༢༠༡༧ ཟླ་ ༤ ཚེས་ ༢༤ རེས་གཟའ་ཟླ་བ།
༄༅། །སྤོན་ཊ་ཆོལ་གསུམ་བོད་མིའི་གཞིས་ཆགས་ཀྱི་ལྔ་བཅུའི་དུས་དྲན་མཛད་སྒོ་ཟིན་རྗེས་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་རྣམ་གཉིས་ཀྱིས། ཕྱི་ལོ་ ༢༠༡༧ ཟླ་ ༤ ཚེས་ ༢༢ ཉིན་གཞིས་ཆགས་ཀྱི་སྤྱི་ཁང་ནང་དུ་སྐབས་ ༡༥ བཀའ་ཤག་གི་ལྔ་དང་ལྔ་བཅུའི་འཐབ་བྱུས་སྐོར་གསུང་བཤད་གནང་འདུག དེ་ཡང་ཐོག་མར་ནང་སྲིད་བཀའ་བློན་མཆོག་གིས་གསུང་དོན། སྐབས་བཅོ་ལྔ་པའི་བཀའ་ཤག་གིས་ལོ་ལྔའི་ནང་བོད་དོན་བདེན་མཐའ་གསལ་ཐབས་སུ་འབད་བརྩོན་གང་ཡོད་ཞུས་དང་ཞུ་བཞིན་པ་མ་ཟད། འབྱུང་འགྱུར་ལོ་ ༥༠ རིང་མུ་མཐུད་བཙན་བྱོལ་ནང་བསྡད་ནས་བོད་དོན་འཐབ་རྩོད་བྱེད་དགོས་པའི་དུས་སྐབས་ཤིག་འཆར་ཡང་།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རེ་བ་བཟང་ས་དང་གྲ་སྒྲིག་སྡུག་ས་ནས་བྱེད་དགོས་པའི་ལམ་སྟོན་བཀའ་སློབ་སྩལ་བ་ལྟར་ང་ཚོས་ངེས་པར་དུ་བོད་མིའི་སྒྲིག་འཛུགས་འདི་སྲ་བརྟན་བཟོ་རྒྱུར་གལ་ཆེའི་ནང་ནས་དོན་ཆེ་ཞིག་ཡིན་སྟབས། སྐབས་ ༡༥ བཀའ་ཤག་ངོས་ནས་གཙོ་བོ་དེའི་ཐོག་སྲིད་བྱུས་བང་སྒྲིག་ནས་འབྱུང་འགྱུར་ལོ་ ༥༠ རིང་བོད་མིའི་སྒྲིག་འཛུགས་གཙོ་བོར་གྱུར་བའི་གཞིས་ཆགས་ཁག་ཧྲ་ཏག་ཏག་ཅིག་ཡོང་ཐབས་ཆེད་འབད་བརྩོན་ཞུ་བཞིན་ཡོད།
དེང་སྐབས་རྒྱ་ནག་གི་སྟོབས་འབྱོར་མངའ་ཐང་རྒྱས་བཞིན་ཡོད་སྟབས་ང་ཚོའི་འཐབ་རྩོད་ཀྱི་འགན་དེ་ཡང་ལྗིད་དུ་འགྲོ་བཞིན་ཡོད། ཅེས་གསུངས་པ་མ་ཟད། བཀའ་བློན་མཆོག་གིས་སྐབས་དེར་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ཕྱི་ལོ་ ༢༠༡༤ ཞེས་པ་རྒྱ་གར་གཞུང་གིས་གཏན་འབེབས་གནང་བའི་སྲིད་བྱུས་སྐོར་སྤྱི་དང་། ལྷག་པར་སྲིད་བྱུས་དེ་འདྲ་ཞིག་གཏན་འབེབས་གནང་ཐུབ་པ་དེས་བོད་མི་བཙན་བྱོལ་བ་རྣམས་རྒྱ་གར་ནང་མུ་མཐུད་བཙན་བྱོལ་བའི་ངོ་བོའི་ཐོག་གནས་སྡོད་བྱ་རྒྱུར་མཐུན་རྐྱེན་ཞིག་ཏུ་གྱུར་ཡོད་པ་དང་། གཞན་ཡང་སྐབས་ ༡༥ བཀའ་ཤག་གིས་གཞིས་ཆགས་སྲ་བརྟན་གྱི་ཡར་རྒྱས་ལས་གཞི་དཔེར་ན། དངུལ་ཁང་ལྟ་བུའི་ལས་གཞི་དང་། བོད་མི་སུད་ཚོང་བ་རྣམས་ལ་སྐྱེད་ཆུང་བུན་གཡར་ལས་གཞི། འགོ་ཁྲིད་ནུས་པ་སྐྱེད་སྲིང་ཟབ་སྦྱོང་སོགས་ལས་གཞི་དེ་དག་འབྱུང་འགྱུར་ལོ་ ༥༠ རིང་བོད་མིའི་འཐབ་རྩོད་རྒྱུན་སྐྱོང་ཚགས་ཚུད་ལ་དམིགས་ནས་སྤེལ་བཞིན་ཡོད་སྐོར་གསུངས།
