར་ཁག་ལ་གཞུང་འབྲེལ་ཕྱོགས་བསྐྱོད་གནང་གཏན་འཁེལ་ཡོད།
དེ་ཡང་འདི་ཟླའི་ཚེས་ ༢༤ ཉིན་རྡ་ས་ནས་ལྡི་ལིར་ཕེབས་ཐོན་གནང་རྒྱུ་དང་། ཕྱི་ཚེས་ ༢༥ ཉིན་ལྡི་ལི་ནས་གྷོ་ཧ་ཀྲི་རུ་ཕེབས་ཐོན་གྱིས་ཕྱི་ཚེས་ ༢༦ ཉིན་བསྟན་འཛིན་སྒང་ལ་འབྱོར་འཕྲལ་ས་གནས་འགོ་འཛིན་དང་འབྲེལ་ལས་ཁག་གིས་སྣེ་ལེན་དང་སྦྲགས། ཕྱི་ཚེས་ ༢༧ ཉིན་བསྟན་འཛིན་སྒང་ས་གནས་སུ་ལས་རིམ་དང་། ཕྱི་ཚེས་ ༢༨ ནས་ཕྱི་ཟླ་ ༦ ཚེས་ ༧ བར་འབུམ་སྡེ་ལ། རྟ་དབང་། རྡི་རང་། ཨི་ཊ་ན་གྷར། ཤེས་ལོངས་བཅས་ཀྱི་ས་གནས་ཁག་ཏུ་གཞུང་འབྲེལ་གཟིགས་བསྐོར་ཕེབས་རྒྱུ་ཡིན་པ་དང་། ཕྱི་ཟླ་ ༦ ཚེས་ ༨ ཉིན་ཤེས་ལོོངས་ནས་གྷོ་ཧ་ཀྲི་བརྒྱུད་ལྡི་ལིར་ཕྱིར་ཕེབས་གནང་རྒྱུ་དང་ཕྱི་ཚེས་ ༡༠ ཉིན་ལྡི་ལི་ནས་རྡ་སར་ཕྱིར་ཕེབས་གནང་རྒྱུ་ཡིན་པ་བཅས།།