ཕྱོགས་མཚུངས་བཀའ་བློན་མཆོག་གིས་མང་ཚོགས་ཁྲོད་དབུ་མའི་ལམ་གྱི་སྲིད་བྱུས་སྐོར་གོ་རྟོགས་སྤེལ་ཆེད་སྲིད་བྱུས་དེའི་ངོ་བོ་དང་བྱུང་རིམ། གྲུབ་འབྲས། གདོང་ལེན་བྱེད་དགོས་པའི་གནད་དོན་ཁག་སོགས་ཞིབ་ཕྲ་ངོ་སྤྲོད་གནང་བ་དང་སྦྲགས། སྲིད་བྱུས་དེར་རྒྱལ་སྤྱིའི་ཐོག་ནས་རྒྱབ་སྐྱོར་གང་མང་ཐོབ་ཐབས་ཆེད་བོད་མིའི་སྒྲིག་འཛུགས་ཀྱིས་གོ་རྟོགས་ལས་གཞི་འདྲ་མིན་སྤེལ་བཞིན་ཡོད་སྐོར་སོགས་ངོ་སྤྲོད་གནང་འདུག
གཞན་ཡང་བཀའ་བློན་མཆོག་ནས་བཀའ་ཤག་སྐབས་ ༡༥ པས་བོད་མིའི་ཤེས་ཡོན་དང་། ནད་རིགས་སྔོན་འགོག་གི་ལས་གཞི། དེ་བཞིན་བུད་མེད་ནུས་སྟོབས་གོང་སྤེལ་གྱི་ལས་གཞི། བོད་མིའི་སྒྲིག་འཛུགས་ཀྱི་ལོ་འཁོར་སྔོན་རྩིས། བོད་ཀྱི་བུད་མེད་ཉིན་མོ། ཕྱི་ལོ་ ༢༠༡༧ ལོ་དེ་བོད་དོན་ཞུ་གཏུག་གི་ལོ་དང་། ཕྱི་ལོ་ ༢༠༡༨ ལོ་དེ་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུའི་ལས་འཆར་སོགས་ངོ་སྤྲོད་གནང་བསྟུན།
སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ནས་མི་མང་རྣམས་ལ་ཐོག་མར་འཚམས་འདྲི་དང་སྦྲགས་གསུང་བཤད་སྐབས། ཁོང་གིས་བོད་མི་བཙན་བྱོལ་བ་རྣམས་སྐྱབས་བཅོལ་བ་གཞན་དང་བསྡུར་བ་ཡིན་ན་འདྲ་འདྲའི་ནང་ནས་མི་འདྲ་བ་དང་། སྤྱིར་ད་ལྟའི་བོད་ནང་གི་གནས་སྟངས་ལ་མཚོན་ན་ཧ་ཅང་ཉག་ཕྲ་བ་དང་ཛ་དྲག་པོ་ཞིག་ཆགས་ཡོད་སྐོར། དེ་བཞིན་ང་ཚོ་བོད་མི་ཚོར་མཚོན་ན་རང་གི་མི་རིགས་ཀྱི་ཐུན་མིན་རིག་གཞུང་དང་སྐད་ཡིག ཆོས་སོགས་ཡོད་སྟབས་མི་རིགས་ཀྱི་ངོ་བོ་དམིགས་བསལ་འབུར་འཐོན་ཡོད་པ་དེ་དག་གཅེས་འཛིན་བྱེད་དགོས་པ་དང་། བོད་མི་ཚོ་འཕགས་པ་སྤྱན་རས་གཟིགས་ཀྱི་གདུལ་བྱ་ཡིན་སྟབས་སེམས་ཅན་ཀུན་ལ་བྱམས་བརྩེའི་བསམ་པ་ལྡན་ཞིང་། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་དགོངས་ལམ་སྟོན་འོག་ཤར་བསྐྱོད་གནང་དགོས་པའི་འབོད་སྐུལ་ཡང་ཞུས་ཡོད།
གཞན་ཡང་སྤྱི་འཐུས་ཚོགས་གཙོ་མཆོག་གིས་འདས་པའི་ལོ་ངོ་ ༣༠ རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཚན་རིག་པ་དང་འབྲེལ་བ་མཛད་ནས་ནང་ཆོས་ནས་གསུང་པའི་ཚན་རིག་དང་དེང་དུས་རིག་གསར་གྱི་ཚན་རིག་རྣམ་གཞག་དབར་འབྲེལ་བ་འཛུགས་ཐབས་གནང་ཡོད་པར་བརྟེན་ད་ཆ་གོ་སྐབས་གསར་པ་ཞིག་ཡོད་པ་དང་། སྔ་མོའི་དུས་སྐབས་སུ་ནང་ཆོས་ལ་སློབ་གཉེར་བྱེད་ཅེས་བརྗོད་སྐབས་དགེ་བཙུན་རྣམས་ཀྱི་གནང་སྒོ་ཡིན་པ་ལས་མི་སྐྱ་ཕོ་མོ་ཚོས་ཕྱག་མཆོད་འབུལ་ཙམ་ལས་ནང་ཆོས་ལ་སློབ་སྦྱོང་བྱེད་སྲོལ་ཧ་ལམ་མེད། འོན་ཀྱང་དེང་སྐབས་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་འོག་རྒྱ་རིགས་ཚོས་ཀྱང་བོད་བརྒྱུད་ནང་བསྟན་ལ་དོ་སྣང་བྱེད་མཁན་ཇེ་མང་དུ་འགྲོ་བཞིན་པ་མ་ཟད། ཉེ་ལམ་རྒྱ་རིགས་གློག་བརྙན་འཁྲབ་སྟོན་པ་གྲགས་ཅན་ཁག་གཅིག་གིས་གཙོས་རྒྱ་རིགས་ལས་བྱེད་པ་ཚོས་ཀྱང་༸གོང་ས་མཆོག་མཇལ་ཁ་ཞུས་པ་དེ་འདྲ་བྱུང་ཡོད་སྟབས་ང་ཚོར་རེ་བ་བཟང་པོ་ཞིག་ཡོད་པ་གསལ་པོ་ཡིན། དེར་བརྟེན་བོད་མི་ཚོས་ཀྱང་བོད་ཀྱི་རིག་གཞུང་དང་སྐད་ཡིག་གཞི་རྩར་གྱུར་བའི་ནང་ཆོས་ལ་ངེས་པར་དུ་དོ་སྣང་བྱེད་དགོས་པ་ལས། ནང་ཆོས་སློབ་གཉེར་བྱེད་དགོས་པ་བརྗོད་སྐབས་གྲྭ་བཙུན་ཁོ་ནས་བྱེད་དགོས་པའི་སྔ་མོའི་འདུ་ཤེས་རྙིང་པ་དེ་དག་དོར་དགོས་པའི་ལམ་སྟོན་གནང་།
དེ་བཞིན་ཚོགས་གཙོ་མཆོག་གིས་བོད་ཀྱི་གནད་དོན་གསལ་ཐབས་དང་། བོད་མིའི་སྒྲིག་འཛུགས་ཀྱི་བཙན་བྱོལ་བོད་མིའི་སྤྱི་ཚོགས་བདེ་དོན་གྱི་ལས་གཞི། དེ་བཞིན་བོད་ཀྱི་ཁོར་ཡུག་སྲུང་སྐྱོབ་ཀྱི་གནད་དོན་བཅས་གནད་དོན་ཁག་གསུམ་གྱི་གལ་གནད་སྐོར་གསུང་བཤད་གནང་རྗེས་མང་ཚོགས་རྣམས་ཀྱི་དྲི་བར་ལན་འདེབས་གསལ་བཤད་གནང་། གསུང་བཤད་ཀྱི་ལས་རིམ་གྲུབ་རྗེས་ཚོགས་གཙོ་མཆོག་དང་བཀའ་བློན་རྣམ་གཉིས་མ་སུ་རི་བོད་ཁྱིམ་གྱི་ལྷ་མོའི་ཁྲབ་གཞུང་མཁན་སློབ་ཆོས་གསུམ་གཟིགས་ཡོད་པ་བཅས།།
